ဆောင်းပါး — မတ် ၈၊ ၂ဝ၁၃

နိုင်ငံတော်ကို ထိပါးပြောဆိုကာ၊ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီကို ထိခိုက်ပြောဆိုပြီး ဟောပြော သည်ဟု လျှောက်ထားသူက စွပ်စွဲထားသောသူမှာ လမ်းပြကြယ် ဦးအေးမြင့်ဖြစ်ကြောင်းတွေ့ရှိရသည်။ ဒေါက်တာ မြတ် ဥာဏစိုးနှင့် ဦးအေးမြင့်တို့သည် မဲဆွယ်စည်းရုံးကြစဉ် အတွင်း တိုက်ဆိုင်ပြီး ခဏတာ ကြုံကြိုက်ကြခြင်း သာ ဖြစ်ကြောင်းကို လက်ခံဖွယ်ရှိသည်။ မင်္ဂလာတောင်ညွန့် မြို့နယ်တွင် ဦးမြတ်သူ (ခ) ဦးကျော်ဇင်ညွန့်က ဆန္ဒမဲ အများဆုံး ရရှိပြီး တာမွေမြို့နယ် တွင် ဒေါက်တာ မြတ်ဥာဏစိုးက ဆန္ဒမဲအများဆုံး ရရှိကြောင်း လျှောက်ထားသူ၏ ကန့်ကွက်လွှာအပိုဒ်(၂)တွင် ဖော် ပြထားသည်။ ယင်းအခြေအနေ တွင် တရားမဲ့ ပြုကျင့်မှုကြောင့် ရှုံးနိမ့်ရသည် ဟု ကောက်ယူရန် ခဲယဉ်းသည်။ ဦးအေးမြင့်၏ ဟောပြော မဲဆွယ်မှုကြောင့် လျှောက်ထားသူ ရသင့်သော ဆန္ဒမဲများ မရဟု ဆိုခြင်းမှာ မျှော်မှန်း မှန်းဆချက် သာဖြစ်၍ သေချာရေရာသော သက်သေခံချက် မဟုတ်ပေ။ ဦးမြတ်သူ (ခ) ဦးကျော်ဇင်ညွန့်နှင့် ဒေါက်တာ မြတ်ဥာဏစိုး အမှု (၂ဝ၁၁-ခုနှစ် ပြင်ဆင်မှု အမှတ်-၁)

လာမည့်နှစ် ကာလများအတွင်း၊ ဖွဲ့စည်းပုံ အခြေခံဥပဒေ ပုဒ်မ-၄၁၇ အရ၊ အရေးပေါ် အခြေအနေ ကြေညာရန် အကြောင်း တစ်စုံတစ်ရာပေါ် ပေါက်ခြင်းမရှိပါက ကျွန်တော်တို့ သည် ၂ဝ၁၅ ခုနှစ်တွင် လွှတ်တော် အဆင့်ဆင့် ရွေးကောက်ပွဲများကို မျက်ဝါးထင်ထင် တွေ့မြင်ရဦးမည် ဖြစ်သည်။ ကာလအတန်ကြာ မေ့လျော့ ထားခဲ့သည့် ရွေးကောက်ပွဲ ဥပဒေ၊ နည်းဥပဒေ(စာအုပ်)များကို ဖုန်ခါ လျက်၊ ရွေးကောက်ပွဲဆိုင်ရာ အမှုအခင်းများကို ပြန်လည်၍ အာရုံဝင်စား ရဦးမည်ဖြစ် သည်။

ပြည်သူ့လွှတ်တော်၊ အမျိုးသား လွှတ်တော်နှင့် ပြည်နယ်တိုင်း ဒေသကြီး လွှတ်တော် ရွေးကောက်ပွဲဥပဒေ သုံးမျိုး ရှိရာ အခန်း(၁၃)တွင် ရွေး ကောက်ပွဲဆိုင်ရာပြစ်မှု (Offences) များကိုဖော်ပြထားပြီး၊ အခန်း (၁၄) တွင် တရားမဲ့ ပြုကျင့်မှုများ (Malpractices) များကို ဖော်ပြထားသည်။

ရွေးကောက်ပွဲဆိုင်ရာပြစ်မှုများ ကိုကျူးလွန်ပါက သက်ဆိုင်ရာတရား ရုံးက စစ်ဆေးစီရင်ပိုင်ခွင့်ရှိပြီး တရားမဲ့ ပြုကျင့်မှုကို ကျူးလွန်ပါက ရွေး ကောက်ပွဲကော်မရှင်က ဖွဲ့စည်းပေးသည့် ရွေးကောက်ပွဲခုံအဖွဲ့ကသာလျှင် စစ်ဆေး စီရင်ပိုင်ခွင့် ရှိသည်။ ပြစ်မှု (Offences) ကျူးလွန်ကြောင်း တရားရုံး၏ စီရင်ဆုံးဖြတ်ခြင်းကို ခံရပါက ထောင်ဒဏ် (သို့မဟုတ်) ငွေဒဏ် ချမှတ်ခံရနိုင်သည်။ တရားမဲ့ပြုကျင့်မှု (Malpractices) ကို ကျူးလွန်ကြောင်း ရွေးကောက်ပွဲ ခုံအဖွဲ့၏ စီရင်ဆုံးဖြတ်ခြင်း ခံရပါက လွှတ်တော် ကိုယ်စားလှယ်လောင်း အဖြစ် ရွေးကောက်တင် မြှောက်ခံခဲ့ရခြင်းမှ ပျက်ပြယ်မည် ဖြစ်သည်။

တစ်ဦးထက် ပိုသော ကိုယ်စားလှယ်တို့ ယှဉ်ပြိုင်အရွေးခံရာတွင် ရှုံးနိမ့်ခဲ့သော ကိုယ်စားလှယ်က “ရွေးကောက် တင်မြှောက် ခံရသူရှိသော မဲများတွင် တရားမဲ့ပြုကျင့် မှုကြောင့်ရရှိသော မဲများ မပါရှိခဲ့သော်  မိမိသာလျှင် ခိုင်လုံသောမဲ အများဆုံး ရရှိနိုင်ကြောင်း” ကန့်ကွက်လွှာ တင်သွင်းရာ မှ ရွေးကောက်ပွဲဆိုင်ရာ အငြင်းပွားမှု  ပေါ်ပေါက် လာခြင်း ဖြစ်သည်။

တရားမဲ့ပြုကျင့်မှုကို လွှတ်တော် ကိုယ်စားလှယ်လောင်းက သော်လည်းကောင်း၊ ယင်း၏ ရွေးကောက်ပွဲ ကိုယ်စားလှယ် ကသော်လည်းကောင်း၊ ပြုလုပ် ကျူးလွန်ကြောင်း  အထင်အရှား ပေါ်ပေါက်မှသာလျှင်  ရွေးကောက် တင်မြှောက် ခံထားရခြင်းမှ ပျက်ပြယ်ကြောင်း ကြေညာခြင်း ခံရမည် ဖြစ်သည်။

ဦးမြတ်သူ(ခ)ဦးကျော်ဇင်ညွန့် နှင့်ဒေါက်တာမြတ်ဥာဏစိုး အမှုတွင် ပြည်ထောင်စုကြံ့ခိုင်ရေးနှင့် ဖွံ့ဖြိုး ရေးပါတီမှ ဦးမြတ်သူ(ခ) ဦးကျော်ဇင်ညွန့်၊ အမျိုးသား ဒီမိုကရေစီ အင်အားစု ပါတီမှ ဒေါက်တာ မြတ်ဥာဏစိုး၊ ဒီမိုကရက်တစ် ပါတီ (မြန်မာ)မှ ဦးတင့်နိုင်နှင့် တိုင်းရင်းသားစည်းလုံး ညီညွတ်ရေးပါတီမှ ဦးသီဟမင်းအောင် တို့ ၄ ဦးသည် ရန်ကုန်တိုင်းဒေသ ကြီး အမျိုးသားလွှတ်တော်မဲဆန္ဒနယ် အမှတ်(၄)၌ ဝင်ရောက် ယှဉ်ပြိုင်အရွေး ခံခဲ့ကြရာမှ ခိုင်လုံမဲ အများဆုံး ရှိသည့် ဒေါက်တာ မြတ်ဥာဏစိုး အပေါ် လျှောက်ထားသူ ဦးမြတ်သူ (ခ) ဦးကျော်ဇင်ညွန့်က ကန့်ကွက်လွှာ တင်သွင်းခဲ့ခြင်း ဖြစ်သည်။

ရွေးကောက်ပွဲခုံအဖွဲ့(၄)က ကန့်ကွက်လွှာကိုပယ်ခဲ့ပြီးနောက်၊ လျှောက်ထားသူက မကျေနပ်၍ ထပ်မံတင်သွင်း သည့် ပြင်ဆင်မှုတွင် ရွေးကောက် တင်မြှောက်ခံရသော လွှတ်တော် ကိုယ်စားလှယ်၏ ရွေးကောက်ပွဲ ကိုယ်စားလှယ် မဟုတ်သော အခြား ပုဂ္ဂိုလ် တစ်ဦးဦး၏ ပယောဂကြောင့် တရားမဲ့ပြုကျင့်မှုတစ်ခုခုဖြစ်ပေါ်ခဲ့ပြီး ထိုတရားမဲ့ပြုကျင့်မှုကို လွှတ်တော် ကိုယ်စားလှယ်လောင်းနှင့်ယင်း၏ ရွေး ကောက်ပွဲ ကိုယ်စားလှယ်တို့၏ သဘောတူ ခွင့်ပြုချက် မရှိဘဲ ကျူးလွန်ခဲ့ခြင်း ဖြစ်လျှင် ရွေးကောက်တင်မြှောက်ခြင်း မပျက်ပြယ်ကြောင်း ပုဒ်မ- ၇၃(က) ကို ကိုးကား၍ ဆုံးဖြတ်ခဲ့ကြောင်း တွေ့ရသည်။

ဦးသိန်းမောင်နှင့် ဦးလှမောင်သိန်း အမှု (ပြင်ဆင်မှုအမှတ်၅/၂ဝ၁၁)တွင် မိမိသာလျှင် မဲအများဆုံး ရ၍ ရွေးကောက် တင်မြှောက် ခံရသူဖြစ်သည်ဟုကြေညာစေရန် သက်သာခွင့်ကို တောင်းဆိုလိုပါက အခြေခံရမည့် အချက်နှစ်ရပ် ကို ဖော်ပြထားသည်။ ယင်းတို့မှာ (၁)လျှောက်ထားသူသာလျှင် ခိုင်လုံသောမဲ အများဆုံးရသည် မှာ အမှန်ဖြစ်သည် ဟူသော အကြောင်းပြချက်။ (၂) လွှတ်တော် ကိုယ်စားလှယ် အဖြစ် ရွေးကောက် တင်မြှောက်ခံရသူ ရရှိသောမဲများတွင် တရားမဲ့ ပြုကျင့်မှုကြောင့် ရရှိသော မဲများ မပါရှိခဲ့သော် လျှောက်ထားသူ သည်သာ ခိုင်လုံသော မဲအများဆုံး ရရှိနိုင်သည်ဟူသော အကြောင်းပြချက် တို့ဖြစ်သည်။

မည်သို့သော ပြုလုပ်မှုများသည် တရားမဲ့ပြုကျင့်မှုဖြစ်ကြောင်းကို  ပုဒ်မ- ၆၆ တွင်  အတိအလင်း ပြဌာန်း ထားသည်။ ယင်းပြဌာန်းချက်သည် ကိုယ်စားလှယ်လောင်းများ အတွက် ထမင်းရည်ပူ စည်းပင် ဖြစ်သည်။ ထိုစည်းကျော်လျှင် “ထမင်းရည်ပူလောင်”မည် ဖြစ်သည်။

လာဘ်ပေးလာဘ်ယူပြုလုပ်ခြင်း၊ ရွေးကောက်မှုဆိုင်ရာအခွင့်အရေးကို အနှောက်အယှက်ပြုခြင်း၊ သူတစ်ပါး အယောင်ဆောင်ခြင်း၊ မဟုတ်မမှန် ပြောဆိုကြေညာခြင်း၊ ရွေးကောက်ပွဲ ကုန်ကျစရိတ်ကို မမှန်မကန် တင်ပြခြင်း၊ ပုံနှိပ် ထုတ်ဝေသူတို့၏ အမည် နေရပ် မပါရှိသော ကြော်ငြာစာရွက် စာတမ်း ပိုစတာများ ဝေငှခြင်း၊ ဝန်ထမ်းတစ်ဦးထံမှ အကူအညီ ရယူခြင်း၊ လူမျိုး၊ ကိုးကွယ်သည့် ဘာသာကို အကြောင်းပြု၍ လှုံ့ဆော်ခြင်း၊ ပါတီ၊ လူပုဂ္ဂိုလ်တစ်ဦးကို အကြမ်းဖက်ခြင်း မမှန်မကန် စွပ်စွဲရေးသားခြင်း၊ အများ ပြည်သူ ဆူပူမှုဖြစ်အောင် ဖန်တီးခြင်း စသည့် အချက်(၁၂)ချက် ပါဝင်သည်။

ဦးကျော်ထွန်းအောင်နှင့် ဦးစောလှ အမှု(ပြင်ဆင်မှုအမှတ်-၉/ ၂ဝ၁၁)တွင်၊ ရွေးကောက်ပွဲ ဥပဒေ အခန်း(၁၃) အရ ပြစ်မှုများ ကို ရဲစခန်းတွင် တိုင်ကြားပြီး တရားရုံး က ပြစ်ဒဏ် ချမှတ်သော်လည်း ရွေးကောက်ပွဲ ဥပဒေ အခန်း(၁၄)ပုဒ်မ-၆၆ အရ တရားမဲ့ပြုကျင့်မှုများကို ရဲစခန်းက လည်းကောင်း၊ တရာရုံးက လည်းကောင်း ဆုံးဖြတ်နိုင်မည် မဟုတ်ကြောင်း ညွှန်ပြခဲ့သည်။ ခိုင်လုံမဲ အများဆုံး ရရှိခဲ့သူ ဦးကျော်ထွန်းအောင်ကို ရွေးကောက် တင်မြှောက်ခြင်းသည် တရားမဝင် ပျက်ပြယ်ကြောင်း ရွေးကောက်ပွဲ ခုံအဖွဲ့က ဆုံးဖြတ်ခဲ့သည်။   ဦးကျော် ထွန်းအောင်က မကျေနပ်၍ တက်ရောက်သည့် ပြင်ဆင်မှုတွင်မူ အချို့ ကျေးရွာ၊ ရပ်ကွက်တို့တွင် တရားမဲ့ ဟောပြောခြင်း မှန်သော်လည်း ဦးကျော် ထွန်းအောင်နှင့် ဦးဦးစောလှတို့ ရရှိခဲ့သော ဆန္ဒမဲများသည်   ဆန္ဒမဲပေါင်း (၂၂၄၅၄) ကွာခြားသည်ဖြစ် ရာ ရွေးကောက်ပွဲ အနိုင်အရှုံးသည် ထိုသို့ တရားမဲ့ဟောပြောသည့် အကြောင်း တစ်ရပ်တည်းကြောင့် မဟုတ်၍ ရွေးကောက်ပွဲ ပျက်ပြယ်ခြင်းမရှိ ဟု ရွေးကောက်ပွဲ ကော်မရှင်က ဆုံးဖြတ်ခဲ့သည်။

ခိုင်လုံမဲအများဆုံးရသူအပေါ် ကန့်ကွက်လွှာ တင်သွင်းလေ့ရှိသည့် ကန့်ကွက်ချက်အောင်မြင်ပါက အနိုင်ရသူ ရွေးကောက် ခံရခြင်းသည် ပျက်ပြယ်ပြီး ဒုတိယမဲ အများဆုံး ရရှိသူက ကိုယ်စားလှယ်ဖြစ်နိုင်သည်။

သို့သော် ပြန်လှန် ကန့်ကွက်လွှာ တင်သွင်းပါက နှစ်ဖက် ရှုံးနိမ့်နိုင်သည်ကို သတိချပ်ရပါမည်။

ဒေါ်လဲ့လဲ့အေးနှင့်ဒေါ်ဖြူဖြူသင်း အမှု(ကန့်ကွက်လွှာအမှုအမှတ်-၁/ ၂ဝ၁၂)တွင် မင်္ဂလာတောင်ညွန့် မြို့နယ် ပြည်သူ့ လွှတ်တော် မဲဆန္ဒနယ်၌ ဒေါ်ဖြူဖြူသင်းက ခိုင်လုံမဲ (၅၅၈၁၈) ရရှိခဲ့သည်။ ဒေါ်လဲ့လဲ့အေးက ခိုင်လုံ မဲ(၅၉၇၇) ရရှိခဲ့သည်။ ဒေါ်လဲ့လဲ့အေး က ဒေါ်ဖြူဖြူသင်းအပေါ် တင်သွင်းသည့် ကန့်ကွက်လွှာ၌  နိုင်ငံတော် အစိုးရကို အကြည်ညို ပျက်စေရန်နှင့်ပြည်ခိုင်ဖြိုးပါတီ ကိုယ်စားလှယ် လောင်းကို မဲဆန္ဒရှင်များ အထင်အမြင် လွဲမှားအောင် သွေးထိုး လှုံ့ဆော် ကြောင်းပါရှိသည်။ ဒေါ်ဖြူဖြူသင်း က စွပ်စွဲချက်များကို ငြင်းဆိုခဲ့ပြီး ပြည်ခိုင်ဖြိုး ပါတီဝင်များကသာ ဘာသာရေးကို အကြောင်းပြု၍ လှုံ့ဆော်ခဲ့ကြောင်း၊ နိုင်ငံတော်က လမ်းခင်းပေးခြင်း၊ သောက်သုံးရေ ရရှိရေး ဆောင်ရွက်ခြင်း၊ ဒုက္ခသည်များ ကူညီပေး ခြင်းတို့ကို ပြည်ခိုင်ဖြိုးပါတီက ဆောင် ရွက်ခြင်း ဖြစ်သည်ဟု လက်ကမ်းစာစောင်တွင် ဖော်ပြလျက် သူတစ်ပါး အယောင်ဆောင်သည့် တရားမဲ့ပြုကျင့်မှုကို ကျူးလွန်ကြောင်း ၊ ဒေါ်လဲ့လဲ့အေးသည် လွှတ်တော် ကိုယ်စားလှယ် အဖြစ် ကြေညာခွင့် ရထိုက်သူ မဟုတ် ကြောင်း ပြန်လှန် ကန့်ကွက်လွှာ တင်သွင်းခဲ့သည်။

နှစ်ဖက် ကန့်ကွက်ချက်များ မှန်ကန်၍ အောင်မြင်ခဲ့ပါက နှစ်ဖက်ရှုံးနိမ့်ခဲ့ဖွယ် ရှိပါသည်။ ရွေးကောက်ပွဲ ခုံအဖွဲ့က ကန့်ကွက်လွှာ နှစ်ခုလုံးကို ပယ်ကြောင်း ဆုံးဖြတ်ခဲ့သည်။

ဝ၉၉

ဆက်စပ်သတင်းများ

လေဆိပ်ရောက်တိုင်း ဂုဏ်ယူနေပါ

လေဆိပ်ရောက်တိုင်း ဂုဏ်ယူနေပါ

ရန်ကုန်၊ ဇန်နဝါရီ ၃၁၊ ၂၀၁၇
ပွင့်သောပန်းတို့ လန်းစေဖို့

ပွင့်သောပန်းတို့ လန်းစေဖို့

ရန်ကုန်၊ ဒီဇင်ဘာ ၈၊ ၂၀၁၆

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*