မြန်မာ့မြေမှာ ကိုယ်စားပြုစနစ်တွေ ခေတ်စားလာပုံများ

တောင်းပန်သည့် အမှုကိုပင် ကာယကံရှင်များ မလို

ကိုယ်စားပြုသူတွေနှင့် တောင်းပန်

ကိုယ်စားပြုသူတွေနှင့် ခွင့်လွှတ်လာကြ

နောင်အခါကျလျှင် တောင်းပန်လွှတ်တော်ပင် ခေါ်လေမလား မသိ

နိုင်ငံသားများ သိလိုသည်က

သည်အမှု၏ တာဝန်ရှိသူများစာရင်းသာ ဖြစ်

ကိုယ်စား တောင်းပန်သူက သမ္မတမင်းပင် ဖြစ်လင့်ကစား

ကိုယ်စား ခွင့်လွှတ်သူက စကြာဝတေးမင်းပင် ဖြစ်လင့်ကစား

တာဝန်ရှိသူ ကာယကံရှင်များ၏ တာဝန်ရှိမှုမှာ ကျေပျက်မသွားနိုင်

တရားရေးမဏ္ဍိုင်က ဆောင်ရွက်ရမည့်အရေးအတွက်

အုပ်ချုပ်ရေးမဏ္ဍိုင်က ကိုယ်စားတောင်းပန်ရုံဖြင့် မကျေပျက်ကြောင်း

ကျေညာမောင်းခတ်ရမလိုလို

ကိုယ့်လူများကို စုံလုံးကန်း အကာအကွယ်ပေးမှုများ မကုန်ခမ်းသေး

နိုင်ငံသားများအား သံသယမေးခွန်းထုတ်ခွင့်လည်း ဖန်တီးပေးတုန်း၊

တောင်းပန်စကားနောက်က တာဝန်ယူမှုမှာလည်း

ကာယကံမြောက်ကျူးလွန်သူကို

ဥပေဒေအရ အရေးယူခြင်း မဟုတ်မူဘဲ

နစ်နာသူများအား ဆေးစာရိတ် တာဝန်ယူခြင်း ဖြစ်လာရာ

လျော်ကြေးလိုလားသော လှုပ်ရှားသူများကလည်း

ရေငတ်တုန်း ရေတွင်းထဲကျသလို

နဂိုက အလှူလိုလို ပံ့ပိုးထားသမျှကို

ကျသင့်ငွေအဖြစ်ပြောင်း ခပ်ရဲရဲ တောင်းဆိုလာကြ

ရေသန့်ဖိုး၊ ကော်ဇောဖိုး၊ မီးစက်ဖိုး ဘာဖိုးညာဖိုး

ခေါင်းစဉ်အမျိုးမျိုးနှင့် ခွင်ကြုံချင်ကြတုန်း၊

မူဟောင်းတွေ ခေတ်မတုန်းသေးပါတကား။

အံ့သြရပါ၏။

 

ရပ်ကွက်အုပ်ချုပ်ရေးမှူး ရွေးပွဲများမှာလည်း

ကိုယ်စားပြုရွေးချယ်ခံများကား

ခေတ်ဟောင်းက လူဟောင်းများသာ ဖြစ်နေသတဲ့

အောက်ခြေက အပြောင်းအလဲကို မခံစားရသေးဟု ဆိုနေကြရာ

သင့်သူကို မဖိတ်ခေါ်၊ တော်သူက ခေါင်းရှောင်နှင့်

လျော်သူတွေ နေမြဲစားမြဲဖားမြဲ ဖြစ်သွားလေသလား

သို့တည်းမဟုတ်

အောက်ခြေမှာ မပြောင်းချင်စိတ်များ ရှိနေလေသလား

တွေးစရာ မေးစရာ ဖြစ်

မူမသစ်တသစ်ကို လူညစ်လက် ပြန်အပ်ရန်သာ ဆန္ဒရှိကြလေသလား

နိုင်ငံသားများ၏ သဘော

အံ့သြရပါသည်။

 

စာပေ ကင်ပေတိုင်က ဝန်ဆောင်မှုများ ရပ်ထားခိုက် ပြည်သူ့ ဝန်ဆောင်မှု သတင်းစာများက

မာစတာ့ထုံးကို နှလုံးမူလာ

ဝါဒဖြန့်ချိရေး လမ်းစဉ်ကို ဆက်လက်ထိမ်းသိမ်း

ခုတ်ထစ် ဖြတ်တောက် လမ်းစဉ်ကို ဆက်လက်ကျင့်သုံး

လက်စတုံး စိတ်တွေ မိုးမွှန်ကြပုံများ

ငွေသားဖြင့် လက်ခံထားသည့် ကြော်ငြာထဲက စာသားကိုပင်

မီဒီယာ၊ နိုင်ငံသားနှင့် လူထုခေါင်းဆောင်ကြား ရန်တိုက်ပေးမတတ်

ခုတ်ထစ်ဖြတ်တောက် လက်စတုံးပစ်ကြ

ဆင်ခြေက “မလွတ်လပ်မှု”တဲ့

စေတနာက ဘာပါလိမ့်

ပြည်သူ့ဝန်ဆောင်မှုဟူသည့် စကား၊ လားလားမျှ မထိုက်တန်

ပြည်သူ့ ရန်ထောင်မှု ဘွဲ့ထူးသာ ခံယူပေရော့

စိတ်လျော့ကာ လက်တွဲခေါ်လိုသော်လည်း

စာပေလွတ်လပ်ခွင့်နှင့် ပြည်သူ့ဝန်ဆောင်မှု ပန်းတိုင်ကား

နိုင်ငံတော် သတင်းစာများအတွက် အဝေးဆုံး

အဝေးတကာ့ အဝေးဆုံးမှာ ရှိနေ

နင်ချည်းပင် နွံနစ်နေပေရော့ဟု ပြောချင်စရာ

မူညစ်လူဟောင်း ဝဲသြဃကား

အလျားအနံအနက် ကျယ်ဆဲပင်။

အံ့သြရပါသည်။

 

မည်သို့ပင်ဖြစ်စေ နိုင်ငံသားများ

မည်သည့်မဏ္ဍိုင်သားများ၏ မတရားပြုခြင်း

လွတ်လပ်စွာနှင့် မလွတ်လပ်စွာ အနိုင်အထက်ပြုခြင်း

စိတ်ဟောင်းမူညစ်များကို မစွန့်နိုင်ခြင်းများမှ

ကင်းဝေးနိုင်ကြပါစေ။

ပြောင်းဖူးရိုး

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*