ပြည်တွင်းသတင်း — ရန်ကုန်၊ မတ် ၉၊ ၂ဝ၁၃
ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ ဒုဥက္ကဋ္ဌ ဦးဋ္ဌေးဦး

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ ဒုဥက္ကဋ္ဌ ဦးဋ္ဌေးဦး

ရန်ကုန်တိုင်း ဒေသကြီး၊ ဗဟန်းမြို့နယ်ရှိ တော်ဝင်နှင်းဆီခန်းမတွင် အမျိုးသား ဒီမိုကရေစီအဖွဲ့ချုပ်၏ ပထမ အကြိမ် နိုင်ငံလုံးဆိုင်ရာ ပါတီ ညီလာခံကို ကျင်းပလျက် ရှိရာ ညီလာခံဖွင့်ပွဲသို့ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ ဒုတိယ ဥက္ကဋ္ဌဦးဌေးဦး နှင့် သူရဦးအောင်ကိုတို့ တက်ရောက်ခဲ့ကြသည်။

အဆိုပါ ညီလာခံနှင့် ပတ်သက်၍ ကြံ့ခိုင်ဖွံ့ဖြိုးရေးပါတီ ဒုတိယ ဥက္ကဋ္ဌ၏ အမြင်နှင့် သဘောထားအား သတင်း မီဒီယာ များ၏ မေးမြန်းချက်ကို ကြံ့ခိုင်ဖွံ့ဖြိုးရေးပါတီ ဒုဥက္ကဋ္ဌ ဦးဌေးဦးက ဖြေကြားရာတွင် မိမိတို့ အနေဖြင့် ပါတီ အားလုံးအား လုပ်ဖော်ကိုင်ဖက်အဖြစ် သဘောထားကြောင်း၊ လက်တွဲဆောင်ရွက်နိုင်သည့် ကိစ္စ များလည်း အများအပြား ရှိနေကြောင်း၊ ဒေါ်အောင်ဆန်းစုကြည် ပြောသွားသည့် မိန့်ခွန်းသည် ကောင်းမွန်ကြောင်း၊ တိုင်းပြည် အတွက် အကျိုးရှိရန် ဝိုင်းဝန်းလုပ်ကြမည် ဆိုသည့် မိန့်ခွန်းက ကောင်းသည့် မိန့်ခွန်းဖြစ်ကြောင်း၊ ပါတီတိုင်း အနေဖြင့် နည်းမှန် လမ်းမှန် ဖြစ်အောင် လုပ်ရကြောင်း၊ ခိုးကြောင် ခိုးဝှက်လုပ်ရသည့် ကိစ္စများ မရှိကြောင်း၊ လူထုနှင့်အတူ လုပ်ရကြောင်း၊ ပါတီ ဆိုသည်မှာ လူထုအပေါ် အခြေခံ ကြောင်း၊ ပါတီများအနေဖြင့် ဘာလုပ် လုပ်ပြည်သူမသိဘူးဆိုတာ မရှိကြောင်း၊ ပြည်သူများ ယုံကြည်လက်ခံမှုကို ကြိုးစားရခြင်းဖြစ်ကြောင်း၊ နည်းမှန် လမ်းမှန်သာ လုပ်ရမှာဖြစ်ကြောင်း၊ ယင်းသို့ မလုပ်ဘူး ဆိုပါက ပါတီသည် ကျဆုံးမှာဖြစ်ကြောင်း ကိုယ်ပိုင် သဘောထားကို ပြောသည်။

၂ဝ၁၅ ခုနှစ် ရွေးကောက်ပွဲသည် တရားမျှတမည်ဟု မျှော်လင့်ပါသလား  ဆိုသည့် မေးခွန်းအား ပြန်လည်ဖြေ ကြား ရာတွင် ၂ဝ၁၅ ခုနှစ်တင်မဟုတ် ၂ဝ၁ဝ/၁၁ အထိ မိမိတို့ တရားမျှတအောင် လုပ်ဆောင်ခဲ့ကြောင်း၊ ရွေး ကောက်ပွဲ လုပ်တိုင်း လုပ်တိုင်း တရားမျှတအောင် မိမိတို့လုပ်မှာဖြစ်ကြောင်း၊ သို့သော် ရွေးကောက်ပွဲမရှိသည့် ကာလတွင်ပင် တရားမျှတမှု ရှိအောင် မိမိတို့ လုပ်ခဲ့ကြောင်း စသည်ဖြင့် ပြန်လည် ဖြေကြားပြီး လာမည့် ၂ဝ၁၅ ရွေးကောက်ပွဲတွင် အမျိုးသား ဒီမိုကရေစီ အဖွဲ့ချုပ် အနေဖြင့် ပြည်ထောင်စု ကြံ့ခိုင်ဖွံ့ဖြိုးရေး ပါတီ၏ အဓိက ပြိုင်ဘက် အဖြစ် ရှိနိုင်ပါသလား ဆိုသည့် မေးခွန်းအား ပြန်လည်ဖြေကြားရာတွင် ပြိုင်ဘက်များ မရှိနိုင်ဘူးဟု မိမိ ထင်ပါကြောင်း၊ မိမိဆိုလိုသည် မှာ ဒေါ်အောင်ဆန်းစုကြည် ပြောသွားသည့် မိန့်ခွန်းထဲတွင် ပါဝင်ကြောင်း၊ နေရာတွေ သာဖြစ်ကြောင်း၊ နေရာက အရေးကြီးသလား လုပ်ဆောင်မှုက အရေးကြီးသလား ဆိုသည်ကို ဒေါ်အောင်ဆန်းစုကြည် မိန့်ခွန်းထဲမှာ ပြောပြ သွားကြောင်း မိမိ အမြဲတမ်းပြောလေ့ ရှိသည့် စကားရှိ ကြောင်း၊ နေရာ ဆိုသည်က အရေးမကြီးကြောင်း၊ မိမိ ဘာလုပ်ပေးနိုင်မည်လဲ ဆိုသည်ကသာ အရေးကြီးကြောင်း ဟု ပြောသည်။

၂ဝဝ၈ ခုနှစ် အခြေခံဥပဒေနှင့် ပတ်သက်ပြီး အမျိုးသားဒီမိုကရေစီ အဖွဲ့နှင့် ပူးပေါင်းရန် ရှိ/မရှိဆိုသည့် မေးမြန်း ချက်အား ပြန်လည်ဖြေကြား ရာတွင် မိမိတို့အနေဖြင့် ၂ဝဝ၈ ဖွဲ့ စည်းပုံအခြေခံဥပဒေအတွက် လောလောဆယ် တွင် စဉ်းစားဆဲဖြစ်ကြောင်း၊ မိမိအနေဖြင့် ယင်း  ၂ဝဝ၈ ခုနှစ် ဖွဲ့စည်းပုံ အခြေခံဥပဒေဖြင့် ပတ်သက်ပြီး ပြောဆိုသံများ ကြားနေရကြောင်း၊ ဘာကြောင့်လည်း၊ ဘာအတွက်လည်း၊ ဘယ်သူ့အတွက်လည်း ဆိုသည်က အရေးကြီးပါကြောင်း၊ တိုင်းပြည်နှင့် ပြည်သူအတွက် တကယ်လိုအပ်လာ ခဲ့လျှင်ပြင်ရုံတင်မက ဖွဲ့စည်းပုံအသစ် ကိုလည်း ဆွဲလို့ရကြောင်း၊ မိမိတို့ အနေဖြင့် ၂ဝဝ၈ ခုနှစ်ဖွဲ့စည်းပုံရေး ဆွဲရာတွင် မိမိတို့ ရာခိုင်နှုန်း တော်တော် များများ ပါဝင်ရေးဆွဲခဲ့ကြောင်း၊ ၁၉၇၄ ခုနှစ်တွင်လည်း မိမိတို့ ရေးဆွဲခဲ့ကြောင်း၊ အခြေခံဥပဒေကို ပြင်ဆင်ရုံတင်မက အသစ်ပြန်လည် ရေးဆွဲ လိုက ပြန်လည် ရေးဆွဲနိုင်ကြောင်း ပြောကြားသွားခဲ့ပါသည်။

ဝ၃၂

ဆက်စပ်သတင်းများ

သတင်းမျှဝေရန်

About Author

စာဖတ်သူ မှတ်ချက်များ (၁)

  1. အခြေခံဥပဒေကို ပြင်ဖို့ အတွက် လိုက်လျောနိုင်တယ်ဆိုတဲ့ စကားကြားရတာ ဝမ်းသာမိပါတယ်။ တတ်နိုင်ရင် အခြေခံ ဥပဒေပြင်သင့် မပြင်သင့်ဆိုတာ တစ်တိုင်းပြည်လုံး အနေနဲ့ ဆန္ဒခံယူပွဲ ကျင်းပ သင့်ပါတယ်။ ပြင်ဆင်တာကို အရင် တစ်ခါကလိုမျိုး ဆယ်စုနှစ် တစ်စုကျော် မကြာအောင် ဂရုစိုက် သင့်ပါတယ်။

Leave a Reply

Your email address will not be published. Required fields are marked *

*