နိုင်ငံတကာသတင်း — မတ် ၇၊ ၂ဝ၁၃

ဂျပန်နိုင်ငံ  Fukushima Daiichi အနုမြူစွမ်းအင် စက်ရုံ ရေဒီယိုဓာတ် သတ္တိပျံ့နှံ့မှုဖြစ်စဉ်နှင့် ပတ်သက်သည့် ကျန်းမာရေး အန္တရာယ်များကို လေ့လာဆန်းစစ်ခဲ့သော ကမ္ဘာ့ကျန်းမာရေးအဖွဲ့က ယင်းတို့၏ တွေ့ရှိချက် ကို ဖေဖော်ဝါရီ ၂၈ ရက်က ထုတ်ပြန်ပေးခဲ့သည်။ လေ့လာ တွေ့ရှိချက်အရ ရေဒီယိုဓာတ် သတ္တိပျံ့နှံ့မှု အမြင့်ဆုံး ပမာဏ အထိ ခံစားခဲ့ရသော ကလေးငယ်များတွင် ကင်ဆာရောဂါ ဖြစ်ပွားနိုင်ချေ အနည်းငယ် ပိုမိုမြင့်တက်လာကြောင်း သိရှိရပြီး ဂျပန် တစ်နိုင်ငံလုံး လူဦးရေ အတိုင်းအတာ တွင် ကင်ဆာရောဂါ ဖြစ်ပွားနှုန်း မြင့်တက် လာခြင်း မရှိကြောင်း ဖော်ပြပါရှိခဲ့သည်။

Fukushima ဖြစ်စဉ်မှ ရေဒီယို ဓာတ်သတ္တိပျံ့နှံ့မှုခန့်မှန်းပမာဏနှင့် ဖြစ်ပေါ်နိုင်ဖွယ်ရှိသော အလားအလာ တို့ကို နှစ်နှစ်ကြာ အချိန်ယူ လေ့လာခဲ့သော အဆိုပါ လေ့လာမှုက Fukushima အဖြစ်ဆိုးကြောင့် ဖြစ်ပေါ်ရသော စိတ်ပိုင်းဆိုင်ရာ ဆိုးကျိုး သက်ရောက်မှုများက နောက်ဆက်တွဲ ကျန်းမာရေး ပြဿနာ များ ဖြစ်စေနိုင်ကြောင်းကို လည်း ဖော်ပြခဲ့သည့် အပြင် ရေဒီယို ဓာတ်သတ္တိပျံ့နှံ့မှု အများဆုံး ခံစားခဲ့ရသော ဒေသများရှိ ပြည်သူတို့အား ကျန်းမာရေး စစ်ဆေးမှု များနှင့် စောင့်ကြည့် လေ့လာမှုများ ပြုလုပ်ပေးရန် လည်း တောင်းဆိုခဲ့သည်။

လေ့လာဆန်းစစ်မှု ပြုလုပ်ပေးခဲ့ သူတို့က ယင်းတို့ဆောင်ရွက်ရသော ဆန်းစစ်လေ့လာမှုသည် သိမီသမျှ သိပ္ပံပညာ ဗဟုသုတဖြင့်သာ ဆောင် ရွက်ရခြင်းဖြစ်ကြောင်း လည်း သတိပေး ပြောကြားခဲ့သည်။

ဂျပန်အစိုးရကမူ ကမ္ဘာ့ကျန်းမာရေးအဖွဲ့၏ အစီရင်ခံစာသည် စိုးရိမ်စိတ် လွန်ကဲလှသည်ဟု ဆိုသည်။ ဖြစ် ပေါ်နိုင်သော အန္တရာယ်ထက် ပိုမို တွက်ဆထားသဖြင့် ကင်ဆာရောဂါ ဖြစ်ပွားနိုင်ချေအပေါ် ပြည်သူလူထုက နားလည်မှု မှားယွင်းနိုင်စေကြောင်း ပြောကြားခဲ့သည်။

ကမ္ဘာ့ကျန်းမာရေးအဖွဲ့၏ အစီရင်ခံစာအရ Fukushima ဒေသအတွင်း ရေဒီယိုဓာတ်သတ္တိပျံ့နှံ့မှု အမြင့်မားဆုံး ဖြစ်ပွား ခဲ့သော ဒေသများမှ မွေးကင်းစ မိန်းကလေး ငယ်များမှာ သာမန် ကလေးငယ်များထက် Thyroid ကင်ဆာရောဂါ ဖြစ်ပေါ်နိုင်ချေ ၇ဝ ရာခိုင်နှုန်းမျှ ပိုမိုများပြားကြောင်း ဖော်ပြခဲ့သည်။ ပထမနှစ်အတွင်း ရေဒီယိုဓာတ် သတ္တိပျံ့နှံ့မှု ၁၂ မှ ၂၅ millisieverts အထိရှိသော ဒေသများကို ရေဒီယိုဓာတ် သတ္တိကြွမှု အမြင့်ဆုံးဟု ခန့်မှန်းထားခြင်း ဖြစ်သည်။ သာမန် အားဖြင့် ကလေးသူငယ် တစ်ယောက်၏ Thyroid ကင်ဆာ ရောဂါ ဖြစ်ချေမှာ ဝ.၇၅ ရာ ခိုင်နှုန်းမျှသာ ရှိသည်ဟုလည်း နှိုင်းယှဉ် ဖော်ပြခဲ့သည်။

ရေဒီယို ဓာတ်သတ္တိ ပျံ့နှံ့မှု အမြင့်မားဆုံးသော ဒေသများမှ မွေးကင်းစ မိန်းကလေးများသည် ရင်သားကင်ဆာ ဖြစ်နိုင်ချေမှာ သာမန်ထက် ၆ ရာခိုင်နှုန်း ပိုမိုပြီး Tumor ဖြစ်သော ကင်ဆာရောဂါ ဖြစ်ပွားမှုတွင်လည်း သာမန်ထက် ၄ ရာခိုင်နှုန်း ပိုသည်ဟု အဆိုပါအစီရင်ခံစာကဆိုသည်။ မွေးကင်းစ ယောကျာ်းလေးများ ဆိုလျှင် သွေးကင်ဆာ ရောဂါဖြစ်နိုင်ချေမှာ သာမန်ထက် ၇ ရာခိုင်နှုန်းပိုသည်ဟုလည်း သိရှိရသည်။

ရေဒီယိုဓာတ်သတ္တိပျံ့နှံ့မှုဖြစ်ပွားနေသော Fukushima Daiichi စက်ရုံအား ထိန်းချုပ်ရန် စက်ရုံတွင်း ကျန်ရှိနေ ခဲ့သော အရေးပေါ် ကယ်ဆယ်ရေး လုပ်သားများ၏ သုံးပုံတစ်ပုံမှာ သွေးကင်ဆာ၊ Thyroid ကင်ဆာ နှင့် အခြားကင်ဆာရောဂါများ ဖြစ်နိုင်ချေ အနည်းငယ်မျှ မြင့်တက်လာခဲ့သည် ဟုလည်း ယင်းအစီရင်ခံစာ က ဖော်ပြခဲ့သည်။

ကမ္ဘာ့ကျန်းမာရေးအဖွဲ့၏ အဆိုပါ အစီရင်ခံစာက ရေရှည် ကျန်းမာရေးစောင့်ရှောက်မှု လိုအပ်သော ဆေးဝါး ထောက်ပံ့မှု တို့ကို အဆိုပါ ရေဒီယိုဓာတ် သတ္တိပျံ့နှံ့မှု အမြင့်ဆုံး ဒေသရှိ ပြည်သူများ အတွက် စီစဉ် ဆောင်ရွက်ပေး သင့်ကြောင်းကိုလည်း အလေးထား ဖော်ပြခဲ့သည်။

Fukushima ဒေသမှ ဒေသခံအစိုး ရအရာရှိများက ကမ္ဘာ့ကျန်းမာရေး အဖွဲ့၏ အစီရင်ခံစာကို ဝေဖန်ပြော ကြားခဲ့ကြပြီး အဆိုပါအစီရင်ခံစာတွင် ပါရှိသော ဒေသများ၏ အမည်အတိ အကျကို ဖော်ပြစေလိုကြောင်း ပြောကြားခဲ့ ကြသည်။ လိုသည်ထက်ပို၍ ချဲ့ထွင်ထားသော အစီရင်ခံစာကြောင့် ဒေသခံများ စိုးရိမ်သောကရောက်စေ မည်ဟု လည်း ဝေဖန် ကြသည်။

အချင်း ၁၂ မိုင် သတ်မှတ်ထားသော ကယ်ဆယ်ရေးဇုန် ပြင်ပဒေသ များတွင် ဒေသခံတို့က မိမိတို့နေရပ်သို့ ပြန်လည် ဝင်ရောက်နေထိုင် စပြုနေပြီ ဖြစ်သည်။ ဒေသတွင်းနှင့် မြို့တွင်း သန့်ရှင်းရေးပြုလုပ်ခြင်းတို့ကိုလည်း ဆောင်ရွက်လျက် ရှိသည်။

Fukushima ဒေသအာဏာပိုင်တို့က ရေဒီယို ဓာတ်သတ္တိပျံ့နှံ့မှု ကြောင့် ပေါ်ပေါက်လာနိုင်ဖွယ်ဖြစ် သော အကျိုးဆက် တို့အတွက် ရေရှည်ကျန်းမာရေး စစ်ဆေးဆောင်ရွက် မှုများ ပြုလုပ်ပေးရန် ကတိပြုခဲ့ကြ သည်။ ၂ဝ၁၁ ခုနှစ်၊ မေလမှစတင် ပြုလုပ်ခဲ့သော စစ်ဆေးတွေ့ရှိချက်များ အရ ဒေသခံကလေးငယ်သုံးဦးတွင် Thyroid ကင်ဆာဖြစ်ပွားနေကြောင်း တွေ့ရှိခဲ့ရသည်။ သို့ရာတွင် ထိုသို့ ဖြစ်ပွားခြင်းမှာ  ဖြစ်စဉ်နှင့် ပတ်သက်ခြင်း ရှိ၊ မရှိ ဆုံးဖြတ်ရန် ခက်ခဲကြောင်း ကျွမ်းကျင်သူ တို့က ပြောကြားခဲ့ကြသည်။

ဝ၃၉

ဆက်စပ်သတင်းများ

ထိုင်းဘုရင် ဘူမိဘော အဒူရာဒေ့ခ်ျ နတ်ရွာစံ

ထိုင်းဘုရင် ဘူမိဘော အဒူရာဒေ့ခ်ျ နတ်ရွာစံ

ထိုင်း၊ အောက်တိုဘာ ၁၃၊ ၂၀၁၆

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*