ပညာရေး သတင်း — ရန်ကုန်၊ မတ် ၁၊ ၂ဝ၁၃

အမေရိကန် ပြည်ထောင်စုမှ ရောက်ရှိနေသော အပြည်ပြည်ဆိုင်ရာ ပညာရေး အင်စတီကျုမှ ဥက္ကဋ္ဌ Dr. Allan Goodman နှင့် အဖွဲ့သည် ရန်ကုန်မြို့တက္ကသိုလ်ရိပ်သာလမ်းရှိ အမေရိကန်သံရုံးတွင် မတ် ၁ ရက် နေ့လယ် ၂ နာရီအချိန်၌ စာနယ်ဇင်း ရှင်းလင်းပွဲ တစ်ရပ်ကို ပြုလုပ်ခဲ့ပါသည်။ Dr. Goodman သည် လွန်ခဲ့သော ရက်သတ္တပတ်က အမေရိကန်  ပြည်ထောင်စုရှိ တက္ကသိုလ် ၁ဝ ခု မှ ပါမောက္ခချုပ်များ၊ ဒုတိယ ပါမောက္ခချုပ်များ အဖွဲ့ကို ဦးဆောင် ၍ မြန်မာနိုင်ငံသို့ ရောက်ရှိနေခဲ့ပါသည်။ Mr. Goodman နှင့်အတူ အမေရိကန် နိုင်ငံခြားရေး ဝန်ကြီးဌာနမှ ပညာရပ်ဆိုင်ရာ စီမံမှုဌာနမှ ဒုတိယ လက်ထောက် နိုင်ငံခြားရေး ဝန်ကြီး Ms. Meghann A. Curtis လည်း လိုက်ပါလာ ခဲ့ပါသည်။

အဆိုပါ သတင်းစာ ရှင်းလင်းပွဲအား အမေရိကန်သံရုံးမှ ပြည်သူ့ဆက်ဆံရေး အရာရှိ Ms. Andream မှ ရှင်းလင်း ပြောကြားရာ ပုဂံခေတ် လက်ရာ ရှေးဟောင်း ဗုဒ္ဓရုပ်တုတစ်ခုအား ဤခရီးစဉ်အတွင်း မြန်မာပြည်သူပြည်သား များအတွက် ရှေးဟောင်း သုတေသနဌာနမှ တစ်ဆင့် ပြန်လည် ပေးအပ်ခဲ့ကြောင်း ပါရှိပါသည်။

အဆိုပါ ရုပ်တုမှ အေဒီ ၁၁၃၈ ခုနှစ်ခန့်က လက်ရာဖြစ်ပြီး ငလျင်ဒဏ်ကြောင့် ကျိုးပဲ့နေကြောင်း၊ အမေ ရိကန်ပြည်ထောင်စုတွင် ရောင်းချစဉ် အီလီနွိုက် တက္ကသိုလ်မှ ရယူပြီး မြန်မာနိုင်ငံအား ပြန်လည်ပေးအပ် ခဲ့ကြောင်း ပြောကြားခဲ့ပါသည်။

မြန်မာနိုင်ငံတွင် ယင်းတို့အဖွဲ့ ရောက်ရှိနေစဉ် အတွင်း ရန်ကုန်၊ မန္တလေးနှင့် နေပြည်တော်မြို့များသို့ ရောက်ရှိ ခဲ့ကြောင်း၊ ခရီးစဉ်အတွင်း တက္ကသိုလ်များနှင့် ဆိုင်သော ဝန်ကြီးဌာန များဖြစ်သည့် ပညာရေးဝန်ကြီး ဌာနမှ ဒုတိယ ဝန်ကြီး၊ ညွှန်ကြားရေးမှူးချုပ်နှင့် ဒုတိယညွှန်ကြားရေးမှူးချုပ်၊ သိပ္ပံနှင့် နည်းပညာ ဝန်ကြီးဌာန မှ ညွှန်ကြားရေးမှူး ချုပ်နှင့် ဒုတိယ ညွှန်ကြားရေးမှူးချုပ်၊ ကျန်းမာရေး ဝန်ကြီးဌာနမှ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ် တို့နှင့် တွေ့ဆုံခဲ့ပါကြောင်း ရှင်းလင်းပြောကြား ခဲ့ပါသည်။ ယင်းတို့အဖွဲ့သည် အစိုးရ အရာရှိကြီးများနှင့်သာမက အရပ်ဖက်လူ့အဖွဲ့အစည်းများမှ ပညာ ရေးနှင့် သက်ဆိုင်သော တာဝန်ရှိသူ များကိုလည်းကောင်း၊ တက္ကသိုလ်များ၊  အထက်တန်းကျောင်းများမှ ကျောင်း ဆရာ၊ ကျောင်းဆရာမများနှင့် ကျောင်း   သားများကိုပါ တွေ့ဆုံခဲ့ကြောင်း ပြော ကြားခဲ့ပါသည်။

မြန်မာအာဏာပိုင်များက ယင်းတို့အား ဆွေးနွေးစွာ ကြိုဆိုခဲ့ပြီး ယင်းတို့၏ ခရီးစဉ်ကို သမိုင်းဝင် ခရီးစဉ်အဖြစ် ချီးကျူးထောပနာပြုခြင်းအတွက်  ဂုဏ်ယူပါကြောင်း လည်း ပြောကြားခဲ့ပါသည်။ မြန်မာအာဏာပိုင်များမှ လည်း မြန်မာနိုင်ငံ၏ ပညာရေး စနစ်ကို နိုင်ငံတကာ စံချိန်စံညွှန်းနှင့် ညီစေရန် လည်းကောင်း၊ အာဆီယံ ဒေသ အတွင်း မှီစေရန်လည်းကောင်း ပြုပြင်ပြောင်းလဲရန် စိတ်အားထက်သန်မှု ရှိကြောင်း ပြောကြားခဲ့ပါသည်။ သို့ပါ၍ မြန်မာ့ ပညာရေး နယ်ပယ်သည်  နိုင်ငံတကာရှိ တက္ကသိုလ်များနှင့် ချိတ်ဆက်၍ လုပ်ဆောင်ရန်လိုအပ်ကြောင်း ကိုလည်း အပြုသဘော ဆောင်စွာ အမြင်တူညီမှုရှိကြောင်းပြောကြားသည်။ ထို့နောက် အဖွဲ့နှင့်အတူ ပါလာသော အမေရိကန် နိုင်ငံခြားရေး ဝန်ကြီးဌာနမှ Meghann Curtis မှ ဆက်လက် ရှင်းလင်းပြောကြားခဲ့ရာ မြန်မာနိုင်ငံသည် ပညာရေးကဏ္ဍအတွက် အမေရိကန် ပြည်ထောင်စုနှင့် သာမက ကမ္ဘာနှင့် ချီ၍ ဆက်ဆံရေး စာမျက်နှာသစ်ကို ဖွင့်လှစ်ခဲ့ပြီဖြစ်ကြောင်း၊ အမေရိကန် နိုင်ငံခြားရေး ဝန်ကြီးဌာနမှ တာဝန်ယူပေးသော Fullbright Scholarship ဖူးလ်ဘရိုက် စကောလားရှစ် အစီအစဉ်ကို မြန်မာနိုင်ငံအား မတ်လအကုန်တွင် စတင်၍ ပေးမည်ဖြစ်ကြောင်း ရှင်းလင်း ပြောကြားခဲ့ပါသည်။ တစ်ချိန်က တောင်အာဖရိကတွင် စာနယ်ဇင်း သမား အဖြစ် ကျင်လည်ခဲ့ဖူးသူ Meghann သည် သမ္မတ အိုဘားမား မြန်မာနိုင်ငံ သို့ ရောက်ရှိခဲ့စဉ် ရန်ကုန် တက္ကသိုလ်၌ ပြောကြားခဲ့သော မိန့်ခွန်းမှ အောင်မြင်သော အနာဂတ်၏ သော့ချက်စံမှာ ပညာရေးပင် ဖြစ်ကြောင်း ဆိုသည့် အဆိုကို ကိုးကား၍ မြန်မာနိုင်ငံအတွက် ပညာရေးသည် အရေးပါသော အခန်းကဏ္ဍ တွင်ရှိနေကြောင်း ပြောကြားခဲ့ပါသည်။ ထို့နောက် Ms. Meghann Curtis မှ အမေရိကန် တက္ကသိုလ် အသီးသီးမှ မြန်မာနိုင်ငံ အတွက် ကူညီနိုင်မည့် ဘာသာရပ်များကို ရှင်းလင်း ပြောကြား ခဲ့ပါသည်။

ထို့နောက် အပြည်ပြည်ဆိုင်ရာ ပညာရေး အင်စတီကျုမှ ပါမောက္ခချုပ်များနှင့် ဒုတိယ ပါမောက္ခချုပ် များမှ စာနယ်ဇင်း များမှ မေးမြန်းသည် များကို ဖြေကြားရာတွင် မြန်မာနိုင်ငံသည် ပညာရေးကဏ္ဍတွင် စိန်ခေါ်မှု များနှင့် ရင်ဆိုင်နေရခြင်းဟု မမြင်စေလိုပဲ အခွင့်အလမ်းများ ပွင့်လာနေပြီ ဟုသာ မြင်စေလိုကြောင်း၊ MRTV-4 နှင့် SKY NET ပညာရေး လိုင်းများနှင့် ပူးပေါင်း၍ ပညာရေး ဆိုင်ရာ မြှင့်တင်မှုများ ကို ပြုလုပ်မည် ဖြစ်ကြောင်း၊ မြန်မာပြည်သူများနှင့် အမေရိကန်ပြည် သူများ အချင်းချင်း ဆက်ဆံရေးမျိုးကို လိုလားပါကြောင်း စသည်ဖြင့် ပြောကြားခဲ့ကြပါသည်။

ဝါရှင်တန် ဒီစီရှိ အမေရိကန် တက္ကသိုလ်၊ အာဆီယံလေ့လာရေး စင်တာမှ ဒါရိုက်တာ Dr. Pek Koon Heng အား မြန်မာအင်ဒီပဲန်ဒင့်မှ ခရီးစဉ်နှင့် ပတ်သက်၍ မေးမြန်းခဲ့ရာ သူမသည် အတိုက်အခံပါတီ အမျိုးသား ဒီမိုကရေစီ အဖွဲ့ချုပ်မှ နာယက ဦးတင်ဦး အပါအဝင် ပညာရေးကွန်ရက်မှ ညှိနှိုင်းရေးမှူး များနှင့်လည်း တွေ့ဆုံခဲ့ ကြောင်း၊ အစိုးရ အရာရှိကြီးများနှင့်လည်း တွေ့ဆုံခဲ့ကြောင်း၊ အန်အယ်လ်ဒီနှင့် အစိုးရ အရာရှိများ အကြား  မြန်မာ့ပညာရေး ပြုပြင်ရေး အတွက် အမြင်များမှာ များစွာ ထပ်တူညီနေသည်ကို တွေ့ရ၍ အားရဝမ်းသာ ဖြစ်မိကြောင်း၊ အမျိုးသား ပညာရေး အစီအမံများအတွက် အစိုးရ၊ လူမှုအဖွဲ့ အစည်းများနှင့် အန်အယ်လ်ဒီတို့ သုံးပွင့်ဆိုင် ဆွေးနွေးပွဲများမှ ရလဒ်ကို လွှတ်တော်သို့ တင်ပြပြီး ပြုပြင် ပြောင်းလဲရန် အမြန် ပြုလုပ်စေလိုကြောင်း Dr. Heng မှ ဖြေကြားခဲ့ပါသည်။ မြန်မာ့ ပညာရေးပြုပြင်ပြောင်းလဲရေး အတွက် ဗဟိုချုပ်ကိုင်မှု လျော့ချရန် လိုခြင်းကို အာဏာပိုင်ရော အတိုက်အခံပါ အမြင်တူနေခြင်းသည် ကံကောင်းခြင်း လက်ဆောင်ပင်ဖြစ် ကြောင်း ဖြည့်စွက်ပြောကြားခဲ့ပါသည်။

ဝ၃ဝ

ဆက်စပ်သတင်းများ

ပါရမီကောလိပ် ရွှေဂုံပလာဇာတွင် ဖွင့်

ပါရမီကောလိပ် ရွှေဂုံပလာဇာတွင် ဖွင့်

ရန်ကုန်၊ ဇန်နဝါရီ ၁၂၊ ၂၀၁၇
ပွင့်သောပန်းတို့ လန်းစေဖို့

ပွင့်သောပန်းတို့ လန်းစေဖို့

ရန်ကုန်၊ ဒီဇင်ဘာ ၈၊ ၂၀၁၆

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*