-ထက်ဝေယံစာပေ၊ ၂ဝ၁၂ ခုနှစ်၊ ဒီဇင်ဘာလ၊ တန်ဖိုး ၃ဝဝဝ ကျပ်၊ စာမျက်နှာ ၁၈ဝ

The Voice Weekly နှင့် The Messenger Journal တို့တွင် နိုင်ငံရေး လေ့လာချက် ဆောင်းပါးများ ရေးသား နေသော ဆရာနေသန်မောင်၏ မြန်မာနိုင်ငံ၏ ပထဝီနိုင်ငံရေး လေ့လာသုံးသပ်ချက် စာအုပ်တစ်အုပ် ဖြစ်ပြီး ထက်ဝေယံ စာပေမှ ပထမ အကြိမ် ထုတ်ဝေလိုက်သည်။ ဂျာ နယ်များတွင် ရေးသားခဲ့သည့် အခြားဆောင်းပါး များအတိုင်း မြန်မာ့ဒီမိုရေစီ အပြောင်းအလဲများအပေါ် သုံးသပ်ထားခြင်းဖြစ်သော်လည်း နိုင်ငံရေး အယူအဆ များထက် ပွင့်လင်းလာသည့် အချိန်ကာလ အလျောက် မြန်မာနိုင်ငံ၏ ပထဝီအနေအထား အရ အနာဂတ် အရေးပါမှုများကို အခြေတည် သုံးသပ်ထားခြင်းလည်း ဖြစ်သည်။

စာအုပ်ကို အပိုင်း ၃ ပိုင်း ခွဲထားပြီး အပိုင်း ၁ တွင် တရုတ် အဖျား၊ အိန္ဒိယတရွတ်ဆွဲမှု၊ တရုတ် စူးအက် တူးမြောင်း၊ အန်ကယ်ဆမ် နှင့် တစ်ညနေ လူလည်အာရှသား စသည့် စိတ်ဝင်စားဖွယ်ခေါင်းစဉ် များခွဲ၍ တင်ဆက်ထားပြီး အပိုင်း ၂ တွင်မူ မဟာတံတိုင်းပေါ်က နဂါး ကြီး၊ အတောင်ဖြန့်သော သိမ်းငှက်၊ အရှေ့မျှော် ဘောလီးဝုဒ်၊ ဒေါ်လာကို ရာဇဝင်ထဲမှာ ထားခဲ့ပါ စသည့် ခေါင်းစဉ်များဖြင့် တင်ဆက်ထားသည်။ နိဂုံး သုံးသပ်ချက်ကိုမူ ၂ဝ၁၂-၂ဝ၁၃ မြန်မာလုပ်ဆောင်ရ မည့် အချက်များ ခေါင်းစဉ်ဖြင့် သုံး သပ်တင်ပြထားသည်။

မြန်မာ့ဒီမိုကရေစီ အသွင်ပြောင်း လဲရေးကာလတွင် ထည့်သွင်း ဆင်ခြင်ဖွယ်ဖြစ်သော ပထဝီနိုင်ငံရေး ဆိုင်ရာ ရှုထောင့်မှ အဓိက ဦးတည် ထားသည့်အတိုင်း ကမ္ဘာ့ရေးရာ မြင်ကွင်းတွင် ရှေ့တန်း ရောက်လာသော အရှေ့တောင် အာရှနိုင်ငံများ နှင့် တရုတ်နိုင်ငံ၏ တစ်စိတ်တစ် ပိုင်းဦးဆောင်သူဖြစ်လာသော အခြေ အနေကို အလေးပေးထားသည်။ ထို နှင့်ဆက်စပ်၍ အမေရိကန်ပြည်ထောင် စု၏ အရှေ့ဖျားနိုင်ငံများအပေါ် သဘောထား၊ တရုတ်နှင့် အင်အား  ချိန်ခွင်လျှာညှိလိုခြင်း၊ အရှေ့တောင် အာရှ၏ အဓိကတံခါးဝအချက်အချာ  ကျနေသော မြန်မာနိုင်ငံ၏ အရေးပါမှုများကိုလည်း သုံးသပ်ထားသည်။

တရုတ်နိုင်ငံ၏ အရေးပါလာမှု ကို စိုးရိမ်တကြီးစောင့်ကြည့်နေကြ သော ကမ္ဘာ့နိုင်ငံများ၊ တရုတ်နိုင်ငံနှင့် နယ်နိမိတ် ထိစပ်နေပြီး ပြိုင်ဆိုင် မှုပြင်းထန်လာသော အိန္ဒိယနိုင်ငံ၊ အာဆီယံတွင် ပတ်သက်စိုးမိုးလာ နိုင်သော တရုတ်နိုင်ငံ၏ ဝါဒရေး ရာများကို အပိုင်း ၁ တွင် တွေ့ရ မည်ဖြစ်သည်။ အထူးသဖြင့် အချက်  အချာကျသော မြန်မာနိုင်ငံနှင့် အိမ် နီးချင်းနိုင်ငံများ နိုင်ငံရေး၊ စီးပွားရေး၊ ဒေသရေး ဆက်စပ်နေမှုများ မှ ထိုနိုင်ငံများ၏ မျက်စိကျ လာခြင်းကို ထည့်သွင်း သုံးသပ်ထားသည်မှာ ဆင်ခြင်ဖွယ် ဖြစ်သည်။ တစ်ချိန်က ကမ္ဘာ့အင်အားကြီး နိုင်ငံတစ်ခုအဖြစ် ရပ်တည်ကာ ဩဇာလွှမ်းမိုးနိုင်ခဲ့သူ အမေရိကန်၏ ကံကြမ္မာအလှည့် အပြောင်းတစ်ခုအတွင်း ဣနြေ္ဒဆည် နိုင်ရန် ရုန်းကန်နေရပုံ၊ နိုင်ငံရေး၊ စီးပွားရေးချိန်ခွင်လျှာညှိရန် လက်ဦး မှု ယူလာခြင်းများကိုလည်း တွေ့ မြင်ရမည်ဖြစ်သည်။

တစ်ချိန်က ကမ္ဘာ့မြင်ကွင်းတွင် အနှိမ်ခံ၊ အပယ်ခံဖြစ်ခဲ့ရသော်လည်း ပင်ကိုသဘာဝအရ စွဲမက်ဖွယ် မြန်မာနိုင်ငံ ကို လျစ်လျူမရှု နိုင်ကြတော့သည့် ကမ္ဘာ့နိုင်ငံများ၏ ဝါဒရေးရာ ပြောင်းလဲလာသည်လည်း ဖြစ်သည်။ အရပ်သား အစိုးရအသွင်ယူအပြီး အမေရိကန်နိုင်ငံခြားရေး ဝန်ကြီး ဟီလာရီကလင်တန်နှင့် သမ္မတ ဦးသိန်းစိန် တို့၏ ခရီးစဉ်များ၊ ဒီမိုကရေစီ ခေါင်းဆောင် ဒေါ်အောင်ဆန်းစုကြည်၏ အမေရိကန်နှင့်တကွ ကမ္ဘာ့ခရီးစဉ်တို့၏ ဇစ်မြစ်၊ ကန့်သတ်ပိတ်ဆို့မှုများ လျှော့ချလိုက်ရသော မူဝါဒ အပြောင်းအလဲ၏ နောက်ကြောင်းကိုလည်း  ဤစာအုပ်မှ သုံးသပ်ထားသည်။ မြန်မာနိုင်ငံ၏ အရေးပါမှုအပေါ် တရုတ်နှင့် အာဆီယံနိုင်ငံများ၏ အာရုံ အလှည့် အပြောင်းသည်လည်း စိတ်ဝင်စားဖွယ် ဖြစ်သည်။

အပိုင်း ၂ တွင်မူ တရုတ်နိုင်ငံ ၏ မူဝါဒရေးရာနှင့် အမေရိကန်၊ တရုတ်အားပြိုင်မှုများကို အဓိက တင်ဆက်ထား သည်။ အထူးသဖြင့် တရုတ်၏ အရှေ့ဖျားပိုင်နက် ပြဿနာများ၊ အမေရိကန်ဩဇာကို အံတုလာမှုများသည် အရှေ့အလယ်ပိုင်း မှ အာရုံညောင်း၊ သတိလည်လာသော အမေရိကန်တို့၏ နိုင်ငံရေး ပေါ်လစီနှင့် ထိပ်တိုက် တိုးကြခြင်း၊ အရှေ့တောင် အာရှနိုင်ငံများ၏ ရုတ်တရက် ရှေ့တန်းရောက်လာခြင်းနှင့် သွေးအေးသွားကြခြင်း သည် အမေရိကန်၏ တစ်ချိန်က တင်းမာသော သဘောထားကြောင့် ဖြစ်ကြောင်းလည်း သုံးသပ်ထားသည်။ အမေရိကန်သည် သမ္မတ အိုဘားမား လက်ထက် ပျော့ပြောင်းလာသော သဘော ထားနှင့် ကမ္ဘာ အလှည့် အပြောင်းကို နားလည်သွားဟန်လည်း တူသည်။ လက်ရှိကာလ သမ္မတ အိုဘားမား၏ မြန်မာနိုင်ငံ ခရီးစဉ် ပူပူနွေးနွေးသည်လည်း ဤရှုမြင်ချက်များနှင့် သက်ဆိုင်သည်မှာ သေချာသည်။

ရှောင်လွှဲ၍ မရသော အိမ်နီးချင်းများနှင့် ဆက်ဆံရေးနှင့် ရပ်ဝေး မိတ်ဆွေသစ်တစ်ဦးနှင့် ဆက်ဆံရေး အခြေအနေများသည် မြန်မာနိုင်ငံ အတွက် အထူးသတိပြု ရပ်တည်ရမည့် အချက်ဟုလည်း စာရေးသူက ရဲဝံ့စွာ သုံးသပ်ထားသည်။ မျက်စိကျဖွယ် နိုင်ငံတစ်နိုင်ငံ၏ ရပ်တည်ချက် တိမ်းစောင်းသွားပါက ကြုံလာနိုင်သည့် ထည့်သွင်း စဉ်းစားဖွယ်များ ကိုလည်း စာရေးသူက တင်ပြခဲ့သည်။ အမေရိကန်၏ အာဆီယံ ဝင်ပေါက်နှင့် တရုတ်၏ အိန္ဒိယ သမုဒ္ဒရာ ထွက်ပေါက်တစ်ခု၏ မှန်ကန်သော ရပ်တည်ချက်မှ တစ်ဆင့် နိုင်ငံ၏ အကျိုးစီးပွား၊ ဩဇာ သက်ရောက်မှုတို့ကို မည်မျှစွမ်းဆောင်နိုင်မည် ဆိုသည်ကို ဤစာအုပ်မှ မေးခွန်း ထုတ်ထားသည်။ အိမ်နီးချင်း အင်အားကြီးများနှင့် မြန်မာနိုင်ငံ၏ ဆက်နွယ်မှုများကို သုံးသပ်ထား သော်လည်း အင်အား သေးငယ်သော နိုင်ငံများ၏ အခန်းကဏ္ဍကိုမူ လျှော့ပေါ့ထားသည်ဟု သတိပြုမိသည်။ အဓိကအားဖြင့် ဘင်္ဂလားဒေ့ရှ် နိုင်ငံ၏ ကဏ္ဍဖြစ်သည်။ လတ်တလော လူမျိုးရေးပြဿနာများနှင့် အနီးဆုံး ရေပြင်ပိုင်နက် ထိစပ်နေခြင်း ကိုလည်း သတိပြုရမည်ဟု ယူဆသည်။ ဤ မလွယ်ပေါက်၏ လက်ဦးမှုသည် လည်း မှန်ကန် တည်ငြိမ်စွာ ရပ်တည်နိုင်ရန် ကြိုးစားရမည့် မြန်မာနိုင်ငံ အတွက် တစ်ဖက်ဘက်မှ မဲတင်း သွားစေနိုင်သော ကြောင့်ဖြစ်သည်။ စာအုပ်၏ အပိုင်း ၃ တွင်လည်း ပထဝီနိုင်ငံရေးမှအပ အခြားအသွင် ကူးပြောင်းရေး ကာလ ဆိုင်ရာ သုံးသပ်ချက် ဆောင်းပါး ၇ ပုဒ်ကို ပေါင်းစည်း တင်ပြထားသည်။

ဆိုရသော် ဤစာအုပ်သည် အကူးအပြောင်းကာလရှိ ပြည်သူလူထုအတွက် မျှော်လင့်ချက် မှန်းဆမှုများ ပေးလိုခြင်း မဟုတ်ဘဲ ဆင်ခြင်တွေးဆ အားထုတ်ဖွယ်ရာများ ကိုသာ ယူဆောင်လာသည့် စာအုပ်ဟုဆိုချင် သည်။ အရိုးစွဲ ခေါင်းဆောင်အာဏာ အခြေပြုစနစ်မှ အမျှော်အမြင်ရှိသည့် ဥာဏ်ပညာ ဦးဆောင်သော နိုင်ငံရေး စနစ်တစ်ခုဆီသို့ ဦးတည်မောင်းနှင် ထားသည့် စာအုပ်ဟုလည်း ဆိုနိုင်သည်။ အသိပညာနှင့် ယှဉ်၍ တိုင်းပြည်ကို ချစ်သောသူများ ပေါ်ထွန်းလာစေရန် ရည်ရွယ်ဟန် တူသည်။

နိုင်ငံရေးစာပေ လေ့လာသူများနှင့် စိတ်ဝင်စားသူတို့၏ စာအုပ်စင်တွင် ထားရှိလေ့လာသင့်သည့် စာအုပ် ကောင်းတစ်အုပ် ဖြစ်သည်ကား သေချာသည်။ အထူးသဖြင့် လက်သီးလက်မောင်းတန်း နိုင်ငံရေးလေ့လာ သူများအတွက် ပိုမို ရည်ညွှန်းလိုက်ရပါသည်။

“တရုတ်နှင့် အတူတကွ ချမ်းသာ၊ အတူတကွ ပျော်ရွှင်စွာခံစား၊ ဒေသတွင်း လုံခြုံရေးနှင့် ကာကွယ်ရေး အတွက် တရုတ်တို့ တာဝန်ယူပေးမည် စသည့် အာရှအိပ်မက်ဖြစ်သည်။ ထိုအိပ်မက်တွင် အနောက်တိုင်းသား တို့မပါ။ အနောက်တိုင်းသား တို့ကို အားကိုးသူများကို တရုတ်နဂါးကြီး အကြောင်းပြမည်။”   (စာ-၉၉)

ဝဏ္ဏလင်း

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*