အုတ်တစ်ချပ်သဲတစ်ပွင့် — ရန်ကုန်၊ ဒီဇင်ဘာ ၂၂၊ ၂ဝ၁၂

နိုင်ငံသားတိုင်း ပိုပြီးကောင်း မွန်သည့် ဘဝဖြစ်စေရန် ရည်ရွယ်၍ ကျေးလက်ဒေသ ဖွံ့ဖြိုးရေးများ၊ လူငယ်ဘဝ မြှင့်တင်ရေး အသက် မွေးမှုသင်တန်းများ ဖွင့်လှစ် သင်ကြားခြင်း၊ အခြေခံလူမှုရေးကိစ္စရပ်များ ကို စီမံကိန်း များဖြင့် ဆောင်ရွက်လျက် ရှိသော ဘဝမြင့်မိုရ် (Better Life Organization) ကို ယခု အုတ်တစ်ချပ် သဲတစ်ပွင့် ကဏ္ဍမှ ဖော်ပြပါသည်။

Better Life Organization ကို လူမှုရေးနှင့် ဆက်နွယ်သည့် ဘာသာရပ်များကို သင်ယူထားသော သူငယ်ချင်း ၂ ဦးမှ အဖွဲ့အစည်း အနေဖြင့် မဟုတ်ဘဲ ၂ဝဝ၆ ခုနှစ်တွင်  စတင်တည်ထောင်ကာ ပညာဒါန သင်တန်း၊ လူငယ် အရည်အသွေး မြှင့်သင်တန်းနှင့် ကျေးရွာတွင်းရှိ နွမ်းပါးသော ကလေးများကို ရှင်ပြု ပေးခြင်းများ ပြုလုပ်ခဲ့ပြီး ၂ဝဝ၈ ခုနှစ်၊ မေလတွင် အဖွဲ့အစည်းတစ်ခု အနေနှင့် စတင်လုပ်ဖြစ်ခဲ့ကြောင်း Better Life Organization ၏ ဒါရိုက်တာ ကိုဟန်ဇာမောင်က ပြောကြားသည်။

အဖွဲ့အစည်း ပထမဦးဆုံး ရပ်တည်ရန် အထောက်အပံ့ပေးသည့် အလှူရှင်သည် သြစတြေးလျမှ Ms. Melanie က ငွေကြေး မတည်ပေးသဖြင့် စတင်တည်ထောင်ခဲ့ပြီး ယခု လက်ရှိတွင် Oxfam, DFID ကဲ့သို့ ပြည်ပ အလှူရှင်များနှင့် ချိတ်ဆက်ဆောင်ရွက်၍ ပြည်တွင်း အလှူရှင်များ၏ ငွေကြေး ပံ့ပိုးမှုများလည်း ရှိကြောင်း သိရသည်။

Better Life သည် စတင်တည်ထောင်စဉ် ၂ဝဝ၆ ခုနှစ် မှ ၂ဝဝ၇ ခုနှစ်အတွင်း ကချင်ပြည်နယ်ရှိ စအို မပါသော တစ်နှစ်ခွဲအရွယ် ကလေးငယ်ကို ခွဲစိတ်မှု ၃ ကြိမ် တာဝန်ယူလုပ် ဆောင်ပေးခဲ့ပြီး ရန်ကုန်တိုင်းတွင် ရုံးချုပ် တည်ရှိကာ ရခိုင်ပြည်နယ် နှင့် ဧရာဝတီတိုင်းဒေသကြီးတွင် ရုံးခွဲများဖွင့်လှစ်ကာ  အဆိုပါ ဒေသ များ၏ လူမှုစီးပွားရေး တို့တွင် ပါဝင် လုပ်ဆောင်ပေးလျက် ရှိသည်။

အဖွဲ့အစည်းအနေဖြင့် စတင်လုပ် ကိုင်စဉ်က မြန်မာနိုင်ငံတွင်ရှိသည့် ဖွံ့ဖြိုးတိုးတက်ရေးနှင့် ပြန်လည်ထူ ထောင်ရေး လုပ်ငန်းစဉ်များတွင် တစ်ထောင့် တစ်နေရာက ပါဝင်မည့် ရည်မှန်းချက်ဖြင့် လုပ်ဆောင်ခဲ့ပြီး မိမိကိုယ်ကို မိမိလေးစားမှု၊ အသုံးချခံ ဘဝများမှ ရုန်းထွက်နိုင်မှု၊ ရေ ရှည်ဖွံ့ဖြိုးတိုးတက်မှုဆိုသည့် အဆင့် ၃ ဆင့် ချမှတ်ကာ ဆောင်ရွက်နေ ကြောင်း ကိုဟန်ဇာမောင်က ပြောကြားခဲ့သည်။

ယင်းမှဆက်လက်၍ “လူငယ် အရည်အသွေးမြှင့်သင်တန်းတွေ၊ ကျေးလက်ဒေသဖွံ့ဖြိုးရေးတွေ လုပ်တဲ့ နေရာမှာ အဲဒီဒေသမှာ ရှိတဲ့သူတွေ ကျေးလက်ဖွံ့ဖြိုးရေးကို သူတို့ကိုယ်တိုင် လုပ်နိုင်အောင် မြေတောင် မြှောက်ပေးတာပါ။ ဥပမာအားဖြင့် လယ်ယာကဏ္ဍမှာ လယ်သမားတွေက နှစ်စဉ် သူတို့လယ်တွေမှာ ပျိုး ကြဲနိုင်၊ စပါးစိုက်နိုင်ဖို့ ပိုက်ဆံ ချေးရတယ်။ အဲဒီလို ချေးတဲ့အခါ မှာလည်း ငွေချေးတဲ့သူကို လယ်သမားတွေက ချေးငွေ အတိုး အပြင် စပါးပေးနဲ့ပါ ဆပ်ရတယ်။ အဲဒီတော့ လယ်သမားက အတိုးများများ ပေးရတဲ့အပြင် စပါးပေါ်လို့ မြတ်မယ့် စပါးလေးကိုပင် စပါးပေးဆပ်ရတော့ နှစ်ခါတောင် လယ်သမား တွေအတွက် နစ်နာပါတယ်။ အဲဒါ ကို ကျွန်တော်တို့တွေက သူတို့ရပ်ရွာမှာပဲ လယ်သမားအခြေပြု ဒေသခံအဖွဲ့တွေ ဖွဲ့ပေးပြီး ငွေကြေး ကို အတိုးနည်းနည်းနဲ့ ထုတ်ချေး နိုင်ဖို့ ဆောင်ရွက်ပေးတယ်။ ပထမဦးဆုံး စချေးတဲ့နှစ်မှာပဲ အတိုး အနည်းငယ် ဆပ်ခိုင်းပြီး စပါးပေးရတဲ့စပါးကို စပါးကျီတစ်ခုထဲမှာ လယ်သမားအခြေပြုအဖွဲ့ တာဝန် ခံက တာဝန်ယူ လှောင်ထားရပါ တယ်။ ဈေးတက်တဲ့အချိန်မှာ ရောင်းပြီး သဏ္ဍာငွေ ရှာဖွေထားပြီး နောင်နှစ်တွေမှာ ထိုကဲ့သို့ ဆောင်ရွက် ပေးနိုင်ဖို့ လှည့်ပတ်ရန်ပုံငွေလို့ ခေါ်ဆိုတဲ့ နည်းလမ်းတွေနဲ့ လယ်ယာ နည်းပညာ သင်တန်းပေးမှု တွေ ကို သိသာထင်ရှားတဲ့ ဆောင်ရွက်မှုတွေ လုပ်ဆောင်ပါတယ်” ဟု ပြောကြား ခဲ့သည်။

လူငယ် အရည်အသွေး မြှင့်တင်ရာ၌လည်း လူငယ်များကို စေတနာ့ ဝန်ထမ်းသင်တန်း၊ သက်မွေးမှုပညာ သင်တန်းများကို သင်ကြားပေးခဲ့ပြီး ယင်းလူငယ်များသည် ဒေသအသီး သီးရှိ အန်ဂျီအိုလုပ်ငန်းနှင့် အခြား စီးပွားရေးလုပ်ငန်းများတွင် အရည်အချင်းရှိရှိ ဆောင်ရွက်နိုင်မည်ဖြစ် သည်။

၂ဝဝ၈ ခုနှစ် နာဂစ်တိုက်ခတ် စဉ်က ရန်ကုန်တိုင်း၊ ကွမ်းခြံကုန်း၊ ဒေးဒရဲမြို့များနှင့် ဧရာဝတီတိုင်းရှိ အချို့ မြို့နယ်များတွင် အိမ်များ ဆောက်လုပ် လှူဒါန်းပေးနိုင်ခဲ့ကြောင်း၊ အသက်မွေးဝမ်းကျောင်း လုပ်ငန်းများ၊ ရေနှင့် သန့်ရှင်းရေး၊ ကျေးလက် ဖွံ့ဖြိုးရေး၊ အရပ်ဘက် လူ့ဘောင်ဖွံ့ဖြိုးရေး နှင့် အရေးပေါ် တုံ့ပြန်မှုများကို ဆောင် ရွက်လျက် ရှိကြောင်း သိရသည်။

Better Life Organization တွင် ရန်ကုန်ရုံးချုပ်၌ ဝန်ထမ်းအင်အား ၂၆ ယောက်ရှိပြီး ဧရာဝတီရုံးခွဲနှင့် ကျောက်ဖြူရုံးခွဲတို့ရှိ ဝန်ထမ်းများ အပါအဝင် စုစုပေါင်း ၃၉ ယောက် ဖြင့် ဆောင်ရွက်လျက် ရှိကြောင်း၊ ဒေသဖြန့်ကြက်မှု အနေဖြင့် မြန်မာနိုင်ငံ အလယ်ပိုင်း၊ ကရင်ပြည်နယ်၊ ရှမ်းပြည်နယ် တို့တွင် တိုးချဲ့လုပ် ဆောင်ရန် ရှိကြောင်း သိရသည်။

ဝဝ၅

ဆက်စပ်သတင်းများ

အရုဏ်ဦး လူမှုကူညီရေး အသင်း

ရန်ကုန်၊ ဖေဖော်ဝါရီ ၁၇၊ ၂ဝ၁၃
ခရေမိသားစု ဒါနပြုအဖွဲ့

ခရေမိသားစု ဒါနပြုအဖွဲ့

ရန်ကုန်၊ ဇန်နဝါရီ ၂ဝ၊ ၂ဝ၁၃

အမေ့အရိပ် နယ်စည်းမခြား ပညာဒါနကျောင်း

ရန်ကုန်၊ နိုဝင်ဘာ ၁၈၊ ၂ဝ၁၂

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*