တိုင်းရင်းသားသတင်း ခေါင်းကြီးသတင်း — သြဂုတ် ၂၈ ရက် ၂၀၁၂ ခုနှစ်
တရုတ် နိုင်ငံအတွင်းသို့ ရှောက်ရှိနေသည့် ကချင် တိုင်းရင်းသား ကလေးငယ်များ

တရုတ် နိုင်ငံအတွင်းသို့ ရှောက်ရှိနေသည့် ကချင် တိုင်းရင်းသား ကလေးငယ်များ

မြန်မာ-တရုတ်နယ်စပ် မြို့ငယ် ဖြစ်သည့် နောင်တောင်း အနီးတစ်ဝိုက် ရှိ တောတောင်များတွင် ယာယီစစ် ရှောင် ကချင်ဒုက္ခသည်များနှင့် လားရင်း (လွယ်ဂျယ် တစ်ဖက်ကမ်း)ရှိ စစ်ရှောင် ဒုက္ခသည်များအားလုံး ယခုလအတွင်း အပြီးသတ် ရွှေ့ပြောင်းပေးရန်နှင့် ယခုလအတွင်း တရုတ်ပြည်အတွင်းရှိ ကချင် စစ်ရှောင် ဒုက္ခသည် အားလုံး ရွှေ့ပြောင်းနိုင်ရေးအတွက် စီစဉ်ဆောင်ရွက်မှုများ  ပြုလုပ်ရန် တရုတ်အာဏာပိုင်များက ကချင်တပ်ဖွဲ့ (ကေအိုင်အို)သို့ လာရောက် ပြောကြားခဲ့ကြောင်း၊ အဆိုပါ ဒုက္ခသည် စခန်းများသို့ သွားရောက် လေ့လာခဲ့သည့် ကချင် ငြိမ်းချမ်းရေး ကွန်ရက်အဖွဲ့၏ သတင်းထုတ်ပြန်ချက်အရ သိရသည်။

ကချင်တိုင်းရင်းသားကလေးငယ်များကို တွေ့ရစဉ် (ဓာတ်ပုံ - သော်သော်ထက်)

ကချင်တိုင်းရင်းသားကလေးငယ်များကို တွေ့ရစဉ် (ဓာတ်ပုံ – သော်သော်ထက်)

တရုတ်နိုင်ငံတွင် ယာယီစစ်ဘေးရှောင် ခိုလှုံသူဦးရေ ၇ဝဝဝ မှ ၁ဝဝဝဝ ဝန်းကျင်ခန့် ရှိနိုင်ကြောင်း၊ လူ့အခွင့် အရေး စောင့်ကြည့်အဖွဲ့၏ အစီရင်ခံစာ တွင် ဖော်ပြထားပြီး နောင်တောင်း ဒေသရှိ ဒုက္ခသည်စခန်းများ ဖြစ်သည့် ယန်လူနှင့် လောဝ်ဖိုင်စခန်းများအား မြန်မာနယ်စပ်ဖြစ်သည့် လနားဇွပ်၊ ဘွမ် စစ်ပါ စခန်းသို့ ယခုလ ၂၂ ရက်နှင့် ၂၃ ရက်များတွင် (အတင်းအကျပ်) ပြောင်းရွှေ့ခြင်း ခံခဲ့ရကြောင်း၊ ထိုနောင်တောင်းဒေသတွင် ကျန်ရှိသည့် ဒုက္ခသည်စခန်းများ ဖြစ်သည့် လုံဂရောက်၊ နားကောင်းကောင်၊ ခဒေါင်းပါ၊ ငါနောင်ပါ စသည်တို့မှ စုစုပေါင်း လူဦးရေ ၅ဝဝဝ ဝန်းကျင် ခန့်နှင့် လားရင်း (လွယ်ဂျယ် တစ်ဖက်ကမ်း) ဒုက္ခသည်စခန်းများမှ ထိုလူဦးရေ ၂ဝဝဝ ကျော် ယခုလ အတွင်း အပြီးအပိုင် ရွှေ့ပြောင်းရမည် ဖြစ်ကြောင်း၊ ထို့အတွက် တရုတ်ပြည် ရောက် ကချင်ယာယီစစ်ဘေးရှောင် ဒုက္ခသည် စုစုပေါင်းအနည်းဆုံး ၆ဝဝဝ ခန့် ပြန်လည် ဝင်ရောက် လာနိုင်ကြောင်း သိရသည်။

ကချင်ဒုက္ခသည် စခန်းတစ်ခုမှ ကျောင်းသား ကျောင်းသူများ

ကချင်ဒုက္ခသည် စခန်းတစ်ခုမှ ကျောင်းသား ကျောင်းသူများ

တရုတ်နိုင်ငံ အတွင်းသို့ ယာယီ စစ်ဘေးရှောင် ခိုလှုံသူအများစုသည် မြေငှားခ ပေးကာ နေထိုင်သူများ ဖြစ် ကြောင်း၊ စစ်ဘေးသင့် ဒေသအတွင်းရှိ ပြည်သူများ၏ နေ့စဉ်ဘဝသည် ပျောက်ဆုံးလျက် ရှိကြောင်း၊ ထိုဒေသ အတွင်းရှိ အမျိုးသမီးများနှင့် ကလေးသူငယ်များ၏ ဘဝရပ်တည်မှု အခြေအနေသည် လွန်စွာ ခက်ခဲလျက်ရှိပြီး ထိုသို့ ဘဝရပ်တည်ရန် ခက်ခဲမှုအခြေအနေများ ကြာရှည်သည့် အလျောက် စစ်ဘေးရှောင် ဒေသမှ လူတွေ သာမက စစ်၏အကျိုးဆက်ကို တိုင်းပြည်တစ်ခုလုံး ခံစားရမည် ဖြစ်သောကြောင့်  တစ်မျိုးသားလုံး အတွက် ပြဿနာ ဖြစ်ကြောင်း၊ အဆိုပါ ကချင်ဒုက္ခသည် စခန်းများသို့ သွားရောက်လေ့လာ ခဲ့သူများ ဖြစ်သည့် မနီမို လှိုင်နှင့် ကချင်တိုင်းရင်းသူ အားခေါန် က ပြောသည်။

ကချင် စစ်ဘေးရှောင် စခန်း တစ်ခု မြင်ကွင်း

ကချင် စစ်ဘေးရှောင် စခန်း တစ်ခု မြင်ကွင်း

ကချင်ငြိမ်းချမ်းရေး ကွန်ရက်အဖွဲ့ မှ စစ်ဘေးရှောင် ဒေသများသို့ သွားရောက် လေ့လာခဲ့ရာ မိုင်ဂျာယန် ဒေသရှိ ဒုက္ခသည်စခန်း အတွင်းရှိ ကလေးများ အပါအဝင် လူကြီးအချို့သည် စခန်းအနီးရှိ ချောင်းမှ ရေမသန့်ရှင်းမှု ကြောင့် ဟု ယူဆရသည့် အရေပြားရောဂါ တစ်မျိုး ဖြစ်ပွားလျက်ရှိသည်ကို တွေ့ခဲ့ရကြောင်း၊  ထို့အပြင် အနာဂတ် အတွက် ရည်ရွယ်သည့် ပညာသင်ကြားပေးမှု ကဏ္ဍတွင်လည်း တရုတ်ပြည်အတွင်းရှိ ဒုက္ခသည် စခန်းများတွင် ကလေးများအား တရုတ်စာ၊ ကချင်စာနှင့် အင်္ဂလိပ် စာဘာသာရပ်များ  သင်ကြားပေးမှုရှိ သော်လည်း မြန်မာစာ သင်ကြားပေးမှု မရှိသည်ကို တွေ့ရကြောင်း၊ သို့ရာတွင် မြန်မာပြည်ဘက်ရှိ ကချင် ဒုက္ခသည် စခန်းများတွင်မူ မြန်မာစာကို သင်ပေးသည့်အပြင် “မြန်မာအစိုးရ၏ သင်ရိုး ညွှန်းတမ်း”များကိုသာ သင်ကြားပေးလျက် ရှိသည်ကို ကြည့်ခြင်းအားဖြင့် ကချင်စစ်ဘေး ဒုက္ခသည်များ၏ မျှော်လင့်ချက် ရောင်ခြည် ကို တွေ့မြင်နိုင်ကြောင်း အဆိုပါအဖွဲ့၏ သတင်းထုတ် ပြန်ချက်များအရ သိရသည်။

ကချင်ဒုက္ခသည် အမျိုးသမီး အများစုသည် စားဝတ်နေရေးအတွက် မျှစ်ခြောက်များ ပြုလုပ်ကာ အလွန်ပင် နည်းပါးလှသည့် ဝင်ငွေဖြင့် ရပ်တည်နေရကြောင်း၊ ကုလသမဂ္ဂ(UN)မှ အကူအညီများ ရရှိမှုသည်လည်း အကန့် အသတ်များစွာ ရှိနေဆဲဖြစ်ကြောင်း၊ ဒုက္ခသည်များအတွက် အစားအစာ၊ ဆေးဝါးများနှင့် ကလေးများ ပညာသင်ကြားမှု ဆိုင်ရာ (သင်ရိုးညွှန်း ဖတ်စာအုပ်များ အပါအဝင်)များနှင့် စပ်လျဉ်း၍ အလှူရှင်များစွာ လိုအပ်လျက် ရှိကြောင်း သိရသည်။

စားဝတ်နေရေးအတွက် မျှစ်ခြောက်ပြုလုပ်ပြီး ဝင်ငွေရှာနေကြရသည့် ကချင် ဒုက္ခသည်များ

စားဝတ်နေရေးအတွက် မျှစ်ခြောက်ပြုလုပ်ပြီး ဝင်ငွေရှာနေကြရသည့် ကချင် ဒုက္ခသည်များ

တရုတ်အာဏာပိုင်များ အနေဖြင့် လည်း တရားမဝင် ဝင်ရောက်လာသည့် ကချင်ဒုက္ခသည်များအား တာဝန်ယူမှု ဆိုင်ရာကိစ္စရပ်များတွင် အခက်အခဲများ ရှိကြောင်း၊ ကေအိုင်အေနှင့် မြန်မာ အစိုးရ စစ်မက်ဖြစ်ပွားမှု မရှိတော့ခြင်း စသည့်အချက်များဖြင့် တရုတ်နိုင်ငံ အတွင်း ဝင်ရောက် ခိုလှုံလျက် ရှိသည့် ကချင်ဒုက္ခသည် များအား ပြည်တော်ပြန်ရန် အတင်းအကျပ် စီစဉ်ဆောင်ရွက်ခြင်း ဖြစ်သည်။

ဤသို့ စီစဉ် ဆောင်ရွက်ခြင်းမှာ ဒုက္ခသည်များ ရှိရာ စခန်းများသို့ INGO များနှင့် နိုင်ငံတကာ မီဒီယာများ ဝင် ရောက်လာပါက တရုတ်နိုင်ငံ၏ အခြေအနေ များကို မြင်တွေ့မှာ စိုးရိမ်မှု ရှိနိုင်ကြောင်း၊ ထို့ပြင် တရုတ်ဘက် ကမ်းတွင် ကုလသမဂ္ဂ အကူအညီ ရောက်လာနိုင်ခွင့်ပြုရန် အခက်အခဲ ရှိနေနိုင်ကြောင်း၊ သို့သော် မိမိတို့ ဘက်လမ်းတွင်လည်း မူလရှိနေပြီးသော ဒုက္ခသည်များမှာလည်း အခက်အခဲ ရှိနေကြောင်း၊ ကုလသမဂ္ဂ ဝင်ခွင့် ရရှိချိန်မှာလည်း အကူအညီပေးနိုင်မှု၌ အကန့်အသတ် ရှိနေကြောင်း၊ ဒုက္ခသည်စခန်း အနှံ့ကိုလည်း မရောက်ရှိ နိုင်ကြောင်း၊ ယခု မိမိဘက်ကမ်းရှိ ဒုက္ခသည်များကိုပင် WPN အဖွဲ့အစည်းမှ ငွေချေးငှား၍ ကျွေးမွေး ထောက်ပံ့ နေခြင်း ဖြစ်ကြောင်း၊ အဆိုပါ ငြိမ်းချမ်းရေး ကွန်ရက်မှ ထုတ်ပြန်ချက်တွင် ဖော်ပြပါရှိသည်။

သို့ရာတွင် တရုတ်နိုင်ငံမှ ကချင် ဒုက္ခသည်များ ထွက်ခွာစေရန် စီစဉ်ဆောင်ရွက်မှုများတွင် လုံလောက်သော အချိန် သတ်မှတ်ချက် မရှိခြင်း၊ မြန်မာနိုင်ငံ အတွင်းရှိ ဒုက္ခသည် စခန်းများတွင် နေရာထိုင်ခင်း ကြိုတင် ပြင်ဆင် မှုများ ဆောင်ရွက်နိုင်ရန် အချိန်လုံလောက်မှု မရှိခြင်းစသည်များကြောင့် ကေအိုင်အိုမှ ပြောင်းရွှေ့ရေး ဆိုင်ရာ အကူအညီများ ပေးလျက် ရှိသော်လည်း ကချင်ဒုက္ခသည် များအနေဖြင့် အခက်အခဲများစွာ ရင်ဆိုင် ကြုံတွေ့ရလျက် ရှိကြောင်း သိရသည်။

တရုတ်နိုင်ငံသည် ဒုက္ခသည် ဆိုင်ရာ လက်မှတ် ရေးထိုးထားခြင်းများ၊ (၁၉၅၁ Convention on the Status of Refugees and the 1967 Protocol) ကချင်-တရုတ် နယ်စပ် စစ်မက်ဖြစ်ပွားပါက စစ်ဘေးဆိုင်ရာ အကူအညီ ပေးရန် သက်ဆိုင်ရာ နယ်စပ် အာဏာပိုင်များမှ စီစဉ်ထားရှိခဲ့သော်လည်း လက်တွေ့တွင်မူ အကောင်အထည် ဖော်ဆောင်ရွက်နိုင်မှု အားနည်းကြောင်း တွေ့ရသည်။

ကေအိုင်အို၊ ကေအိုင်အေများနှင့် ကချင်ပြည်သူများမှာမူ လွန်စွာမှ နီးစပ်မှု ရှိကြောင်း၊ ကေအိုင်အေမှလည်း ကချင်ဒေသခံများအား မည်သည့် အတွက်ကြောင့် စစ်ဖြစ်ပွားရသည် ဆိုသည့် ကိစ္စရပ်များနှင့် စပ်လျဉ်း၍ အမြဲ ပင် သတင်းထုတ်ပြန်မှုများ ပြုလုပ်လေ့ ရှိကြောင်း၊ ထို့အပြင် ကေအိုင်အေသည် မည်သည့် အခါတွင်မှ ပြည်ထောင်စုမှ ခွဲထွက်ခြင်း ပြုလုပ်မည် မဟုတ်ကြောင်း၊ ပြည်ထောင်စု စိတ်ဓာတ် အပြည့်အဝဖြင့် ပြည်ထောင်စုနှင့် တသွေးတည်း၊ တစ်သားတည်း ရှိကြောင်း၊ မိမိတို့အနေဖြင့် တပ်မတော်နှင့် သီးခြားစီ ဖြစ်နိုင်သည့် နယ်ခြားစောင့်တပ် အဖြစ် ဖွဲ့ခြင်းအား လက်မခံသော်ငြား ကေအိုင်အေ စစ်သားများ အပါအဝင် အခြားသော တိုင်းရင်းသား စစ်သားများလည်း ပါဝင်နိုင်မည့် ကာကွယ်ရေး ဦးစီးချုပ် တစ်ယောက်၏ လက်အောက်တွင် တည်ရှိမည့် ပြည်ထောင်စု တပ်မတော် ဖွဲ့စည်းခြင်းကို အလိုရှိကြောင်း၊ ကေအိုင်အေမှ တာဝန်ရှိသူ တစ်ဦးက ကချင်ငြိမ်းချမ်းရေး ကွန်ရက်အဖွဲ့ နှင့်အတူ သွားရောက် လေ့လာခဲ့သည့် မီဒီယာများအား ပြောကြားခဲ့ကြောင်းလည်း သိရသည်။

ကချင်စစ်ဘေး ဒုက္ခသည်စခန်းများသို့ သွားရောက် လေ့လာခဲ့သူတစ်ဦး ကလည်း မိမိတို့သွားရောက် လေ့လာ နေသည့် ကာလအတွင်းတွင်ပင် လက်နက်ကြီးသံများ ကြားခဲ့ခြင်းကြောင့် ဒေသခံများအား မေးမြန်းခဲ့ရာ ဒေသခံများမှ လက်နက်ကြီးသံ ဟုတ်မှန် ကြောင်း အတည်ပြု ပြောကြားခဲ့သည် ဟု မြန်မာအင်ဒီပဲန်ဒင့်သို့ ပြောသည်။

ကချင်ငြိမ်းချမ်းရေး ကွန်ရက်အဖွဲ့သည် ကေအိုင်အိုမှ ပြောရေးဆိုခွင့်ရ ပုဂ္ဂိုလ် ဦးလနန်နှင့် ကေအိုင်အေ ဒုစစ် ဦးစီးချုပ် ဗိုလ်ချုပ်ဂွမ်မော်၊ လွိုင်ဇာမြို့ရှိ စစ်ပြေးဒုက္ခသည် ကယ်ဆယ်ရေး ကော်မတီ (IDPs and Refugees relief Committee)၊ လွိုင်ဇာမြို့ရှိ RANIR(Relief Action Network for IDP and Refugee)၊ စစ်ပြေး ဒုက္ခသည် စခန်း အသီးသီး၏ စီမံခန့်ခွဲရေး ကော်မတီဝင် များ၊ မိုင်ဂျာယမ်ရှိ Wunpawng Ninghtoi(WPN) စသည့် အဖွဲ့အစည်းများနှင့် တွေ့ဆုံခဲ့သည်။

 

၀၀၂

ဆက်စပ်သတင်းများ

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *


*