ဘာလဲဟဲ့၊ မောင်စွမ်းရည်၊ ငါတို့စာပေ

၂ဝ၁၃၊ ဇန်နဝါရီလ၊ စာမျက်နှာ ၂၁၁၊ တန်ဖိုး ၂ဝဝဝ ကျပ်

မောင်စွမ်းရည်၏ ဘာလဲဟဲ့ စာအုပ်ကို ငါတို့စာပေမှ ပထမအ ကြိမ်ထုတ်ဝေလိုက်သည်။ ပြည်တွင်း တွင် ယခုမှ ပထမအကြိမ်ထုတ်ဝေ ခြင်းဖြစ်သော်လည်း ၂ဝဝ၇ ခုနှစ်က ထိုင်းနိုင်ငံ၊ မဲဆောက်မြို့တွင် တစ်ကြိမ် ထုတ်ဝေခဲ့ ဖူးကြောင်း သိရပြီး ပြည်ပအခြေစိုက် အာဟာရ၊ ပြည်သူ့ အမြင်စာစောင်များနှင့် သစ္စာတော် လှန်ရေးမဂ္ဂဇင်း၊ ဥဒါန်း မဂ္ဂဇင်းတို့တွင် ဖော်ပြခဲ့သော ဆောင်းပါးများလည်း ဖြစ်သည်။

ဘာလဲဟဲ့ နိုင်ငံရေးသမား၊ ဘာလဲဟဲ့ ပါတီနိုင်ငံရေး၊ ဘာလဲဟဲ့ ကွန်မြူနစ်၊ ဘာလဲဟဲ့ ပုဆိန်ရိုး စသည့် ဆောင်းပါးပေါင်း ၃၃ ပုဒ် ပါဝင်ပြီး ၂ဝဝ၄၊ ၂ဝဝ၅၊ ၂ဝဝ၆ ကာလများအတွင်း ရေးသားခဲ့ခြင်းလည်း ဖြစ်သည်။ စာရေးသူ ပြည်ပ ရောက်ရှိနေစဉ် အစောပိုင်းကာလ များအတွင်း ရေးသားခဲ့ခြင်းဖြစ်ပြီး ထိုကာလ အာဏာရှင်စနစ် အောက်မှ မြန်မာ့နိုင်ငံရေး အခင်းအကျင်း၊ အဖြစ်အပျက်များကို ရဲဝံ့စွာတို့ထိ သုံးသပ် ထားခြင်းလည်း ဖြစ်သည်။ အာဏာရှင်အစိုးရ၊ ဒီမိုကရေစီဘက်တော်သား တို့အကြား ဖြစ်ရပ်များ၊ အခြေအနေများ ကိုသာမက ခေတ်စနစ်ဆိုး တစ်ခုအောက်တွင် လွဲချော် မှားယွင်းနေသည့် တိုင်းရင်းသားလူ မျိုးများ အရေး၊ စာနယ်ဇင်း မီဒီယာလောက စသည်များကိုလည်း တို့ထိထားသည်။

အမှန်စင်စစ် ဆိုးရွားသော အုပ်စိုးသူတို့၏ ခေတ်ကာလတစ်ခုကို ဖြတ်သန်းလာခဲ့ကြရသော ပြည်သူ လူထု ကြားတွင် များစွာသော မကျေ နပ်ချက်များ၊ မြိုသိပ်ထားရသည်များ ရှိကြသည်သာဖြစ်သည်။ အခွင့်မသာ၍ ကြောက်ရွံ့ခြင်းမှ လွတ်ကင်းမှု မရသေး၍ စသည်များကြောင့် အသံ တိတ်နေခဲ့ရသော်လည်း လူထုကြား တွင် များစွာသော ဂယက်ပွက်များ ကိုယ်စီရှိနေကြသည်လည်းဖြစ်သည်။ နိုင်ငံရေး၊ စီးပွားရေး၊ လူမှုရေး၊ တိုင်းရင်းသားများ အရေး စသည်ဖြင့် ဖိနှိပ်မှုများနှင့် မကျေနပ်မှုများ နယ်ပယ်စုံရှိကြသည်။ ဤဂယက်ပွက် များသည် မောင်စွမ်းရည်၏ ဘာလဲဟဲ့တွင် ထင်ဟပ်နေပေသည်။

နိုင်ငံရေး၊ လူမှုရေးအကြောင်း အရာများဖြစ်သော်လည်း ကျမ်းကြီး ကျမ်းခိုင်များကဲ့သို့ မဟုတ်ဘဲ သာမန် အရပ်သား အတွေးအခေါ်၊ အရပ်သား တုံ့ပြန်ချက်၊ အရပ်သား စကားလုံးများဖြင့်သာ ရေးသားထားသည်။ သာမန်ပြည်သူ တစ်ဦး၏ တွေးဆပုံ၊ ရှုမြင်ပုံများဖြင့် ပြန်လည်တုံ့ပြန်ရေး သားထားခြင်းဖြစ်သည်။ စာရေးသူ ကိုယ်တိုင် မှာလည်းနိုင်ငံရေး နယ်ပယ် မှမဟုတ်ဘဲ စာရေးသူတစ်ဦးဖြစ် သည့်အတွက် ပြည်သူတို့နှင့်အတူ ဘဝအတွေ့အကြုံအရ မသိမဖြစ်သိ လာရသော ဘဝနိုင်ငံရေးဓာတ်ခံကို သာ အားပြု၍ ရေးသားထားခြင်း ဖြစ်ကြောင်း အမှာစကားဆိုထား သည်။

ယခင်စစ်အစိုးရလက်ထက်က ပေါ်ပေါက်လာခဲ့သော ပါတီနိုင်ငံ ရေးနှင့် အမျိုးသားနိုင်ငံရေးဟူသည့် စကားလုံး နှစ်ခုနှင့် စပ်လျဉ်း၍ ဘာလဲဟဲ့ ပါတီနိုင်ငံရေးဆောင်းပါးတွင် ပြတ်သားစွာ သုံးသပ်ထားသည်။ တိုင်းပြည် အကျိုး ဆောင်ရွက် သည် ဖြစ်သော်လည်း ပါတီနိုင်ငံရေးကို အဆင့်နှိမ့်ထားလိုသည့် အာဏာရှင် တို့၏ သဘောထားကို တုံ့ပြန် ထားသည်။ ဒီမိုကရေစီ နိုင်ငံတော် အတွက် နိုင်ငံရေးပါတီများ ရှင်သန်နေရန် လိုအပ်ကြောင်း ဆိုထားသည်။

ဘာလဲဟဲ့ တရားဥပဒေ ဆောင်းပါးတွင်လည်း အာဏာရှင်ကာလ ဥပဒေမဲ့လုပ်ရပ်များကို ချေပထား သည်။ တရားဝင် ရွေးကောက်ပွဲတစ်ခု၏ အောင်မြင်မှုရလဒ်ပိုင်ရှင်များ ကို မျက်ကွယ်ပြုပြီး စစ်အုပ်ချုပ်ရေး နှင့် ဖိနှိပ် ကန့်သတ်ထားကြပုံများကိုလည်း တစ်ချက်ချင်း ပြန်လည် တုံ့ပြန်ထားသည်။ ဆောင်းပါးရေးသားခဲ့ရာ ကာလ များသည် မြန်မာနိုင်ငံတွင် စစ်အာဏာရှင် အုပ်စိုးဖိနှိပ်မှု အကြမ်းရမ်းဆုံးကာလများဖြစ်သည့် အလျောက် ပြည်သူတို့၏ ခံစားရချက်များမှာလည်း ခါးသီးလှသည်။ သို့နှင့် လျှော်ညီစွာ စွမ်းနိုင်သလောက် အပြင်းထန်ဆုံး၊ အစူးရှဆုံး ပြန်လည် ချေပ ခဲ့ကြသည်များတွင် ဤဘာလဲဟဲ့ ဆောင်းပါးများသည်လည်း တစ်တပ်တစ်အား ဖြစ်ခဲ့သည်။

ပြည်သူ့ဆန္ဒမပါဘဲ အခန့်သား နေရာယူနေကြသော ကိုယ်စားလှယ် ၂၅ ရာခိုင်နှုန်း၊ အငြင်းပွားဖွယ် ပိတ်ဆို့ ကန့်သတ်မှုများ၊ ပုဂ္ဂိုလ်စွဲကိုးကွယ် မှု၊ ဒီမိုကရေစီ ဘက်တော်သား ကွန် မြူနစ်ဟောင်းအချို့၊ ပြည်ပအားကိုး ပုဆိန်ရိုး စသည့် အချက်များတွင်လည်း အာဏာရှင်လက်ကိုင်တုတ် မီဒီယာ များကို ပြန်လည်ချေပထားသည်။ အထူးသဖြင့် ဘာလဲဟဲ့ မီဒီယာ အသစ်နှင့် ဘာလဲဟဲ့သတင်းသမား ဆောင်းပါးတို့တွင် မီဒီယာသမားတို့ သတိပြုဖွယ် ဘက်လိုက်ရေး အကြောင်း ရှင်းလင်းထားသည်။ အစဉ်အလာ သုံးစွဲလာခဲ့သော ဘက်မလိုက်ရေး သည် အမြဲတစေအမှန်တရားမဟုတ် ဘဲ မတရားသည်ကို လျစ်လျူရှု၍ ဘက်မလိုက်ဘဲနေပါက မတရားသည့် ဘက်မှ ဘက်လိုက်ခြင်းဖြစ်သည် ဟူသော အယူအဆကို လက်ခံကြို ဆိုဖွယ်တင်ပြထား သည်။ ထိုစဉ် ပြန် ကြားရေး စာစောင်တို့၏ မတရားသည့် ဘက်မှ ဘက်လိုက်ခြင်း ကို ချေပခြင်း ဖြစ်သည်။

အခြား သတိပြုဖွယ်မှာ ၂ဝဝ၃ ခုနှစ် က မြို့တော်ခန်းမ ရှေ့တွင် တစ်ကိုယ်တော် ဆန္ဒပြခဲ့သူ စိုက်ပျိုးရေး တက္ကသိုလ် ပါမောက္ခချုပ်ဟောင်း ဆလိုင်း ထွန်းသန်း အကြောင်း ရေးသားထားသည့် ဘာလဲဟဲ့ အဘခေါ်သံ ဆောင်းပါး ဖြစ်သည်။ ဒီမိုကရေစီ ရေးအတွက် ကြီးငယ်မဟူ တာဝန် သိကြစေကြောင်း ရည်ရွယ်ထား သည်။ ပြည်သူတစ်ဦး၏ ခံစားချက်၊ တုံ့ပြန်ချက်များဟု ဆိုရမည်ဖြစ် သော ဘာလဲဟဲ့မှ ဆောင်းပါးတိုင်း သည် အာဏာရှင်အစိုးရတစ်ခု အား သမား ရိုးကျတွေးခေါ် ဆင်ခြင်ရုံ နှင့်ပင် ယုံကြည်ဖွယ်မရှိ ကြောင်း ထိထိရှရှ ချေပထားချက်များဖြစ် သည်။ တစ်ချိန်ကလေလှိုင်း ကြားမှ နှစ်သက်ခဲ့ရသော ဆောင်းပါးများ ကို စာပေမြတ်နိုးသူတို့နှင့် မောင်စွမ်း ရည်၏ပရိသတ်တို့ စာအုပ်စင်တွင် ထားရှိဖတ်ရှုနိုင်ပြီ ဖြစ်သည်။

ဆိုရသော် ဘာလဲဟဲ့ ဆောင်းပါး များသည် လက်ကိုင်တုတ် မီဒီယာများ အပေါ် အချက်ကျကျ တုံ့ပြန်သရော် ထားခြင်း ဟု ဆိုနိုင်သည်။

“ဒီတစ်ခါမှာ တရားတဲ့ဘက်နဲ့ မတရားတဲ့ဘက် ဘယ်ဘက် လိုက်မလဲ။ ကြားနေတယ် ဆိုတာလည်း ဘက်လိုက်တာပဲ။

မတရားမှန်း သိရက်နဲ့ ကြားနေပြီး ဝင်းထရံပေါ် ခွထိုင်တယ် ဆိုတာ မတရားတဲ့ ဘက်လိုက်တာပဲပေါ့”

(စာ-၁၅၃)

ဝဏ္ဏလင်း

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*