အယ်ဒီတာ့စကား — September 26, 2012

စီးပွားရေး ပိတ်ဆို့မှု ဟူသည် မြန်မာ့နိုင်ငံရေး အပြောင်းအလဲအတွက် လက်နက်တစ်ခုသဖွယ် အတိတ်တွင် အသုံးချခံ ခဲ့ရပြီးနောက် ယခုအခါ ပိတ်ဆို့မှုများ  ဖြေလျှော့ခြင်းနှင့်  ပြည်ပ ရင်းနှီးမြှုပ်နှံမှုတို့ကို  အနာဂတ် မြန်မာ့နိုင်ငံရေး အပြောင်းအလဲ အတွက် လိုအပ်ချက်တစ်ခုသဖွယ် အသုံးပြု လာပေသည်။ ထိုသဘောတရား အပေါ် အချို့သော နိုင်ငံရေး လှုပ်ရှားသူများက လွယ်လင့်တကူ လက်ခံနိုင်ရန် အဆင်သင့် မဖြစ်သေးပေ။ သို့ရာတွင် မြန်မာ့နိုင်ငံရေး အပြောင်းအလဲ အတွက် အခြေခံကျပြီး အဓိက ကျသော လက်နက်မှာ ပြည်ပရင်းနှီး မြှုပ်နှံမှုချည်း သက်သက် ဖြစ်ပါသလား။

မြန်မာ့စီးပွားရေး ချွတ်ခြုံကျရသော ပြဿနာများကို ဖြေရှင်းရာတွင် ငွေပင်ငွေရင်း တစ်ခုတည်းကိုသာ တရားခံ အဖြစ် မြင်လျှင် ကျဉ်းမြောင်းသော အမြင်သာ ဖြစ်ပေလိမ့်မည်။ လူသားရင်းမြစ်၊ မူဝါဒနှင့် သယံဇာတ၊ ပစ္စည်း ပစ္စယ စသည့် အခြားအရေးပါသော တွန်းအားသုံးခု၏ အားနည်းချက်ကို ပြင်ဆင်နိုင်မှု မရှိလျှင် ငွေပင်ငွေရင်း ရင်းနှီးမြှုပ်နှံမှု ဟူသည် ပလိုင်းပေါက် နှင့် ဖားကောက်သကဲ့သို့လည်းကောင်း၊ အပေါက်ပါသည့် အိုးကို ရေဖြည့် သကဲ့သို့ လည်းကောင်း လိုက်မဆုံး ဖြစ်ကာ အကျိုးများမည် မဟုတ်ပေ။

လက်ရှိ ဖြစ်ပွားနေသော လယ်ယာမြေ အရေးနှင့် လယ်သမား ပြဿနာများ၊ အလုပ်သမား အရေးနှင့် အလုပ်သ မား ပြဿနာများ အပါအဝင် တစ်နိုင်ငံလုံး အတိုင်းအတာနှင့် ဖြစ်ပွားနေသော အခွင့်အရေးနှင့် အကျိုးစီးပွား ဆိုင်ရာ ပဋိပက္ခများတွင် ငွေပင်ငွေရင်း ရင်းနှီးမြှုပ်နှံမှု ကိုယ်တိုင်ပင် ပြဿနာ၏ အစိတ်အပိုင်း ဖြစ်နေသည်ကို ရှုမြင်ရ ပါမည်။ ငွေရှင် ကြေးရှင်များ၏ ရင်းနှီးမြှုပ်နှံမှုကို မည်သည့် မူဝါဒများဖြင့် လက်ခံမည် နည်း ဆိုသည်မှာ အရေးကြီးသည့် နည်းတူ မည်သူတို့က ထိုမူဝါဒအတိုင်း လိုက်နာကာ ဆုံးဖြတ် လုပ်ကိုင် ကြမည် ဆိုသည်မှာ အရေးပါသည့် သော့ချက် ပင် ဖြစ်ပါသည်။ နိုင်ငံ့ဝန်ထမ်းများက တစ်ကိုယ်ရည် ထွက်ပေါက် အတွက် တန်စိုးလက်ဆောင် လာဘ်လာဘ ကို မျှော်ကိုး ကာ ငွေပင်ငွေရင်း ရင်းနှီးမြှုပ်နှံမည့် စီးပွားရေး သမား များအား နိုင်ငံတော်၏ မူဝါဒနှင့် ဥပဒေများကို လက်တစ်လုံးခြား လုပ်ပြီး အခွင့်အလမ်းများ ရှာဖွေလမ်းညွှန် ပေးလာကြသည့် အတွက်လည်း လယ်သမား၊ အလုပ်သမား လူတန်းစားများမှာ အကာအကွယ်မဲ့ လာကြသည်။ ထို့ကြောင့် ရင်းနှီးမြှုပ်နှံမှု သက်သက်သည် မြန်မာ့ စီးပွားရေး ထွက်ရပ် လမ်း မဟုတ်ချေ။

တံခါးပိတ်မူဝါဒကို ကျောခိုင်းပြီး တံခါးဖွင့် မူဝါဒကို ကျင့်သုံးမည်ဟု ယခင် အစိုးရ တက်ခါစ ကတည်းက ကြွေးကြော်ခဲ့ သည့်တိုင် တစ်နိုင်ငံလုံး အတိုင်းအတာဖြင့် စီးပွားရေး ချွတ်ခြုံကျမှုကို ရင်ဆိုင်ခဲ့ရခြင်းမှာ ရင်းနှီးမြှုပ်နှံမှု အပါအဝင် စီးပွားရေး လုပ်ထုံးလုပ်နည်း မူဝါဒ သတ်မှတ်ချက်များ မခိုင်မာခြင်းနှင့် ထိုမူဝါဒများကို ကျင့်သုံး အကောင် အထည် ဖော်ကြသည့် လူသားရင်းမြစ်များတွင် စွမ်းဆောင်ရည်၊ စိတ်စေတနာ၊ ဖြောင့်မတ်မှု နှင့် အမြော်အမြင်များ အားနည်းနေခြင်း တို့ကြောင့်ပင် ဖြစ်ပါသည်။ ထိုနမူနာကို သင်ခန်းစာအဖြစ် ရှုမြင်ကြ ရပါမည်။ နိုင်ငံတကာ အဆင့်ကို မျှော်မှန်းကြသည် ဆိုရာတွင် အာရှဒေသတွင်း အဆင့်ကိုပင် ဦးစွာရှေ့ရှု ကြရပါဦးမည်။ ထိုအခါ မီဒီယာ ကဏ္ဍအတွက် ပြည်ပ ရင်းနှီး မြှုပ်နှံမှုကိုလည်း ထည့်သွင်းစဉ်းစားရန် လိုအပ် လာပြီဟု ဆိုချင်ပါသည်။ လုံခြုံရေး အကြောင်းပြချက်ဖြင့် မီဒီယာကို နိုင်ငံတွင်း ရင်းနှီးမြှုပ်နှံမှု သက်သက် သဘော တံခါးဆက်ပိတ် ထားဦးမည် ဆိုလျှင် မြန်မာ့မီဒီယာသည် အာရှဒေသတွင်းသို့ ထိုးဖောက်ရန်ပင် ခက်ခဲပါဦးမည်။

ထို့ကြောင့် မည်သည့်ကဏ္ဍများတွင် ပြည်ပရင်းနှီးမြှုပ်နှံမှုကို ပေးအပ်မည်ဆိုသည့်  ဆုံးဖြတ်ချက်မှာလည်း  အရေးပါ လှပါသည်။ ပြည်ပ ရင်းနှီးမြှုပ်နှံမှုနှင့်အတူ မျှော်လင့်နိုင်သော အကျိုးအမြတ်သည် နည်းပညာနှင့် အရည် အသွေးမြင့် လူသားရင်းမြစ်တို့လည်း ဖြစ်ရပါ မည်။ မည်မျှ ကောင်းမွန်သည့် ဥပဒေနှင့် မူဝါဒများကို ချမှတ်ထားလင့် ကစား အရည်အသွေး မရှိသော၊ ဥပဒေကို မလေးစားသော၊ ပြည်သူ့နီတိကို မလိုက်နာသော၊ တာဝန် မသိတတ်သော လူသား များက ထိုမူဝါဒများကို ကျင့်သုံးမည် ဆိုလျှင်လည်း ထိရောက်သော အကျိုး ကျေးဇူးနှင့် အပြောင်းအလဲ ကို မျှော်လင့်နိုင်ကြမည် မဟုတ်ပေ။ ပြည်ပ ရင်းနှီးမြှုပ်နှံမှု များကို ပြည်တွင်းလူထု အကျိုးငှာ မျှော်လင့်ကြရာတွင် အလုပ်အကိုင် အခွင့်အလမ်း သက်သက် မဖြစ်စေဘဲ နည်းပညာနှင့် စွမ်းဆောင်ရည် သာမက တာဝန်သိစိတ်ကိုပါ ယခုထက် ပိုမိုမျှော်လင့်နိုင်ကြမည် ဆိုလျှင် သဘာဝကျပါမည်။

ငွေပင်ငွေရင်း သာမက နည်းပညာနှင့် လူသားရင်းမြစ်များ တောင့် တင်းခိုင်မာကာ စွမ်းဆောင်ရည် မြင့်မားမှ သာ ထိရောက်သော စီးပွားရေး အပြောင်းအလဲနှင့် အကျိုးအမြတ် ကို မျှော်လင့်နိုင်ကြမည် ဖြစ်ပါသည်။ ထိုအရာအားလုံး တိုးတက် ကောင်းမွန်ရေး သော့ချက်မှာ မူဝါဒကို မည်မျှထိ လွတ်လပ် ပွင့်လင်းစွာ၊ သို့သော် ခိုင်မာ တောင့်တင်းစွာ ချမှတ်နိုင်မည် နည်းနှင့် ထိုမူဝါဒများအတိုင်း ကျင့်သုံးနိုင်မည့် လူသားရင်းမြစ်များကို မည်ကဲ့သို့ ပျိုးထောင်မည်နည်း ဆိုသည့်အချက် ဖြစ်ပါသည်။ ထို့ကြောင့် ငွေကို အဖြေအဖြစ် မမြင်ကြဘဲ မူနှင့်လူကို ခိုင်မာအောင် အားထုတ်ကြပါစို့။

လွတ်လပ်သော နိုင်ငံသား စိတ်ဓာတ်ဖြင့် ပြည်သစ်တည်အံ့။

အယ်ဒီတာ

သတင်းမျှဝေရန်

About Author

စာဖတ်သူ မှတ်ချက်များ (၁)

  1. သဘောကျတယ်။ဒီအတွေးအခေါ် ကျယ်ပြန့်အောင်ဆောင်ရွက်သင့်ပါတယ်

Leave a Reply

Your email address will not be published. Required fields are marked *

*