စာအုပ်သုံးသပ်ချက် — ဇန်နဝါရီ ၁၇၊ ၂ဝ၁၃

မြင့်သန်းကျော်၏ အာဏာရှင်များရဲ့ နိုင်ငံ အမည်ရှိ ဆောင်းပါး စုစည်းမှုတစ်အုပ်ကို ပန်းဝေဝေ စာပေမှ ပထမအကြိမ် ထုတ်ဝေလိုက်သည်။  ၂ဝ၁၁-၂ဝ၁၂ ကာလအတွင်း စာရေးသူ၏ ဂျာနယ်များတွင်ဖော်ပြပါ ရှိခဲ့ပြီးသော ဆောင်းပါးများကို စု စည်းထုတ်ဝေထားခြင်းဖြစ်ပြီး ဆောင်းပါးပေါင်း ၁၃ ပုဒ်ပါဝင် သည်။ စာရေးသူမှာ ယခုဆောင်းပါး များကို စတင်ရေးသား ရင်း စာပေ လောကထဲ ဝင်ရောက်လာခြင်းဟု လည်း စာရေးသူ၏ အမှာစာအရ သိရသည်။

သက်တမ်းလွန်ကားများ အစားထိုးရေးစီမံချက်နဲ့ လမ်းတွေ၊ တံစိုးလက်ဆောင်၊ ထားသင့်တဲ့ဝါဒ၊ စက်မှု ထူထောင် အောင်မြင်ဖို့၊ ရေအားလျှပ်စစ်၊ ရိုးသားသည့် ဂုဏ်၊ လာဘ် သံသရာ၊ မွန်းကျပ်နေသော ရန်ကုန် လမ်းများ၊ တနင့်တပိုး၊ မြကျွန်းညိုညို တက္ကသိုလ်ဟူသည့် ဆောင်းပါးများ ပါဝင်ပြီး မြန်မာတိုင်း (မ်)၊ ဒီလှိုင်း၊ Eleven, Messenger ဂျာနယ်များတွင် ဖော်ပြခဲ့ပြီးဖြစ်ပါ သည်။ ဆောင်းပါး ခေါင်းစဉ်များ အရပင် စာရေးသူ သည် လက်ရှိမြန်မာ့ အရေးအရာ များအပေါ် ချဉ်းကပ် လေ့လာထားချက်များ ဖြစ်ကြောင်း သိနိုင်သည်။

မြို့ပြလမ်းမများ၏ ကျပ်သိပ်နေသော မြင်ကွင်း၊ အရိုးစွဲ အသားကျနေသော လာဘ်ပေး လာဘ်ယူမှု ပြဿနာ များ၊ စွမ်းအင် လိုအပ်ချက်၊ ဗဟိုချုပ်ကိုင်မှု အာဏာရှင်စနစ်၏ ဆိုးကျိုးများနှင့် စာရေးသူ ကိုယ်တိုင်မက်မော လှသော တက္ကသိုလ် ရပ်ဝန်းဖြတ်သန်းမှုများကို ဤဆောင်းပါးများမှ တို့ထိ သုံးသပ်ထား ပါသည်။ နှစ်ပေါင်းများစွာ အောက်တန်း နောက် တန်း ရောက်ရှိနေခဲ့ကြရာမှ ပွင့်လင်း မြင်သာသော ကာလတွင် ရုတ်တရက် အလှည့်အပြောင်းနှင့် ကြုံရသော မြန်မာပြည်သူ လူထုအတွက် ဆန်းစစ် ဆင်ခြင်ဖွယ်များကို နှိုးဆွ ထားသည့် ဆောင်းပါးများလည်း ဖြစ်သည်။ သက်တမ်းလွန် ကားများနှင့် ပတ်သက် သည့် ဆောင်းပါးတွင် ခွင့်ပြုပေးသည့် နိုင်ငံတော်မှ ပြန်လည် စောင့်ရှောက်ပေးရမည့် အချက်များကိုလည်း တုံ့ပြန်ဖော်ပြထားသည်မှာ သတိပြုဖွယ် ဖြစ်သည်။ အသစ် တင်သွင်းကားများမှ ကောက်ခံရရှိသည့် အခွန်ငွေမှ အချိုးကျရရှိ သည့် ဆုကြေးငွေကို အကောက်ခွန် ဝန်ထမ်းများအား ခွဲဝေခြင်းထက် အခြားနိုင်ငံတော်အတွက် အကျိုးရှိ ရာလုပ်ငန်းများ၌သာ သုံးစွဲစေသင့် ကြောင်း သတိပေးထားသည်။

မကြာသေးခင်ကာလတစ်ခုက တိုင်းပြည်နှင့်အဝန်း အုတ်အော် သောင်းတင်းဖြစ်စေခဲ့သော ရေအား လျှပ်စစ် စီမံကိန်းများ၊ ရေလှောင် တမံ၊ ရေကာတာစီမံကိန်းများနှင့်  ပတ်သက်၍ ဆင်ခြင်ဖွယ်ရာများကို လည်း တင်ပြထား သည်။ နိုင်ငံတစ်နိုင်ငံ၏ အရေးပါသော စွမ်းအင် ကဏ္ဍနှင့်ပတ်သက်၍ အခြားနိုင်ငံ များကို နမူနာယူ သင့်ကြောင်း၊ စွမ်းအင် အရင်းအမြစ်နှင့် စစ်လက်နက် များထုတ်လုပ်နိုင်သော်လည်း အုပ် ချုပ်ရေးပိုင်းဆိုင်ရာ အားနည်းချက် များကြောင့် အမေရိကနောက်မှ ကျန်ရစ်သည့် ယခင်ဆိုဗီယက်ပြည် ထောင်စုမှ သင်ခန်းစာ ယူသင့် ကြောင်းလည်း ဆိုထားသည်။

 တံစိုးလက်ဆောင်၊ ရိုးသား သည့်ဂုဏ်၊ လာဘ်သံသရာ စသော ဆောင်းပါးများတွင်လည်း အရိုးစွဲ အဂတိလိုက်စားမှုများကို ထိုးနှက် ထားသည်။ အထူးသဖြင့် လာဘ် သံသရာဆောင်းပါးတွင် စာရေးသူ ကိုယ်တိုင်ကြုံတွေ့ဖြတ်သန်းရသည့် လာဘ်ပေးလာဘ်ယူမှုတစ်ခုကို တိ တိကျကျဖော်ထုတ်ရေးသားထား သည်။ အကြီးဆုံးတာဝန်ရှိသူတစ် ဦး၏ ဖုန်းနံပါတ်ကိုပါ ဆောင်းပါး တွင် ထည့်သွင်းဖော်ပြထားပြီး ဖြစ် ပျက်မှုအဆင့်ဆင့်နှင့် လာဘ်ပေး လာဘ်ယူကိစ္စ များကြောင့် နိုင်ငံ တော်မှလေလွင့်ခဲ့ရသည့် အခွန်အခ များ၊ လာဘ်တောင်းအနိုင်ကျင့်ခံရ မှုကြောင့် နစ်နာ ရသည့် ပြည်သူတို့ ၏ အခြေအနေနှင့် ပြုပြင်ဆင်ခြင် ဖွယ်ရာများ ကိုလည်း တွေ့ရသည်။ မြန်မာနိုင်ငံတွင် အချိန်ကာလ တစ်ခု အကြာ အခိုင်အမာနေရာ ယူခဲ့ကြသော အာဏာရှင် ကပ်ပါးသူကြွယ် တို့၏ ဇစ်မြစ်သည်လည်း လာဘ် သံသရာမှပင် စတင်ကြောင်း ဆိုထား သည်။

တစ်ချိန်က စက်မှုတက္ကသိုလ် ကျောင်းသား တစ်ဦးဖြစ်ခဲ့သည့် အတွက်လည်း စာရေးသူ၏ ပြင်းပြသော တက္ကသိုလ် ချစ်စိတ်ကို မြကျွန်းညိုညို တက္ကသိုလ်ဆောင်းပါး တွင် တွေ့နိုင်သည်။ အခြားနိုင်ငံ များစွာ နည်းပညာ လှိုင်းပေါ် ပျော်ရွှင်စွာ စီးမျောနေကြချိန်တွင် နည်းပညာ တက္ကသိုလ်၊ စက်မှု တက္ကသိုလ်များအား ပစ်ပယ်ထားခဲ့သည့် ကာလရှည် တစ်ခုအကြောင်း တင်ပြထားပြီး ဤချို့ယွင်းချက်မှစ၍ နိုင်ငံ၏ စက်မှုလုပ်ငန်းများ ဖွံ့ဖြိုးမှု နှောင့်နှေးတွန့်ဆုတ်ခဲ့ရကြောင်း လည်း ဆိုထားသည်။ ပညာ အရင်းအမြစ်အား လစ်လျူရှုသူတို့ သတိ ပြုဖွယ်ပင်။

အထူးသဖြင့် အာဏာရှင်များရဲ့  နိုင်ငံ ဆောင်းပါးမှာမူ လေ့လာဖွယ် သတိပြုဖွယ်ဖြစ်သည်။ စစ်တပ်မှ အာဏာ သိမ်းခဲ့သော နိုင်ငံများဖြစ်သော် လည်း ခေါင်းဆောင်ဖြစ်သူ တို့၏ ပြည်သူလူထု အပေါ် ထားရှိသော  စေတနာ အချိုးအဆ အပေါ် မူတည်၍ စင်္ကာပူ၊ တောင်ကိုရီးယားနိုင်ငံများ  နှင့်နှိုင်းယှဉ် တင်ပြ ထားသည်။ တိုင်းပြည် ဦးဆောင်သူများ အကျင့်ပျက် ကြသော်လည်း ပြည်သူလူထု၏ ပြည့်ဝသော အသိဉာဏ်ပညာကြောင့် တိုင်းပြည်၏ ဖွံ့ဖြိုးတိုးတက်မှု၊ တည်ငြိမ် မှုများ ဆက်လက်ရှင်သန် နိုင်ခဲ့ပုံကို စံနမူနာပြုဖွယ်လေ့လာ တင်ပြထားသည်။ သယံဇာတ ကြွယ် ဝသော နိုင်ငံများတွင် ကြုံရ သော အာဏာရှင်တို့၏ အတွေးအခေါ် များ၊ ကိုယ်ဗလာနှင့် ရွှေပုံပေါ် ထိုင် နေကြ ရသော ပြည်သူ တို့၏ အဖြစ်များကိုလည်း စာနာဖွယ်ဖြစ်သည်။ အုပ်ချုပ်သူ အစိုးရနှင့် ပြည်သူတို့ ၏ ပြည့်ဝသော ဉာဏ်ပညာများနှင့် သာ ဖွံ့ဖြိုးတိုးတက်သော နိုင်ငံတော် တစ်ခု တည်ဆောက်နိုင်ကြောင်း ဆိုထားသည်။

အာဏာရှင်များရဲ့ နိုင်ငံနှင့်   အခြားဆောင်းပါးများ စာအုပ်မှာ ပြည်သူတစ်ဦး၏ တွေးဆချက်များ၊ အကြံပြုချက်များကို ပွင့်ပွင့်လင်း လင်းရေးသား ထုတ်ဖော် ထားသော ဆောင်းပါး စုစည်းမှုတစ်ခုဖြစ်သည်။ ကျမ်းကြီးကျမ်းခိုင်များ အလိုအရ မဟုတ်သော်လည်း မိမိရှင်သန်ရာ ပတ်ဝန်းကျင်နှင့် နိုင်ငံကို အလေး တယူမြင်တွေးသူ တစ်ဦး၏ ရိုးစင်းသော ရင်ဖွင့်သံများ ဟုလည်း ဆိုနိုင်သည်။ သာမန်ပြည်သူ တစ်ဦးကဲ့သို့ ရိုးရိုးမြင်၊ ရိုးရိုးတွေးသော် လည်း ပြုပြင်ဖွယ်များ၊ တွေးဆဖွယ် များကို ရဲရဲဝံ့ဝံ့ တင်ပြထားသည် လည်းဖြစ်သည်။ ဤအတွေးအမြင် များမှ တစ်ဆင့် စာဖတ်သူတို့ ဆင်ခြင်ဖွယ် များကိုလည်း ရနိုင်မည်ဖြစ်သည်။

အရေးတကြီး ပြုပြင်ပြောင်းလဲ ရန်လိုသည့် ကာလတစ်ခုအတွင်း ရှင်သန်ကြသည့် စာဖတ်ပရိသတ် တို့ မဖြစ်မနေ ဖတ်ရှုသင့်သည့် စာအုပ်ကောင်း တစ်အုပ်ပင်ဖြစ်သည်။ “နောက်နေ့ ခရိုင်မှူးရုံးဖုန်း ၅၉ဝ၁ဝ၇ က တစ်ဆင့် ခရိုင်မှူး လက်ကိုင်ဖုန်းနံပါတ် ၁၉-၅ဝ၃၉၅၅၆ ရလို့ ခရိုင်မှူးဆီ နေ့ခင်းပိုင်းမှာ ဆက်ပြီး ဘာလို့ ငွေ တစ်သောင်း တောင်းခိုင်း တာလဲမေးတော့ ငွေပမာဏနဲ့ မဟုတ် သဒ္ဓါကြေးသာ ကောက်ခိုင်းတာပါပြောပြီး ဖုန်း ပိတ်သွားပါတယ်””(စာမျက်နှာ ၇၄)

ဝဏ္ဏလင်း

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*