တော်လှန်ရေး၏ မြှုပ်ကွက် ရှုပ်ကွက်များ

ဦးဗဆွေ(ဝန်ကြီးချုပ်ဟောင်း)

ခေတ်ပြတိုက်စာပေ၊ ၂ဝ၁၃၊ ဇန်နဝါရီလ၊ စာမျက်နှာ ၂၉၈၊ တန်ဖိုး ၃ဝဝဝ ကျပ်

မြန်မာ့နိုင်ငံရေး ဇာတ်ခုံပေါ်တွင် အဓိက အခန်းကဏ္ဍမှ တာဝန်ယူခဲ့ဖူးသူ တစ်ဦးဖြစ်သည့် ဝန်ကြီးချုပ်ဟောင်း ဦးဗဆွေ၏ ဆောင်းပါးစုစည်းမှု တော်လှန်ရေး၏ မြှုပ်ကွက် ရှုပ်ကွက်များကို ခေတ်ပြတိုက်စာပေ မှ ပထမ အကြိမ် ထုတ်ဝေလိုက်သည်။ ၁၉၇၁-၇၂ ကာလများတွင် ထုတ်ဝေခဲ့သော ရွှေတူဂျာနယ်မှ ဆောင်းပါး ၂၄ ပုဒ်ကို စုစည်း ထုတ်ဝေလိုက်ခြင်း ဖြစ်ပြီး ဝန်ကြီးချုပ်ဟောင်းတစ်ဦး၏ မြန်မာ့နိုင်ငံရေး သံသရာတွင် ကျင်လည် လှုပ်ရှားရင်း တွေ့ကြုံ ခဲ့ရသည့် အများပြည်သူ သတိမမူမိလိုက်သော ကွယ်ပျောက်နေသော မှတ်တမ်းအပိုင်း အစများဟုလည်း ဆိုနိုင်သည်။

စာအုပ်တွင် ရန်ကုန်ကို မည်သူ သိမ်းသနည်း။ နယ်ချဲ့အချင်းချင်း စစ်ပွဲဟာ ကျွန်နိုင်ငံတွေ အတွက် မီးတင်ပွဲ၊ ဗိုလ်ချုပ်အောင်ဆန်း၏ မူ၊ စစ်အေးတိုက်ပွဲ၊ ပွဲကြီးပွဲကောင်း၊ ကတိကိုမတည် အကြံရိုင်းတဲ့၊ ရင်တမမ နေရသော ဘိလပ်ဆွေးနွေးပွဲ၊ မှတ်တမ်းတင်အပ်သော သူရဲကောင်းများ စသည့် ဆောင်းပါး ၂၄ ပုဒ်တွင် ကိုယ်တိုင် ကြုံတွေ့ ဖြတ်သန်း လာရသူ တစ်ဦး၏ အမှတ်ရချက်များ၊ သုံးသပ်ချက်များကို ရဲရဲဝံ့ဝံ့ တင်ပြထားသည်ကို တွေ့ရသည်။ ၁၃ဝဝ ပြည့် အရေးတော်ပုံ၊ ပြည်သူ့ အရေးတော်ပုံပါတီ၊ ဂျပန် ခေတ်၊ ဖဆပလတည်ဦးစ၊ လွတ် လပ်ပြီးစ ဖဆပလအစိုးရ စသည့် ကာလများအတွင်း အထင်ကရဖြစ် ရပ်များ၏ နောက်ကွယ်မှ မြှုပ်ကွက် များကိုလည်း ဖတ်ရှုရမည်ဖြစ်သည်။

ကမ္ဘာ့စစ်သမိုင်း စာအုပ်များတွင် ဗိုလ်ချုပ်ကြီး စလင်းကို ဂျပန်စစ်အရှုံး ရန်ကုန်သိမ်း တိုက်ပွဲ အောင်မြင်သူအဖြစ် ဂုဏ်ယူဖော်ပြထားကြ သော်လည်း အဖြစ်မှန်မှာ ရန်ကုန်တွင် ဂျပန် တစ်မြီးမှ မရှိတော့အောင် မြန်မာ ဖက်ဆစ် တော်လှန်ရေး သမားများမှ သိမ်းယူအောင်မြင်ပြီးကာမှ ရောက်ရှိလာခြင်းဖြစ်ကြောင်း၊ ထိုစဉ်က စလင်း၏ စစ်ကြောင်းမှာ မိတ္ထီလာတွင်မျှ ရှိသေးကြောင်းကိုလည်း မြန်မာမျိုးချစ် စစ်သည်တို့ဘက်မှ ချေပမှတ်တမ်း ပြုထားသည်။ ထိုမျှမက အင်္ဂလိပ်တပ်များ ရန်ကုန်မြို့ သိမ်းပြီးနောက် ရှေးဦး စွာ သိမ်းယူအောင်မြင်ထားသော တော်လှန်ရေး တပ်များထံမှ အဓမ္မ လက်နက် သိမ်းယူခဲ့သည့် ဖြစ်စဉ် သာမက ဂျာနယ်ကျော် ဦးချစ်မောင်၊ ဦးဉာဏ စသူတို့ကို ဖမ်းဆီးခဲ့ကြောင်း လူသိနည်းသည့် သမိုင်းမှ မှတ်တမ်းတို့အကြောင်းလည်း တင်ပြ ထားသည်။

ပြည်သူ့အရေးတော်ပုံပါတီမှ ရဲဘော်သုံးကျိပ်ကို ပြည်ပသို့ ခိုးထုတ်စဉ်က ကိုယ်တွေ့ကြုံတွေ့ရ သော မှတ်တမ်း တင်ချက်များမှာလည်း စိတ်ဝင်စားဖွယ်ဖြစ်သည်။ ဖဆပလ တည်ထောင်ပြီးနောက်ပိုင်း ဘုရင်ခံ အမှုဆောင် ကောင်စီ ဖွဲ့စည်းရာတွင် ဖဆပလမှ ထွက်ခွာခဲ့ကြသည့် ဆာပေါ်ထွန်း၊ ဆာထွန်း အောင်ကျော်၊ သာယာဝတီ ဦးမောင်မောင်၊ ဦးအေး၊ ဦးလွန်း၊ ဦးပု၊ မန်းဘခင် စသူတို့အပေါ် လျှပ်တစ်ပြက် သုံးသပ်ချက်များမှာလည်း ရဲရင့်ပြတ်သားလှသည်။ အောင်ဆန်း  အက်တလီ စာချုပ်ကာလ အတူပါ သွားခဲ့သော ဂဠုန်ဦးစောနှင့် သခင် ဗစိန်တို့ လက်မှတ်မထိုးဘဲ ကန့်ကွက်ခဲ့ ရခြင်း၏ မြှုပ်ကွက်များ၊ လွတ်လပ်ရေး ကြိုးပမ်းစဉ်ကာလ သခင်နု၏ ပါဝင် ဆောင်ရွက်ပုံ တစ်မျိုးတစ် ဖုံမြှုပ်ကွက်များကိုလည်း လေ့လာရ မည်ဖြစ်သည်။ အထူးသဖြင့် ဖဆပလအပေါ် ကွန်မြူနစ်ပါတီ၏ အစဉ်တစိုက် အကောက်ကြံမှုများ ကိုလည်း တင်ပြထားသည်။

၁၃ဝဝ ပြည့် အရေးတော်ပုံ ကာလမှသည် လမ်းစဉ်ပါတီအစိုးရ ခေတ်ထိ သမိုင်းစဉ် တစ်လျှောက် ဖြတ်သန်းမှု စုံလင် ရှည်လျားသူ တစ်ဦး၏ ကိုယ်တွေ့မှတ်တမ်း များဖြစ်၍ စိတ်ဝင်စားဖွယ်ဖြစ်ရသည်။ စာရေးသူကလည်း ဤဆောင်းပါးများ ကို ရေးသားရခြင်းမှာ သမိုင်းမှန်ကို မမေ့မလျော့ မှတ်တမ်းပြုစေလို၍ဖြစ် ကြောင်း၊ အဖြစ်မှန် များကိုသာ အမှန်အတိုင်း တင်ပြထားခြင်းဖြစ် ကြောင်း ဆိုထားသည်။ သမိုင်းဝင် မှတ်တမ်းများ သာမက ဦးဗဆွေ ကိုယ်တိုင် ပါဝင်ခဲ့သော မြန်မာ့လွတ် လပ်ရေးကြိုးပမ်းမှု သမိုင်းဝင် ရှားပါး ဓာတ်ပုံများကိုပါ ဖော်ပြထား သည်။

၁၃ဝဝ ပြည့် အရေးတော်ပုံ ရေနံမြေသပိတ်တွင် ကိုဗဟိန်းနှင့် အတူ လှုပ်ရှားခဲ့ပြီး နောက်ပိုင်းကာလ တစ်လျှောက်လုံး နိုင်ငံရေးမြင်ကွင်း ရှေ့တန်းတွင် ပေါ်လွင်ခြင်း မရှိခဲ့ဘဲ ဖဆပလ အစိုးရ လက်ထက်မှ ရှေ့တန်း ရောက်လာခဲ့သည်ဟု အများက သတိမပြုမိကြသော်လည်း ဤ စာအုပ်မှ တစ်ဆင့် နောက်ကွယ် ရောက်နေခဲ့သည့် တိုင် အဓိက တာဝန်ယူထားရသည့် တော်လှန်ရေး သမား၊ နိုင်ငံရေးသမား တစ်ဦး၏ ဖြတ်သန်းမှုကို တွေ့သိရသည်။ အထူးသဖြင့် ရဲဘော်သုံးကျိပ်ကို စစ်ပညာ သင်ရန် စေလွှတ်စဉ်က ဖြစ်စဉ် များကြောင့် နောက်ကွယ်မှ ပံ့ပိုးပေးရသူတို့၏ အရေးပါမှုကို နားလည် စာနာလာစေသည်။

ရဲရဲတောက် ကျောင်းသား ခေါင်းဆောင်တစ်ဦး၊ ဖက်ဆစ် တော်လှန်ရေး ခေါင်းဆောင်တစ်ဦး၊ အင်္ဂလိပ် အစိုးရ၏ တွေ့ရာတွင် အသေသတ်မိန့် ထုတ်ခံရသူတစ်ဦး၊ ဖဆပလ အစိုးရလက်ထက် ထက်မြက်သော ကာကွယ်ရေး ဝန်ကြီး တစ်ဦး၊ ဒုတိယ ဝန်ကြီးချုပ် တစ်ဦး၊ ဝန်ကြီးချုပ်ဟောင်းတစ်ဦး၊ ၁၉၆၂ တပ်မတော်မှ အာဏာ သိမ်းစဉ် က ဒီမိုကရေစီရေး မိန့်ခွန်းကို  ရဲရဲတောက် ဟောပြောခဲ့သူ တစ်ဦးစသည့် ဝါရင့် နိုင်ငံရေးသမားတစ်ဦး၏ မှတ် တမ်းများဖြစ်၍ စိတ်ဝင်စားဖွယ် သမိုင်းတန်ဖိုးများ ပြည့်နှက်နေသည်လည်း ဖြစ်သည်။ သို့သော် ထို့ထက် ပိုရှုပ်ထွေးသော ဖဆပလ အစိုးရ လက်ထက်၊ အိမ်စောင့် အစိုးရလက်ထက် ကာလများ၏ မြှုပ်ကွက်၊ ရှုပ်ကွက် များ မပါဝင်သည့် အတွက်မူ အားမရ ဖြစ်မိရ ပါသည်။

မည်သို့ဆိုစေ နိုင်ငံရေး စာပေနှင့် သမိုင်းဖြစ်ရပ်မှန် စိတ်ဝင်စား လေ့လာလိုသူများ၊ စာပေမြတ်နိုးသူများ ဖတ်ရှု ဆင်ခြင်သင့်သည့် စာအုပ်ကောင်း တစ်အုပ်ဖြစ်ပါ သည်။ တော်လှန်ရေး ကာလအတွင်း ပိတ်ကား နောက်ကွယ်မှ တာဝန်ရှိသူတစ်ဦး၏ မှတ်တမ်းပင်ဖြစ်သည်။

“သူတို့ရဲ့အကြံက သူတို့ လက်မှတ် မထိုးရင် ဆွေးနွေးပွဲပျက်မယ်။ ဆွေးနွေးပွဲပျက်ရင် ဇန်နဝါရီ ၃၁ ရက်နေ့မှာ ကျွန်တော်တို့ ရာထူးက နုတ်ထွက်ကြရမယ်။ ကျွန်တော်တို့ နုတ်ထွက်မှ သူတို့က တက်ယူမယ် ဆိုတဲ့အကြံပဲဟု ဘွင်းဘွင်းကြီး ရှင်းပြခဲ့လေသည်။”(စာ-၁၉၂)

ဝဏ္ဏလင်း

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*