တိုင်းရင်းသားသတင်း — ဒီမာပူရ၊ မတ် ၁၃၊ ၂ဝ၁၃

မြန်မာနိုင်ငံတွင်း  အခြေစိုက် နေထိုင်သော နာဂ တိုင်းရင်းသားများ က မိမိတို့ သီးခြား လူမျိုးများ ဖြစ်ကြောင်း မြန်မာ အစိုးရထံသို့ တနင်္လာနေ့က တင်ပြတောင်းဆို ခဲ့သည်။

Newmai News Network တွင် ဖော်ပြခဲ့သော စာတမ်းမိတ္တူတစ်စောင် တွင် နှင်းဝါ (နာဂရိုးရာနှင့် ယဉ်ကျေးမှု မြို့နယ်ခွဲ ကော်မတီ ဥက္ကဋ္ဌ၊ ရန်ကုန်) ဇော်ပွင့်ဖြိုး (နာဂတောင်တန်း ဖွံ့ဖြိုးရေး ကွန်ရက် အတွင်းရေးမှူး) နော်အောင်ဆန်း (နာဂကျောင်းသား လူငယ် အဖွဲ့ချုပ်၊ ရန်ကုန်) ဆရာတော်စိန်မောင် (နာဂ ဘက်ပတစ် ကွန်ဗင်းရှင်း အထွေထွေ အတွင်းရေးမှူး) နှင့် ဆရာတော် ဆီမူးသောင် (နာဂ ဘက်ပတစ် ခရစ်ယာန်အဖွဲ့ သင်းအုပ် ဆရာ၊ ရန်ကုန်) တို့က ပူးတွဲလက်မှတ် ရေးထိုးထားသည်။ နာဂ တိုင်းရင်းသားများသည် မျက်မှောက် မြန်မာနိုင်ငံနှင့် အိန္ဒိယနိုင်ငံတို့ရှိ တိုင်းရင်းသားများ ဖြစ်ပြီး ကိုယ်ပိုင်ဘာသာစကား၊ ယဉ်ကျေး မှု၊ ဓလေ့ထုံးစံ၊ ရှည်ကြာသောသမိုင်း နှင့် တစ်မူထူးခြားသော ကိုယ်ပိုင် လက္ခဏာများရှိကြောင်း စာတမ်းတွင် ဖော်ပြထားသည်။ မြန်မာနိုင်ငံတွင် နာဂ တိုင်းရင်းသား များနေထိုင်ကြသော ဒေသကို ၂ဝဝ၈ ခုနှစ် ပြည်ထောင်စုမြန်မာ နိုင်ငံတော် ဖွဲ့စည်း အုပ်ချုပ်ပုံအခြေခံဥပဒေတွင် ယဉ်ကျေးမှု၊ ထူးခြားသော ကိုယ်ပိုင်လက္ခဏာ၊ ပထဝီ နယ်ပယ်နှင့် လူဦးရေ အချိုးအစားအရ နာဂ ကိုယ်ပိုင် အုပ်ချုပ်ခွင့်ရ နယ်မြေ (Naga Self-Admin) အဖြစ် အသိအမှတ် ပြုထားကြောင်းကို လည်း စာတမ်းက သတိပေးထားသည်။

“နာဂ တိုင်းရင်းသားတွေဟာ ချင်းတိုင်းရင်းသား မျိုးနွယ်စု ၅၃ စုထဲမှာ တစ်ခု အပါအဝင်ဖြစ်တယ်လို့ မြန်မာ့ လွှတ်တော် တွင်းမှာ ပြန်လည် ဖြေကြားခဲ့တာဟာ လုံးဝလက်ခံနိုင် စရာမရှိပါဘူး” ဟု စာတမ်းတွင် အခိုင်အမာ ဖော်ပြထားသည်။ “အခြေအမြစ်မရှိ လက်သင့်မခံနိုင်တဲ့အပြင် ယုတ္တိမတန်တဲ့ လူဝင်မှု ကြီးကြပ်ရေး နဲ့ ပြည်သူ့ အင်အား ဝန်ကြီးဌာန၊ ဒုတိယဝန်ကြီးရဲ့ ပြန်ကြားချက်ဟာ အမျိုးသား ညီညွတ်ရေးနဲ့ ပြန်လည်ရင် ကြားစေ့ရေး ကို ထိခိုက်နိုင်ပါတယ်” ဟု ယင်းက ဆိုပါသည်။

နာဂ တိုင်းရင်းသားများကို အခြားတိုင်းရင်းသားလူမျိုးစုများ အတွင်းမှ မျိုးနွယ်စုအဖြစ် ထည့်သွင်း ဖော်ပြခြင်းကို အလေးအနက် ပယ်ချကြောင်း၊ နိုင်ငံတော်မှ တိုင်းရင်းသား လူမျိုးစုစာရင်းကို တရားဝင် ပြင်ဆင် ဖြည့်စွက်၍ ထပ်မံ ထုတ်ပြန်ပေးရန် မိမိတို့ လေးနက်တည်ကြည်စွာ တောင်းဆိုကြောင်း၊ ထို့ပြင် နာဂ တိုင်းရင်းသား များကို ပြည်ထောင်စု တိုင်းရင်းသား ကျေးရွာတွင် ချင်းတိုင်းရင်းသား အနွယ်အဖြစ် သရုပ်ဖော် ပြသထားကြောင်း၊ နာဂ ရိုးရာ အသုံးအဆောင် နှင့် ပစ္စည်းကိရိယာများကို ချင်းတိုင်း ရင်းသားရိုးရာပစ္စည်းများအဖြစ် ပြသ ထားကြောင်း၊ ယင်းတို့ကို ဖြစ်နိုင်သမျှ အမြန်ဆုံး ဖယ်ရှား ရုပ်သိမ်းပေးရန် မိမိတို့ အလေးအနက် မေတ္တာ ရပ်ခံ ကြောင်း မြန်မာနိုင်ငံရှိ နာဂ အဖွဲ့အစည်းများက မြန်မာအစိုးရထံ တောင်းဆိုထားပါသည်။

“ဘယ်လူပုဂ္ဂိုလ်၊ ဘယ်အဖွဲ့အစည်း ဒါမှမဟုတ် ဘယ်စီးပွားရေး လုပ်ငန်းကမှ နာဂ တိုင်းရင်းသားတွေနဲ့ နာဂ ဒေသကို ရည်ရွယ်ချက် ရှိသည်ဖြစ်စေ၊ မရှိသည်ဖြစ်စေ၊ နာဂ မဟုတ်ဘဲ အခြားတိုင်းရင်းသားတွေ ရဲ့ အမည် စာရင်း ဒါမှမဟုတ် နာဂ မဟုတ်တဲ့ ဒေသရဲ့လက်အောက်မှာမှ မဖော်ပြ၊ မရည်ညွှန်းဖို့ ကျွန်တော် တို့ အလေးအနက် မေတ္တာရပ်ခံ တောင်းဆို အပ်ပါတယ်” ဟု စာတမ်းတွင် ဖော်ပြထားပါသည်။

Ref: e-par.net

ဝ၄ဝ

ဆက်စပ်သတင်းများ

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*