စာအုပ်သုံးသပ်ချက် — ရန်ကုန်၊ နိုဝင်ဘာ ၁၅၊ ၂ဝ၁၂

ချဉ်ပေါင်ရွက်သည် မောင်မှိုင်း (ဝန်စာရေး ဦးကြီး)၊ မန်းရွှေပြည် စာအုပ်တိုက်၊ ၂၀၁၂၊ နိုဝင်ဘာ

နှစ်တွဲပေါင်း ပထမအကြိမ်၊ စာမျက်နှာ ၅၆၄၊ တန်ဖိုး ၂၅၀ဝ ကျပ်

စာအုပ် မျက်နှာဖုံး

စာအုပ် မျက်နှာဖုံး

ပထမဆုံး ကာလပေါ် ပင်ကိုရေး မြန်မာ ဝတ္ထုတစ်အုပ်ဟု အသိအမှတ်ပြုရသော ဝန်စာရေးဦးကြီး၏ “ချဉ်ပေါင်ရွက်သည်   မောင်မှိုင်း” ဝတ္ထုကို မန်းရွှေပြည် စာအုပ်တိုက်မှ ပထမဆုံးအကြိမ် တစ်ပေါင်းတည်း ထုတ်ဝေ လိုက်သည်။ မြန်မာ ကာလပေါ် ရသ စာပေ ခေတ်ဦးမှ ပထမဆုံး အမှီးဝတ္ထု “မောင်ရင်မောင် မမယ်မ” အပြီးတွင် ထွက်ရှိလာသည့် ပင်ကိုရေး ဝတ္ထုလည်း ဖြစ်ပြီး ဝတ္ထုပါ ဇာတ်ဆောင် မောင်မှိုင်း အမည်သည် စာဖတ် ပရိသတ် များ သာမက မြန်မာနိုင်ငံ အဝန်း ထင်ရှားကျော်ကြား စေခဲ့သည့် ဝတ္ထုတစ်အုပ်လည်း ဖြစ်သည်။

အဓိကဇာတ်လမ်းမှာ မြန်မာ ရှင်ဘုရင်များ လက်ထက် သာမန် ကျေးတောသား ချဉ်ပေါင်ရွက်သည် မောင်မှိုင်း သည် သူ၏ မလိမ့်တပတ်၊ လူပေါ်လူဇော်၊ အညာအလှိုင်း အတတ်များဖြင့် ဧရာဝတီမြစ်စဉ် တစ်လျှောက် မင်းမှုထမ်း အသွင်ယူရင်း တစ်ရွာတစ်ကျီဆောက်၊ အခွင့်အရေးယူ၊ ကိုယ်ကျိုးရှာပွေ ရှုပ်တတ်သော အကြောင်း ပင် ဖြစ်သည်။ မြန်မာမင်းများ လက်ထက်ဟု ဆိုသော်လည်း မည်သည့်မင်း လက်ထက်ဟု ထုတ်ဖော်မထားဘဲ နောက်ခံ အချက်အလက်များ ဖော်ပြမထား ဘဲ၊ လူရှုပ်မောင်မှိုင်း၏ ဇာတ်ရုပ်ကိုသာ ဦးစားပေးထားသဖြင့် အဓိက ဇာတ်ကောင်မှာ နောက်ခံကားထဲမှ ထင်ရှားစွာ ထိုးထွက်နေသည်။ ဘိုးတော်ဘုရား လက်ထက် တွင် ပေါ်ပေါက်ခဲ့ဖူးသော မောင်မှိုင်းဆိုသူ တစ်ဦးအကြောင်း အရင်းပြု၍ ဇာတ်ကောင်အား မောင်မှိုင်းအမည် ပေးရခြင်း ဟုလည်း သိရသည်။

ဇာတ်လမ်းသွား ရိုးစင်းသော် လည်း ဇာတ်ကောင်မောင်မှိုင်း၏ ဥာဏ်နီဥာဏ်နက်များ၊ လီဆယ် စကားများ၊ အမူအရာ များနှင့် ဇာတ်ကွက်ကို မရိုးရအောင် ချုပ်တွဲထားသည်။ မယားများစွာအကြား ဗျာများနေရသော မောင်မှိုင်း၏ တစ်ခါတစ်ရံ တရားရဟန် တစ်ကိုယ်ရည် စကားများသည်လည်း ရယ်ပြုံးဖွယ် ဖြစ်သည်။ သီလ ငါးဖြာတွင် အကျုံး မဝင်သော်လည်း လက်တစ်လုံးခြား အမှုကိစ္စများနှင့် ထင်သလို ပွေရှုပ်ခဲ့သော ဤဝတ္ထုသည် ယနေ့ခေတ် အမြင်အတွေးအရ လွဲချော်နေဖွယ် ရှိသော်လည်း တစ်ခေတ်က မြန်မာ စာပေသမိုင်းတွင် မှတ်တမ်းဝင် ခဲ့သော စာအုပ်တစ်အုပ် ဖြစ်သည်။

ယခု တစ်ပေါင်းတည်း ထုတ်ဝေခြင်းတွင် ထုတ်ဝေသူ၏ အမှာစာ သာမက ယခင် ၁၉၆၀ တွင် ထုတ်ဝေခဲ့စဉ်က ဟံသာဝတီ ပုံနှိပ်တိုက်၏ အမှာစာ နှင့်အတူ စာရေးသူ ဝန်စာရေးဦးကြီး၏ အတ္ထုပ္ပတ္တိကိုပါ ရှာဖွေ ထည့်သွင်း တင်ဆက်ထားသည် ။ ပြန်လည်ထုတ်ဝေသူ၏ အမှာတွင် ဤဝတ္ထုအား အမြင်သစ်ဖြင့် ကြည့်ရှု ဆင်ခြင် ဖွယ် ဖြစ်ကြောင်းလည်း ဆိုထားသည်။ ဇာတ်ဆောင် မောင်မှိုင်း၏ ပွေရှုပ်ပုံများကို ပေါ်လွင်စွာ သရုပ်ဖော်ထားသော် လည်း ဤ ဥာဏ်နီ ဥာဏ်နက် အလိမ် အကောက်များကို ပမာ ထား၍ ခေတ်ကာလ အမျိုးသမီးများ ရှောင်ရှား နိုင်စေရန် ရည်ရွယ်ကြောင်း ထုတ်ဝေသူက ဆိုသည်။

စာပေ အရေးအသားတစ်ရပ်အား လေ့လာရာတွင် သက်ဆိုင်ရာခေတ် မြင်ကွင်းကိုလည်း တစ်ပါတည်း ရှုမြင် ရသည့် နည်းတူ ဤဝတ္ထုတွင် လည်း မြန်မာ ဘုရင်များလက်ထက် အထက်လွှာ မင်းစိုးရာဇာများ၊ သာမန် ပြည်သူ လူထုများတို့၏ ဘဝမြင် ကွင်း၊ အစဉ်အလာ၊ တစ်ရှက်မှ နှစ် ရှက်မဖြစ်လိုသော မြန်မာမိန်းမပျို တို့၏ သရုပ်ကို လည်း တွေ့မြင်နိုင်သည်။ အထူးသဖြင့် မောင်မှိုင်းနှင့် လူယုံတော်တို့ ရန်ပွေသော မယားများအကြား အမူပိုကြ ပုံမှာ ရယ်ရွှင် ဖွယ်ဖြစ်သည်။ ဝတ္ထုသွား စင်းလွန်း သော်လည်း ရှေးဟန် ကာရန်နဘေ ချိတ်အရေးအသား၊ အဖွဲ့ အနွဲ့အချို့ မှာ နှစ်သက်ဖွယ်ဖြစ်သည်။ ပုံနှိပ်ခြင်း တွင် အချို့သော ရှေးသုံး ပေါရာဏ စကားလုံးအချို့နှင့် မင်းခမ်းသုံး စကားလုံးအချို့ကို အောက်ခြေ မှတ်စုများနှင့် ရှင်းလင်းထားသည်။

ခေတ်ဦးပင်ကိုရေးဝတ္ထုတစ်ပုဒ် ဖြစ်သည့်အားလျော်စွာ အားနည်းချက် အချို့ ပါဝင်နေသည်လည်း ဖြစ်သည်။ ဥပမာ ဖန်တီး မွေးမြူထားသော ဇာတ်ကောင်အချို့ကို အလွယ်တကူ မွေးဖွားပြီး အလွယ်တကူ သေစေလိုက် သော အဖြစ်များနှင့် မည်သည့်အကျိုး သက်ရောက်မှုမျှ မရှိသော ဇာတ်ကောင်အချို့ကို မလိုအပ်ဘဲ ဆွဲဆန့် ရှည်ကြာ ပါဝင်နေစေခြင်းတို့ ဖြစ် သည်။ အဓိကဇာတ်ကောင် မောင်မှိုင်း၏ လော်လီသောစိတ်နှင့် တရားရ ဆင်ခြင်သော စိတ်တို့ လွန်ဆွဲကြသော အခန်း အချို့ ပါဝင်သော်လည်း ရေရာပြတ်သားသော ဆုံးဖြတ်ချက် မရရှိဘဲ မူလ ဇာတ်သွားအတိုင်း စရိုက်သေ သဘော မျောပါ ရခြင်းလည်း ပါဝင်သည်။ စိတ်ကူးယဉ် ဝတ္ထုတစ်ပုဒ် ဖြစ်သော်လည်း အချပ်ပို ထည့်သွင်းဖော်ပြထားသော ဝန်စာရေးဦးကြီး ၏ အတ္ထုပ္ပတ္တိအရ ကိုယ်တွေ့ အဖြစ်အပျက် များဟုပင် ယူဆမိသည်။ မည်သို့ဆိုစေ မြန်မာစာပေ သမိုင်းတွင် တစ်ထောင့် တစ်နေရာ မှ ကျေးဇူးပြုခဲ့သော စာအုပ်အမှန်လည်း ဖြစ်သည်။

ဤဝတ္ထုပေါ်ဦးစက မြန်မာနိုင်ငံ တဝန်း စာဖတ်ပရိသတ်တို့ အကြား ပျံ့နှံ့ကျော်ကြားခဲ့ပြီး ဇာတ်ဆောင် ချဉ်ပေါင်ရွက်သည်   မောင်မှိုင်း၏ ရွံရှာဖွယ် စရိုက်သဘာဝကို အခွင့်ကောင်းယူ၍ အမျိုးသား စာဆိုတော် တစ်ဦးလည်း ပေါ်ထွက်လာခဲ့ဖူးသည်။ ဆရာကြီး ဦးလွန်းသည် ထိုစဉ်က တိုင်းတစ်ပါး ယဉ်ကျေးမှုကို အတုခိုးကာ မြန်မာ အမည်ရှေ့တွင် မစ္စတာ အမည်ခံ၍ မော် လွှားနေကြသူတို့ကို ထိုးနှက်သောအားဖြင့် မိမိ၏ ကလောင်အမည် “ရွှေတောင်ဆရာလွန်း” ကို “မစ္စတာ မောင်မှိုင်း” အဖြစ် ပြောင်းလဲ၍ အသုံးပြုသည့် အခါ မစ္စတာ အမည်ယူသူများ နာကြည်းကြဖူးသည်။ အချို့သော မစ္စတာ အမည်ယူသူ များ မြန်မာအမည်သို့ ပြောင်းလဲကြပြီး မစ္စတာ မောင်မှိုင်း သည်လည်း အမျိုးသား စာဆိုတော်ကြီး သခင် ကိုယ်တော်မှိုင်း အဖြစ် ရောက်ရှိလာခဲ့သည်။ မြန်မာ့ လွတ်လပ်ရေးနှင့် စာပေ သမိုင်းအတွက် အထောက်အကူ တစ်စအဖြစ် စတင် ခဲ့သော စာအုပ်ဟုလည်း ဆိုနိုင် သည်။

မည်သို့ဆိုစေ “ချဉ်ပေါင်ရွက်သည် မောင်မှိုင်း” ဝတ္ထုတွင် မြန်မာ့ရိုးရာနှင့် မင်းခမ်း အလေ့အထများ၊ ရှေးခေတ် လူနေမှု ဘဝအချို့နှင့် ရှေးစဉ်လာ မြန်မာ စာပေ ရေးဖွဲ့ဟန်များကို ကောင်းစွာ လေ့လာရသည်မှာကား သေချာ သည်။ မြန်မာစာပေ သမိုင်းစဉ်ကို လေ့လာလိုသူတို့၊ စာပေ ဝါသနာရှင်တို့ သာမက “ဆရာကြီး သခင် ကိုယ်တော်မှိုင်း” ဟူသည့် အမည်ကို လေ့ လာလိုသူတို့ ဖတ်ရှုသင့်သည့် အဦးဆုံး မြန်မာကာလပေါ် ပင်ကိုရေး ဝတ္ထုမှာ “ချဉ်ပေါင်ရွက်သည် မောင်မှိုင်း” ပင် ဖြစ်သည်။

“..ဒါန အဆောက်အဦ အလှူကြီးကို ကြည်ဖြူသော စေတနာနှင့် ပရိသတ်များစွာကို ဖိတ်ကြားပြီးလျှင် ထူးခြားကဲလွန်   အောင် လှူမည့် ဆဲဆဲသား၌ မင်းတို့မယားများက ထကြွ သောင်းကျန်းကြသည့် အတွက် ငါ အရှက်ကြီး ကွဲရသည်” ဟု ပြောဆို မြည်တမ်းပြီးလျှင် သင်္ကန်းကို လက်ကပွေ့၍ သင်တုန်းကို ငပြူး လက်သို့ပေးပြီးလျှင် “ငါ့ခေါင်းကို မြန်မြန် ရိတ်စမ်းပါ။ လူလုပ်၍ မနေလိုပါဘူး။ တစ်ခါတည်း သင်္ကန်း ဝတ်တော့မည်”ဟု…(စာ-၄၆၄)

ဝဏ္ဏလင်း

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*