အယ်ဒီတာ့စကား — February 02, 2013

တစ်သွေးတည်း တစ်သံတည်းနှင့် တစ်သားတည်း တစ်သံတည်း     

ကချင်ပြည်နယ်ရှိ လက်ရှိဖြစ်ပွားနေသော လက်နက်ကိုင် ပဋိပက္ခများနှင့် ပတ်သက်သည့် သတင်းများကို အခါမလပ် အသိပေးနိုင်သဖြင့်  ကေအိုင်အေ/ကေအိုင်အို တို့မှာ တပ်မတော်၏ အသာစီးရယူမှုကို ခံနေရသည်ဟု မြင်စရာ ဖြစ်နေ ပါသည်။ နိုင်ငံပိုင်မီဒီယာ မဟုတ်သည့် မီဒီယာများတွင် မမှန်မကန် သတင်းများ ကို ဖော်ပြ နေသည်ဟု ကာကွယ်ရေး ဝန်ကြီးဌာနကလည်း ဆိုပါသည်။ သတင်းများကို ဘက်မ လိုက်ဘဲ ရေးသားနိုင်ရန် လိုအပ်ချက်မှာ နှစ်ဦးနှစ်ဖက်က သတင်းများကို အချိန်နှင့် တစ်ပြေးညီ ထုတ်ပြန်ပေးရန်သာမက မီဒီယာများ၏ မေးမြန်းမှုများကို မိမိတို့အတွက် ဖြေရှင်း တင်ပြခွင့် အခွင့်အလမ်းရသည်ဟု သဘောထားကာ လွတ်လပ် ပွင့်လင်းစွာ ရှင်းလင်း ဖြေကြားရန်လည်း ပါဝင်ပါသည်။ ပုဂ္ဂလိက သတင်းမီဒီယာများတွင် တပ်မတော်ဘက်မှ သတင်းများကို မဖော်ပြနိုင်ခဲ့ကြသည့် အတွက် လည်း ကေအိုင်အေ ဘက်က သတင်းများက လွှမ်းမိုးနေခဲ့ကြခြင်း ဖြစ်ပါသည်။

ထိုသို့ဖြစ်ရခြင်းတွင် နိုင်ငံသားတို့က နိုင်ငံပိုင်သတင်းစာများကို အစိုးရ၏ ဝါဒဖြန့်ချိရေးအတွက် အစိုးရ အလိုကျ ရေး သားဖော်ပြနေသော သတင်းစာ အဖြစ် မြင်နေသည့်အမြင်ကို ယင်းတို့ကိုယ်တိုင်က ပြောင်းလဲသွားအောင် မတတ်နိုင် ကြသေးခြင်းကြောင့်လည်း တစ်ကြောင်း ပါဝင်နေပါသည်။ ထို့ပြင် တပ်မတော် ဘက်က ပုဂ္ဂလိက မီဒီယာများဘက်သို့ ယုံကြည်မှုရှိရှိ ပြန်လည် တုံ့ပြန်ဖြေကြားခြင်း မရှိဘဲ ယင်းတို့ပိုင် မီဒီယာများ၏ ထုတ်ပြန် ချက် ကိုသာ ကိုးကားစေလိုခြင်းကလည်း တစ် ကြောင်းဖြစ်ပါသည်။ ထို့ကြောင့် အစိုးရဌာနများ အနေဖြင့် မီဒီယာများသို့ သတင်း အချက်အလက် များကို ပွင့်လင်းမြင်သာမှုရှိစွာ ထုတ် ပြန်ပေးရမည်ဟူသည့် သတင်း အချက်အလက် လွတ်လပ်မှု ဥပဒေ (Freedom of Information Law) ကဲ့သို့သော ဥပဒေမျိုး ပေါ်ထွက် ရန်လည်း လွန်စွာ အရေးကြီးလှပါသည်။ မီဒီယာ ဥပဒေသည် မီဒီယာ လောကသားများကို အကာအကွယ် ပေးရန်နှင့် ကျင့်ဝတ်ကို လိုက်နာနိုင်ရန် ရည်ရွယ်သော်လည်း ထိုမီဒီယာသမားများ ကျင့်ဝတ်နှင့်အညီ အလုပ်လုပ်နိုင်ရန် သတင်းအချက်အလက် လွတ်လပ်စွာ ရယူခွင့်အတွက် ဥပဒေ တစ်ရပ်ပြဋ္ဌာန်းနိုင်ပါမှ မီဒီယာကို ကြောက်တတ်သော သို့မဟုတ် မကြောက် တတ်သော် လည်း ပြောရေးဆိုခွင့်၊ လုပ်ပိုင်ခွင့် မရှိသော ဌာနဆိုင်ရာ ပုဂ္ဂိုလ်များ၏ ပူးပေါင်း ဆောင်ရွက်မှုကို ရရှိနိုင်မည် ဖြစ်ပါသည်။

သည်နေရာတွင် သတင်းအချက်အလက်များကို လွတ်လပ်စွာ ထုတ်ပြန်နိုင်ရန်မှာ မည်သည့်အဖွဲ့တွင်မဆို လိုအပ်ကြောင်း ယခုကချင်အရေးက သက်သေဖြစ်နေ သည်ဟု ဆိုရပါမည်။ ကေအိုင်အေ တို့ဘက်က မည်သည့် တာဝန်ရှိသူကိုမဆို လွယ်လင့်တကူ ဆက်သွယ်နိုင်ရန် အချက်အလက်များ ရှိနေခြင်းနှင့် မည်သည့် တာဝန်ရှိသူကမဆို မည်သည့် သတင်း မီဒီယာသမားများကိုမျှ မငြင်းတမ်း ဖြေကြားပေးနိုင်ကြခြင်း ကလည်း အရေးပါသည့် ဗျူဟာဖြစ်သည် ကို တွေ့ကြ ရပေမည်။ ထိုသို့ ဖြစ်နေနိုင်သည်မှာ ကေအိုင်အေတပ်တွင်းတွင် လွတ်လပ်စွာ ပြောရေးဆိုခွင့်ကို ကျင့်သုံးနိုင် သဖြင့် ဖြစ်ကြောင်း ကိုလည်း လက်ခံရပေမည်။ မည်သည့် တာဝန်ရှိသူကမျှ သည်ကိစ္စကိုဖြင့် သူတို့ ဖြေခွင့်မရှိပါဟု မငြင်းကြသည်မှာ သူတို့အား တစ်ဦးတစ်ယောက်က ချုပ်ကိုင်ထားမှု မရှိခြင်းနှင့် သူတို့အားလုံးတွင် တစ်သားတည်း စိတ်ဓာတ်ရှိနေခြင်းတို့ကြောင့် ဖြစ်နိုင်ပါသည်။ တစ်သားတည်း ဖြစ်နေလျှင် မည်မျှ များပြားသော လူများက ဖြေဆို သည်ဖြစ်စေ တစ်သံတည်း ဖြစ်နေ ပါမည်။

ဆန့်ကျင်ဘက်အားဖြင့် တပ်မတော်တွင် မီဒီယာ၏ အမေးကို ပြန်ဖြေရန် မည်သူ့တွင် တာဝန်ရှိပြီး ထိုသူ့ကို မည်ကဲ့သို့ ဆက်သွယ် ရမည်မှန်း မသိခြင်းကြောင့် ပုဂ္ဂလိက မီဒီယာတို့က တစ်ဖက်စောင်းနင်းဆန်စွာ သတင်း ဖော်ပြနေရခြင်းဟု ဆိုရာတွင်လည်း ထိုတစ်သံတည်း ကိစ္စနှင့် ဆိုင်ပြန်ပါသည်။ တပ်မတော်တွင် တစ်သံတည်း ထွက်နိုင်ရန် တစ်စုံတစ်ယောက် ၏ အသံကိုသာ စောင့်နေရခြင်းမျိုးရှိနေသည်ဟု ဆိုနိုင်နေပါသည်။ တပ်မတော်၏ အသံကို တပ်မတော်သား အသီးသီးက ကိုယ်စားပြု မဖြေကြားနိုင်ဘဲ ဖြစ်နေသည့်အတွက် မီဒီယာ စာမျက်နှာ တိုက်ပွဲတွင် တပ်မတော်က အရေးနိမ့်သကဲ့ သို့ ဖြစ်နေရသည်။  တစ်သွေးတည်းမို့ မည်သည့် တပ်မတော် တာဝန်ရှိသူကမဆို မည်သည့် မီဒီယာက မေးမေး တစ်သံတည်းသာ ထွက်မည်ဟု ယုံကြည်စိတ်ဖြင့် အဖြေပေးနိုင်ကြလျှင် သည်နှယ် အရေးနိမ့်မှု ရှိနိုင်မည် မဟုတ်ပါပေ။

ထို့ကြောင့် မီဒီယာသမားများက ဘက်မလိုက်ကျင့်ဝတ်အား စောင့် ထိန်းနိုင်ရန် သတင်းအချက်အလက် လွတ်လပ်မှု ဥပဒေသစ် ပေါ်ထွက်သင့်ပါကြောင်းနှင့် တစ်သွေးတည်း၊ တစ်သားတည်းဟု မိမိကိုယ်မိမိ ယုံကြည်ကြသော အဖွဲ့များက ယင်းတို့၏ အဖွဲ့ဝင်များအား တစ်သံတည်း ထွက်နိုင်ခွင့်ကို လွတ်လပ်စွာ ခွင့်ပြုသင့်ပါကြောင်း အသိပေး တိုက်တွန်းအပ် ပါသည်။

လွတ်လပ်သော နိုင်ငံသား စိတ်ဓာတ်ဖြင့် ပြည်သစ်တည်အံ့။  ။

အယ်ဒီတာ

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*