အုတ်တစ်ချပ်သဲတစ်ပွင့် — ဖေဖော်ဝါရီ ၂၄ ၊၂ဝ၁၃

နိုင်ငံ တစ်နိုင်ငံ၊ မိသားစု တစ်ခုကို ခိုင်ခံ့ကောင်းမွန်အောင် တည်ဆောက်မည် ဆိုပါက ပညာဉာဏ် ထက်မြက်ဖို့ လိုအပ်ပေသည်။ ထို့ကြောင့် ပညာရေးကဏ္ဍသည် မရှိမဖြစ် အရေးပါသည်။ ယင်းကဲ့သို့ ဆင်းရဲချမ်းသာ၊ လူတန်းစား မရွေး ကလေးငယ်များကို စာပေတတ် မြောက်စေရန် ပညာဒါနသင်ကြားပေး နေသော ဧရာဝတီတိုင်း ဒေသကြီး၊ ဘိုကလေး မြို့နယ်၊ ရုပ်ဆိုင်ကျေးရွာ ဘုန်းတော်ကြီးသင် ပရိဟိတ ကျောင်းကို ယခုတစ်ပတ် အုတ်တစ်ချပ် သဲတစ်ပွင့် ကဏ္ဍ တွင် ဖော်ပြပါသည်။

ရုပ်ဆိုင်ကျေးရွာ ဘုန်းတော်ကြီးသင် ပညာရေးကျောင်းကို ရတနာ မဉ္ဇူဘုန်းကြီးကျောင်း ကျောင်းထိုင် ဆရာတော် အဂ္ဂမဟာ သဒ္ဓမ္မဇောတိက  ဓဇဘဒ္ဒန္တမဉ္ဇူသာရက ဦးစီး၍ ရပ်ရွာ အကျိုးဆောင်များနှင့်ပူးပေါင်း၍ ၁.၆.၁၉၇၂ ခုနှစ်မှ စတင်တည် ထောင်ခဲ့ပြီး ယနေ့အချိန်ထိ နှစ်ပေါင်း ၄ဝ ခန့်ရှိပြီဖြစ်ကြောင်း သိရသည်။

ဘုန်းတော်ကြီးသင် ပညာရေး ကျောင်းသည် မူလတန်းမှ အထက်တန်း အထိ ကျောင်းသားပေါင်းများ စွာကို နှစ်စဉ် နှစ် တိုင်း မွေးထုတ်ပေးလျက် ရှိပြီး ၂ဝ၁၁ မှ ၂ဝ၁၂ ထိ ပညာသင် ကျောင်းသား၊ ကျောင်းသူပေါင်း ၆၁၄ ယောက်ကို ဆရာ၊ ဆရာမ ၁၉ ယောက်တို့ဖြင့် ပညာ သင်ကြားပေးလျက်ရှိသည်။

မူလတန်းကျောင်းကို ယခင်က ရုပ်ဆိုင်ကျေးရွာတွင် အထက်တန်း ကျောင်းနှင့်အတူ ဖွင့်လှစ်ထားခဲ့သော် လည်း ကလေးများ သွားလာရေး ခက်ခဲသဖြင့်၂ဝ၁ဝ ခုနှစ်မှ စတင်ကာ ဘိုကလေးမြို့နယ်၊ မွှေးတုံရေဆိုင်ကြီး ကျေးရွာ ပင်လယ်ပြာပိုင်း၌ သွားရောက် ဖွင့်လှစ်သင်ကြားပေးကြောင်း၊ ယောက်ျားလေး ကျောင်းသားများနှင့် မိန်းကလေးကျောင်း သူများကို အဆောင်ခွဲ၍ သင်ကြားကြောင်း၊ အလယ်တန်းကျောင်းကို section သဘော သင်ပေးပြီး အထက်တန်းကို တွဲဖက် အ.ထ.က အနေဖြင့် ဖွင့်လှစ် သင်ကြားပေးနေကြောင်းကို ဆရာတော် ဦးမဉ္ဇူသာရက ပြောသည်။

ယင်းမှ ဆက်လက်၍ ပညာဒါန ကျောင်း ဖွင့်လှစ်၍ စာသင်ပေးခြင်း၏ ရည်ရွယ်ချက်ကို “တောသူတောင်သား ဆိုတာ အမေမိဘက ဆင်းရဲတယ်။ ကလေးက ပညာ သင်ယူတဲ့ အချိန်မှာ မိဘက ဆင်းရဲနေတော့ ပညာ မသင်နိုင် ဖြစ်ကြတယ်။ အဲဒီ အတွက်ကြောင့် ဘုန်းဘုန်းတို့က ဒီကလေးတွေကို ပညာရအောင် သင်ပေးတယ်။ ပညာရလာလို့ ရှိရင် မြန်မာနိုင်ငံ အတွက် တစ်တပ်တစ်အား ဖြစ်ဖြစ် ပညာတတ်ကလေးတွေ ပေါ်လာမယ်။ အဲဒီလိုဖြစ်ရင် သူတို့ဘဝလေး တွေကို သူ့တို့ဟာ သူတို့ ထိန်းသွားနိုင် တဲ့အခါကြတော့ မြန်မာနိုင်ငံမှာ တစ်ယောက် ကောင်းစားရင် တစ်ယောက် အေးချမ်း သာယာမှု ရှိမယ် ဆိုတဲ့ သဘောနဲ့ ဘုန်းဘုန်းက ပံ့ပိုးပေးတာပါ”ဟု မိန့်ကြားသည်။

ရုပ်ဆိုင်ကျေးရွာ ဘုန်းတော်ကြီးသင် ပရဟိတပညာရေးကျောင်းတွင် မိဘမရှိ၍ ဆင်းရဲသော မိဘမဲ့ကလေး ၁၁၁ ယောက်နှင့် မိဘ ရှိသော်လည်း ကျောင်းမလာနိုင်သည့် ကလေး ၁၉၉ ယောက်တို့ကို လက်ခံကူညီပေး လျက် ရှိပြီး အိမ်မှနေ၍ ကျောင်းတက်နေ သောကျောင်းသား၊ ကျောင်းသူ ၃ဝ၄ ယောက် တို့ကိုလည်း ပညာ သင်ပေး ကြောင်း သိရသည်။

ကျောင်းတစ်ကျောင်းလုံးရှိ ကလေးငယ်များ၏ ပညာသင်ကြားရေးနှင့် စားဝတ်နေရေးတို့ကို ကျောင်းထိုင် ဆရာတော်နှင့် ရပ်ရွာအလှူရှင်များ တာဝန်ယူကာ ဒါနပြုလျက် ရှိကြောင်း၊ ပညာသင် ကလေးငယ်များ ညအချိန် စာကျက်နိုင်ရန် ညနေ ၆ နာရီမှ ည ၁၁ နာရီအထိ မီးစက်မောင်း၍ ကလေးငယ်များ၏ ပညာရေးကို အထောက်အပံ့ ပေးနေပါသည်။

သို့ဖြစ်ပါ၍ ယင်းပရဟိတ ဘုန်းတော်ကြီးသင် ပညာရေးကျောင်းသည် နှစ်ပေါင်းများစွာ ပညာရေးကဏ္ဍကို ဆောင်ရွက်ခဲ့ရာ ၌ ကိုယ်ထူကိုယ်ထ စနစ်ဖြင့် အနီး ပတ်ဝန်းကျင်မှ လှူဒါန်း ငွေများအပေါ် ရပ်တည်နေရပြီး လစဉ် ကျောင်းဆရာ၊ ဆရာမများကို လစာ ငွေပေးငှားရသည့် ကုန်ကျ စရိတ်၊ ကျောင်းအိပ် ကျောင်း စား၊ ကျောင်းသား၊ ကျောင်းသူများ၏ စားဝတ်နေရေးနှင့် ပညာရေးဆိုင်ရာ စာရွက်စာတမ်း အထောက်အပံ့ လိုအပ်ချက်များ ရှိနေ သဖြင့် ပညာရေးကဏ္ဍတွင် ဒါနပြုလို သောသူများနှင့် အမှန်တကယ် လိုအပ်ချက် ရှိသော နေရာတွင် လှူဒါန်းရန် စိတ်ပါဝင်စားသူ များသည် ဧရာဝတီ တိုင်း၊ ဘိုကလေးမြို့နယ်၊ ရုပ်ဆိုင်ကျေးရွာ၊ ရတနာမဉ္ဇူ ဘုန်းတော်ကြီးသင် ပညာရေး ပရဟိတကျောင်း ဖုန်း-ဝ၉-၄၉၃၁ဝ၄၃၉ ဆရာတော် ဦးမဉ္ဇူသာရ ထံသို့ ဆက်သွယ်နိုင်ပါသည်။

ဆက်လက်၍ ဆရာတော်တို့ ကျောင်းမှ ဧရာဝတီတိုင်း၊ ဘိုကလေး မြို့နယ် မရဲ့ရွာသစ်ကျေးရွာ အဝင်မရဲ့ ချောင်း အဝတွင် ရွာဦးထိပ်ကွက်လပ်၌ ဂုဏ်ရွှေစည်းခုံစေတီ တည်၍ ဘိုးဘွားရိပ်သာ ဆောက်မည့် အကြောင်း ကို ဆရာတော် ဦးမဉ္ဇူသာရ က ဖြည့်စွက် ပြောကြားသည်။

ဝဝ၅

ဆက်စပ်သတင်းများ

အရုဏ်ဦး လူမှုကူညီရေး အသင်း

ရန်ကုန်၊ ဖေဖော်ဝါရီ ၁၇၊ ၂ဝ၁၃
ခရေမိသားစု ဒါနပြုအဖွဲ့

ခရေမိသားစု ဒါနပြုအဖွဲ့

ရန်ကုန်၊ ဇန်နဝါရီ ၂ဝ၊ ၂ဝ၁၃

ဘဝမြင့်မိုရ်

ရန်ကုန်၊ ဒီဇင်ဘာ ၂၂၊ ၂ဝ၁၂

အမေ့အရိပ် နယ်စည်းမခြား ပညာဒါနကျောင်း

ရန်ကုန်၊ နိုဝင်ဘာ ၁၈၊ ၂ဝ၁၂

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*