အယ်ဒီတာ့စကား — ဇန်နဝါရီ ၂၊ ၂ဝ၁၃

လူများ၊ ဘက်များနှင့် မူများ၊ ကျင့်ဝတ်များ

နှစ်သစ်ကူးကာလသို့ ရောက်လာပါပြီ။ ၂ဝ၁၂ ခုနှစ်ကုန်ဆုံး၍ ၂ဝ၁၃ ခုနှစ်သို့ ရောက်ပေပြီ။ နှစ်သစ် ဆန်းစစ်ချက် များ၊ မျှော်လင့်ချက်များကို ပြောကြ တွေးကြမည့် အခါလည်း ရောက်ပေပြီ။ လူတစ်ဦးချင်းစီ အတွက် နှစ်သစ် မျှော် လင့်ချက်များ၊ သံန္နိဌာန်များ ချမှတ်သည့်နည်းတူ နိုင်ငံတစ်နိုင်ငံ အတွက်လည်း နှစ်သစ် သံန္နိဌာန်များ ချမှတ်ကြရပေဦးမည်။ ထိုသံန္နိဌာန်သည် နိုင်ငံသားများအားလုံးက ဘုံပိုင်ဆိုင်သော၊ ဘုံမျှထမ်းရမည် ဖြစ်သော ဆုံးဖြတ်ချက်နှင့် တာဝန်လည်း ဖြစ်ပါသည်။

သို့ဆိုလျှင် ၂ဝ၁၃ ခုနှစ်အတွက် မည်သည့် သံန္နိဌာန်ကို ချမှတ်ကြ မည်နည်း။ ဒီမိုကရေစီ ပန်းတိုင်ဆီသို့ ဆက်လက် ချီတက်ရန်ဟု လွယ်လွယ်ပြောလျှင် အဆင်ပြေနိုင်ပါမည်။ သို့သော်ထိုပန်းတိုင်သို့ မည်သို့မည်ပုံ ချီတက်မည်နည်း ဆိုသည့် မေးခွန်းကိုဖြေဖို့ လိုပါလိမ့်မည်။ ထိုမည်သို့ မည်ပုံ ချီတက်မည်ဆိုသည့် အဖြေသည် ပင်လျှင် ၂ဝ၁၃ အတွက် သံန္နိဌာန်ကို ပြဌာန်းနိုင်မည် ဖြစ်ပါသည်။ အတိတ်ကာလ တစ်လျှောက်တွင် အုပ်ချုပ် သူနှင့် အုပ်ချုပ်ခံ၊ တစ်ပါတီ အာဏာရှင်စနစ်နှင့် သူ၏ပြည်သူ၊ စစ်အုပ်ချုပ်ရေးနှင့် သူ အနိုင်ကျင့်ခံရသော လူထု၊ အစိုးရနှင့်အတိုက်အခံ စသဖြင့် ဘက်နှစ်ဖက်ကိုသာ ယဉ်ပါးခဲ့ကြသဖြင့် သူ့ဘက်ကိုယ့်ဘက်ဟု ရွေးချယ် စရာနှစ်ခုကို လူအပေါ် အခြေခံကာ ရွေးခဲ့ကြ ပြီးဖြစ်ပါသည်။  ထို့ကြောင့် ဘက် တစ်ဘက်ဘက်ကို ထောက်ခံ ရေးနှင့် အားကိုးရေးသည်သာ နိုင်ငံသားများအတွက် အဖြေလည်း ဖြစ်၊ သံန္နိဌာန်လည်း ဖြစ်ခဲ့ကြပါပြီ။ ထို့ကြောင့် ပဋိပက္ခ ဖြစ်စေ၊ ဖြစ်ရပ်တစ်ခုဖြစ်စေ ပေါ်ပေါက်လာလျှင် ဘက်တစ်ဖက်ဖက်ကို အမှန်အဖြစ် သတ်မှတ်ကာ အနိုင်ပေးရေး၊ အားပေးရေးကိုသာ မဲတင်း ဆုံးဖြတ်ခဲ့ကြပါသည်။ သည်သို့ သည်နှယ် ဆုံး ဖြတ်ခြင်းသည် ဒီမိုကရေစီပန်းတိုင်သို့ ဦးတည်သည့် နည်းလမ်းအမှန်ဖြစ် မဖြစ်ကို ဆန်းစစ်ကြရန် လိုအပ်သည့် ကာလသို့ ရောက်ပြီဟု ဆိုချင်ပါသည်။ ယနေ့နိုင်ငံတော်မှ ဦးတည်လျှောက်ရမည့်လမ်းသည် ပါတီစုံ ဒီမိုကရေစီ စနစ်ဖြစ်ရာ ဘက်နှစ်ဖက် အတွေးအခေါ်သည် မလုံလောက်တော့ပါချေ။ အတိုက်အခံဟုဆိုလျှင် တစ်ပါတီ၊ တစ်ဦး တစ်ယောက်ဟု မြင်၍ ရနိုင်တော့သည့် အနေအထားတွင်လည်း မရှိတော့ပါ။ အစိုးရဟု ဆိုရာတွင်ပင် သူ့အရိပ်ကို မျှနေသော၊ သူ့အနောက်မှာ ရပ်နေသော အခြားအခြားသောပါတီများ၊ အဖွဲ့အစည်းများ ရှိနေပြီး ဖြစ်နေပါပြီ။

ဖြစ်ရပ်တစ်ခု၊ ပဋိပက္ခတစ်ခု ပေါ်ပေါက်လာသည့်အခါ အတိတ်က တွေးရိုးတွေးစဉ်၊ ဆုံးဖြတ်ရိုး ဆုံးဖြတ်စဉ်များ အတိုင်း သူ့ဘက်က မှားပြီး ထိုဘက်ကို ဆန့်ကျင်သောဘက်က မှန်သည်ဟု တွေးတော ဆုံးဖြတ်မည် ဆိုလျှင် နှစ်သစ် သံန္နိဌာန် ဖြစ်ရန် ခဲယဉ်းပါမည်။ တစ်နည်းအားဖြင့် ဒီမိုကရေစီ နည်းကျ၊ မကျဟု ပြောရန် ခက်ခဲပါလိမ့် မည်။ ဒီမိုကရေစီနည်း ကျစေရန် မည်သည့်မူဝါဒများကို အခြေခံကာ ဆုံးဖြတ်တွေးတောသင့် ကြောင်း နိုင်ငံသားများအား အသိပေးနိုင်ခြင်း မရှိသမျှ ကာလပတ်လုံး နိုင်ငံသားများသည် ရန်နှင့်ငါဟုသာ အလွယ်ဆုံး ပိုင်းခြားဆုံးဖြတ်ကြဦး မည်ဖြစ်ပါသည်။ မောင်ဖြူမဟုတ်လျှင် မောင်မဲဟု လွယ်ကူစွာ စွပ်စွဲ တရားစီရင်ခဲ့ သည့် ခေတ်ကို အဆုံးသတ် ချင်နေသည့်နိုင်ငံသားများအတွက် မိမိတို့၏အဆုံးအဖြတ်များကို မည်သည့် မူဝါဒများ ပေါ်တွင် အခြေခံပါမှ အတိတ်ထုံးကိုဖောက်ထွက်ကာ ဒီမိုကရေစီနည်းကျမည်ဟုသိနိုင်ရန် နိုင်ငံရေးသမား၊ နိုင်ငံရေး လှုပ်ရှားသူများဟု မိမိကိုယ်မိမိ ခံယူထားသူများ က ကြိုးပမ်းအားထုတ်ကြရပါမည်။ လူကို အခြေခံကာ ရွေးချယ်ခြင်း၊ စိတ်ခံစားမှုအရ ပိုမိုအားနည်းနိမ့်ကျသူ၊ ဖိနှိပ်ခံရသူဘက်မှ ရပ်တည်ရန် ဆုံးဖြတ်ခြင်းစသည့် ဖြစ်ရပ် အခြေပြု အတွေးအခေါ်များသည် ဒီမိုကရေစီ လူ့ဘောင်ကို တိုက်ရိုက်အကျိုးပြုနိုင်မည် မဟုတ်ဘဲ ထုံးတမ်းစဉ်လာ ရန်-ငါ စည်းသားသည့် အနိုင်ပြတ်၊ အရှုံးပြတ် အဖြေများကို သာ မွေးဖွား စေဦးမည် ဖြစ်ပါသည်။ ထိုအဆုံးအဖြတ်တွင် နိုင်ငံသားများ၏ အခန်း ကဏ္ဍမှာလည်း ကိုယ်ပိုင်အစွမ်းအစကို အသုံးချကာ သက်ဆိုင်ရာ ဘက်များ၏ မူဝါဒများကို လေ့လာ သုတေသနပြုပြီးကာမှ အားကိုးထောက် ခံခြင်း မဟုတ်နိုင်ရာ နိုင်ငံသားများ အား၊ ဘက်များကို ထောက်ခံသူများ ဘဝတွင်သာ ချန်ထားကြပေဦးမည်။ ပြဿနာများ၊ ပဋိပက္ခများကို သက်ဆိုင်ရာ မူဝါဒများ၊ ကျင့်ဝတ်များအတိုင်း ရင်ဆိုင်ခြင်း၊ ကိုင်တွယ် ဖြေရှင်းခြင်းအားဖြင့် ဘက်နှစ်ဖက် သာမက ဘက်မည်မျှပင် ရှိစေကာမူ မည်သူမျှ အနစ်နာခံရန်မလို၊ မည်သူမျှ အသာစံရန်မရှိဘဲ အားလုံးသော နိုင်ငံသားများ၏ အကျိုး အလို့ငှာသော အဖြေမျိုး ပေါ်ထွက်နိုင်ကြောင်းကို နိုင်ငံသားများ ကိုယ်တိုင် သဘောပေါက် လက်ခံလာကြရန်နှင့် ယင်းတို့ ကိုယ်တိုင်လွတ်လပ်စွာ ဆုံးဖြတ်ခွင့်ရရန်မှာ အရေးကြီးလှ ပါသည်။ ထိုကဲ့သို့သော ဘက်ပေါင်းစုံမှ လူပေါင်းစုံ၏ ဘုံအကျိုးစီးပွား အလို့ငှာ ဦးတည် သော မူဝါဒ၊ ကျင့်ဝတ် များကြောင့် ပေါ်ထွက်လာသည့် အဖြေကို နိုင်ငံသား အားလုံးက သာတူညီမျှကြိုးပမ်းအဖြေရှာမှသာ ပဋိပက္ခများ သည် တစ်ပွဲတိုး မဟုတ်ဘဲ ထာဝရ ဖြေရှင်းပြီးရာ ကျရောက်ပါလိမ့်မည်။

သို့ဖြစ်ရာ ၂ဝ၁၃ ခုနှစ်အတွက် သံန္နိဌာန်ကို နိုင်ငံသားများအကျိုး အတွက်အလို့ငှာ လူများ၊ ဘက်များ ဆိုသည် ထက် မူများ၊ ကျင့်ဝတ်များ အခြေခံကာ ဖြေရှင်းသွားကြရန် သံန္နိဌာန်ကို ချကြပါစို့ဟု တိုက်တွန်း လိုက်ရပါ သည်။

လွတ်လပ်သော နိုင်ငံသားစိတ်ဓာတ်ဖြင့် ပြည်သစ်တည်အံ့။

အယ်ဒီတာ

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*