မော်တော်ကားများ တစ်စီးပြီး တစ်စီး ဆက်တိုက်သွားနေသော ရန်ကုန်မြို့၊ ကြည့်မြင်တိုင်မြို့နယ် လမ်းမကြီး ပေါ်တွင် လမ်းလျှောက် တတ်ကာစ အရွယ် ကလေးငယ်တစ်ဦး လမ်းမအလယ်တွင် ဒယိမ်းဒယိုင် လျှောက် သွား နေသည်။ အနီးအနား ပတ်ဝန်းကျင်နှင့် လမ်းသွားလမ်းလာ လူအများက ယင်းကလေးငယ် ကားတိုက် မိမှာကို လွန်စွာ ထိတ်လန့် ကြပြီး “ကလေးငယ် တစ်ဦးတည်း ကားလမ်းပေါ် လျှောက်သွားနေတာ ဘယ်မိဘက ဒီလို ပြီးစလွယ် ကိုယ့်ကလေး ကို မကြည့်ဘဲ လွှတ်ထားသလဲ”ဟု စဉ်းစားနေကြ၍ ကလေးငယ်ကို ခေါ်ကာ သူ၏ မိဘဖြစ်သူကို ရှာဖွေကြည့် ကြသည်။ ရှာနေသူကို အရိပ်အယောင်မျှ မမြင်ရချေ။ ကလေးငယ်သည် ဤနေရာတွင် မိဘ၏ စွန့်ပစ်ခြင်းကို ခံရလေသည်။ သူ၏ ဘဝသည် မိဘမဲ့ အဖြစ်သို့ ရောက်ခဲ့ပြီး သက်ဆိုင်ရာ မြို့နယ်ရဲစခန်းမှ တစ်ဆင့် အကြောင်းမျိုးစုံကြောင့် သူကဲ့သို့ ဘဝများရှိရာ မြတ်မေတ္တာ (Grace Home) ကလေးများ ရိပ်မြုံသို့ သူရောက်ရှိကာ ဘဝတစ်ခု အစပြုခဲ့လေသည်။

ထိုကဲ့သို့သော အခြေအနေ မျိုးစုံဖြင့် အစပြုကြသည့် ဘဝများ၏ ခိုလှုံရာ ဖြစ်သော မြတ်မေတ္တာ (Grace Home) ကလေးများ ရိပ်မြုံကို ယခုတစ်ပတ်၏ အုတ်တစ်ချပ် သဲတစ်ပွင့်ကဏ္ဍတွင် ဖော် ပြပါသည်။

မြတ်မေတ္တာ ကလေးများ ရိပ်မြုံ မြင်ကွင်း တစ်ခု

မြတ်မေတ္တာ ကလေးများ ရိပ်မြုံ မြင်ကွင်း တစ်ခု

ကလေးများရိပ်မြုံကို စတင် တည်ထောင်သူသည် မိဘမရှိ ခိုကိုး ရာမဲ့ ကလေးများဘဝကို စာနာပြီး ကလေးများ ကို မေတ္တာပေးပြုစုပျိုး ထောင်လိုသော စိတ်နှင့် မိမိတတ်နိုင် သမျှ ကလေးများ၊ လူငယ်များကို ကျောင်းထားပေးရန်နှင့် အလုပ်အကိုင် ရှာဖွေပေးရန် ခိုကိုးရာမဲ့ ကလေး ငယ် ၅ ယောက်ဖြင့် တစ်ပိုင်တစ် နိုင် စတင်လုပ်ဆောင်ခဲ့သည်။

ထို့နောက် မြတ်မေတ္တာ (Grace Home) မိဘမဲ့ ကလေးများရိပ်မြုံကို ၁၉၉၇ ခုနှစ်၊ ဇန်နဝါရီ ၂၇ ရက်တွင် ရန်ကုန်မြို့၊ ကြည့်မြင်တိုင် မြို့နယ်၊ အမှတ် ၁၂၊ ဦးဖိုးခင်လမ်း ကရင်အမျိုးသား ရပ်ကွက်၌ စတင် တည်ထောင် ခဲ့ပြီး အခြား မြို့များတွင်လည်း ဒုတိယ Grace Home နှင့် တတိယ Grace Home များကို တည်ဆောက် ခဲ့သည်။ တောင်ငူတွင် ဆောက်လုပ်ခဲ့သော ဒုတိယ Grace Home အဆောက်အအုံကို မြန်မာနိုင်ငံ ခရစ်ယာန် အသင်းတော်သို့ လွှဲပြောင်းပေးခဲ့သည်။ ထို့ကြောင့် ယခုအချိန်တွင် ရန်ကုန်ရိပ်မြုံနှင့် ပဲခူးရိပ်မြုံ ၂ ခု တွင်သာ ကလေးများ ထားရှိပြီး စောင့်ရှောက်နေကြောင်း သိရသည်။

မြတ်မေတ္တာ (Grace Home) ကလေးများပြုစုရာ ရိပ်မြုံစတင် တည်ထောင်ခဲ့စဉ်မှ ယနေ့ထိ ၁၆ နှစ်တာ ကာလအတွင်း ကလေးငယ် ၁၆၅ ယောက် ကို ပြုစု ပျိုးထောင် ပေးနိုင်ကြောင်း၊ ဆယ်တန်းအောင် တက္ကသိုလ် ရောက်ပြီး မိမိတို့ ခြေထောက်ပေါ် ရပ်တည်နိုင်၍ ဂေဟာမှ ထွက်ခွာပြီး အလုပ် လုပ်နေကြသူများ ရှိကြောင်း၊ ယခုလက်ရှိ ကလေးများ ရိပ်မြုံ နှစ်ခုတွင် ကလေးငယ် ၈ဝ ဦး နေထိုင်၍ ၇ဝ ကျော်သည် ကျောင်းနေ အရွယ်များ ဖြစ်၍ ကျောင်းတက်နေ ကြကြောင်း တည်ထောင်သူ  ဆရာမကြီး အဲမရေလားမြတ်က ပြောကြား သည်။ မြတ်မေတ္တာ (Grace Home) တွင် နို့စိုကလေး မှစ၍ အသက် ၅ နှစ်အောက် ကလေးများနှင့် ကလေးအမျိုးအစား ၄ မျိုးဖြင့် ဦးစားပေး လက်ခံသည်။

မိဘလုံးဝမရှိသော ခိုကိုးရာမဲ့ ကလေးများ အလွန်ဆင်းရဲပြီး ခက်ခဲသော ဒေသများမှ ပညာရေးထူးချွန်သော ကလေးများ၊ အမိအဖ တစ်ဦးဦး မရှိတော့၍ ခိုကိုးရာ မဲ့နေသည့် ကလေးများ၊ စွန့်ပစ်ခံရသော ကလေးများကို လက်ခံထားသည်။ ကလေးများသည် ဝမ်းနည်းစရာ နောက်ကြောင်း ရာဇဝင် အမျိုးမျိုး၊ နေရာဒေသ အမျိုးမျိုးမှ မြတ်မေတ္တာ သို့ ရောက်ရှိလာကြသည်။ အချို့မှာ  မိတ်ဆွေများမှလည်းကောင်း၊ အသင်းတော်များမှ လည်းကောင်း၊ အမှုတော်ဆောင် များမှလည်းကောင်း၊ သက်ဆိုင်ရာ မြို့နယ် ရပ်ကွက် အာဏာပိုင် အဖွဲ့ အစည်း များမှလည်းကောင်း၊ ရဲစခန်းမှ လည်းကောင်း လာရောက် အပ်နှံသော ကလေးများ ဖြစ်သည်။ အပ်နှံရာတွင်လည်း သက်ဆိုင်ရာ အသင်းတော်၊ အဖွဲ့အစည်း၊ ရဲစခန်း တို့မှ အကြီးအကဲတို့၏ ထောက်ခံ ချက် ပါရှိရမည် ဖြစ်ပြီး လာရောက် အပ်နှံသူများကလည်း ကတိဝန်ခံချက် လက်မှတ် ရေးထိုးပေးရမည် ဖြစ်သည်။

ကလေးများသည် မေတ္တာငတ်  နေသောသူများဖြစ်သဖြင့် “မြတ်မေတ္တာ”အပြည့် အဝပေးလျက် ပြုစု ပျိုးထောင်သောအခါ မိမိတို့၏ ကြမ်းတမ်းသော ဘဝဆိုး ကို မေ့လျော့ပြီး ဘဝသစ်တွင် ကျန်းမာ ပျော်ရွှင်စွာ နေထိုင်၍ ပညာသင် ကြားလျက် ရှိကြသည်။

ကလေးများကို ထိန်းကျောင်း ကျွေးမွေးမှုနှင့် ပတ်သက်၍ ဆရာမကြီး အဲမရေးလာမြတ်က “နို့စို့ကနေ ရက်သား၊ လသား စွန့်ပစ်ခံရတဲ့ ကလေးတွေ များတယ်။ အဲဒီကလေးတွေ မူကြိုအရွယ် ရောက်တဲ့အခါ ဒီမှာ မူကြိုဖွင့်ပေး တယ်။ ရပ်ကွက်ထဲက မတတ်နိုင်တဲ့ မိဘတွေရဲ့ ကလေးတွေအတွက် ရည်ရွယ်ပြီး ဖွင့်တယ်။ မူကြိုကျောင်းလခ ကို တော့ မတတ်နိုင်တဲ့ ကလေးတွေကို အခမဲ့ တက်ရောက်စေတယ်။ မိဘ မရှိတဲ့ ကလေးတွေအတွက် အလှူ ငွေလည်း လက်ခံပါတယ်။ အပယ်ခံရတဲ့ ကလေးတွေ ပညာတတ်စေချင်တဲ့ ရည်ရွယ်ချက်နဲ့ ကျောင်းထား ပေးပြီး တတ်နိုင်သလောက် သူတို့ ဉာဏ်ရည်လေး ရှိသလောက် ပညာကို ရအောင်ယူခိုင်းပြီး အသက်မွေး ဝမ်းကျောင်း သင်တန်းတွေ ပို့ပြီး သူ့ ခြေထောက်ပေါ် သူရပ်တည်နိုင်အောင် ကြိုးစားပေးပါတယ်”ဟု ပြောကြားခဲ့သည်။

မြတ်မေတ္တာ (Grace Home) ကလေးများ ရိပ်မြုံသည် တစ်ဦးချင်း အလှူရှင်များ၏ အလှူငွေများဖြင့် ရပ်တည်၍ နေ့စဉ် ကလေးများကို ထမင်း ၃ နပ် ကျွေးမွေး၍ အဆာပြေမုန့်များကိုလည်း တစ်ခါတစ်ရံ ကိုယ်တိုင် လုပ်၍ ကျွေးကြောင်း၊ ထမင်းချက်ရန် မီးဖိုချောင်ဝန်ထမ်း နှင့် ကလေးကြည့်ရသည့် ဝန်ထမ်းများ ရှိကြောင်း၊ အချို့ဝန်ထမ်း များသည် ရိပ်မြုံမှ ၁ဝ တန်းအောင် ပြီး ကျောင်းတက်နေသည့် ကလေးများကို ဝန်ထမ်းပြန်ခန့်၍ ရိပ်မြုံ၏ ကိစ္စရပ်များကို ဆောင်ရွက်စေကြောင်း သိရသည်။

ပဲခူးရှိ (Grace Home) ကလေးများ ရိပ်မြုံကို အသက်မွေး ဝမ်းကြောင်း ပညာဌာနအဖြစ် သတ်မှတ်၍ အချုပ် အလုပ်၊ ဇာထိုး၊ ပန်းထိုး လက်မှုပညာ အမျိုးမျိုး၊ အချက်အပြုတ်နှင့် မုန့်အမျိုးမျိုး လုပ်နည်း၊ ဆံပင်ညှပ် အလှပြင် သင်တန်း၊ ကွန်ပျူတာ သင်တန်း၊ လက်သမား အတတ်ပညာ၊ စိုက်ပျိုးရေး ပညာ၊  ကြက်၊ ဘဲ၊ ဝက်မွေးမြူရေး ပညာ၊ ကလေးများ ကြည့်ရှုပြုစု ပျိုးထောင်ရေး အတတ်ပညာ၊ မူကြိုကလေးများကို သင်ကြားရေး ပညာ၊ စန္ဒယား၊ Key Board ၊ ဂီတာ၊ တယော၊ ပုလွေ၊ သီဆိုမှု အတတ်ပညာ အစရှိသည့် အနုပညာ သင်တန်းများ၊ လုပ်ငန်းရှင်များနှင့်  ဆက်သွယ်၍  အလုပ်အကိုင် ရှာဖွေပေးခြင်း စသည်တို့ကို သင်ကြား ဆောင်ရွက်ပေးကြောင်း သိရသည်။

မြတ်မေတ္တာ စတင် တည်ထောင်ချိန်မှစ၍ ယနေ့အထိ ၁ဝ တန်း စာမေးပွဲ အောင်မြင်သူများ ရှိခဲ့ပြီး ၂ဝဝဝ ပြည့်နှစ် တွင် အောင်မြင်သော ယောကျာ်းလေး ၂ ယောက်သည် (Grace Home) ၏ အဦးဆုံး အောင်မြင်သူများ ဖြစ်ခဲ့ပြီး တစ်ဦးမှာ ၁ဝ တန်း အောင်ပြီးနောက် ကွန်ပျူတာ သင်တန်း ပြီး၍ တြိနတိ အသင်းတော်တွင် အသင်း၏ တာဝန်များကို ဆက်လက် လုပ်ဆောင်နေသည်။ ကျန် တစ်ဦးမှာ M.I.T ၌ ဖွင့်ထားသည့် BARS သင်တန်းတွင် တက်ရောက် သင်ကြား သည်။ အခြား ၁ဝ တန်းအောင် ကလေးများတွင် အချို့သည် တက္ကသိုလ် တက်ရောက်နေဆဲ ဖြစ်ပြီး ကျောင်းတွင် ကလေးငယ်များကို ပြန်လည်ကူညီ ထိန်းပေးသည်ဟု သိရသည်။

(Grace Home) ကလေးများ ရိပ်မြုံမှ ၁ဝ တန်းအောင်မြင်ပြီး ကျောင်းတက်နေဆဲ ဖြစ်သည့် မနွယ်နီက “ဒီမှာ လောလောဆယ်တော့ မိသားစုတစ်ခု လိုပါပဲ။ အရင် မိသားစုနဲ့ မနေခဲ့ရတော့ ကိုယ့်မိသားစုလို ခံစားရတယ်။ တစ်ခါတလေ အချင်းချင်း အခန့်မသင့်လို့ စကားများရင်လည်း ကိုယ့်မိသားစု ဖြစ်တဲ့အတွက် အချိန်တန်ရင် ပြန်ပြေတာပါပဲ” ဟု ပြောကြားခဲ့သည်။

မြတ်မေတ္တာ (Grace Home) ရန်ကုန်သို့ ဆက်သွယ်လိုပါက အမှတ် ၁၂ ၊ ဦးဖိုးခင်လမ်း ကရင် အမျိုးသား ရပ်ကွက်၊ ကြည့်မြင်တိုင် မြို့နယ် ဖုန်း-ဝ၁၂၂ဝ၄၇၂ သို့ ဆက်သွယ်နိုင်ကြောင်း သိရသည်။

ဝဝ၅

ဆက်စပ်သတင်းများ

အရုဏ်ဦး လူမှုကူညီရေး အသင်း

ရန်ကုန်၊ ဖေဖော်ဝါရီ ၁၇၊ ၂ဝ၁၃
ခရေမိသားစု ဒါနပြုအဖွဲ့

ခရေမိသားစု ဒါနပြုအဖွဲ့

ရန်ကုန်၊ ဇန်နဝါရီ ၂ဝ၊ ၂ဝ၁၃

ဘဝမြင့်မိုရ်

ရန်ကုန်၊ ဒီဇင်ဘာ ၂၂၊ ၂ဝ၁၂

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*