အယ်ဒီတာ့စကား — February 06, 2013

ဥပဒေရှိရုံဖြင့် လုံလောက်သလော

နိုင်ငံ့အရေး ပြဿနာများအကြောင်း ပြောကြသည့်အခါ ဥပဒေ ကြောင်းအရ မှန်ကန် စွာ ဖြေရှင်းနိုင်ရန်နှင့် မှန်ကန်စွာ ဖြေရှင်းနိုင်မည့် ဥပဒေကောင်း များ ပေါ်ထွက်နိုင်ရန် ဦးတည်ကြရမြဲ ဖြစ်ပါသည်။  ယခင်အစိုးရခေတ်တွင် မရှိခဲ့သော လွှတ်တော်များလည်း ရှိနေပြီဖြစ်ရာ ဥပဒေပြုရေး မဏ္ဍိုင် သည် နိုင်ငံ့ အရေး ပြဿနာ များကို မှန်ကန်စွာ ဖြေရှင်းနိုင်မည့် ဥပဒေများ ပြဋ္ဌာန်းနိုင်ရေးအတွက် ကြိုးစား အားထုတ် နိုင်နေပြီ ဖြစ်သည်။ နိုင်ငံတော် ဖွဲ့စည်းပုံ အခြေခံ ဥပဒေ ဆိုင်ရာ ခုံရုံးဥပဒေကို ပြင်ဆင်သည့် ဥပဒေကြမ်းအရေး ဆိုလျှင် ဥပဒေပြုရေး မဏ္ဍိုင်က နိုင်ငံတော် သမ္မတ၏ သဘောထားမှတ်ချက်ကိုပင် လွန်ဆန်ကာ ယင်းဥပဒေကြမ်းကို အတည်ပြုခဲ့သည်။ ထို့ကြောင့် အနာဂတ်တွင် ဥပဒေကောင်းများ ပေါ်ထွက်လာရန် လွှတ်တော် အနေဖြင့်  ဆက်လက် ကြိုးစားသွားမည်ဟု ယူဆရပါသည်။

သို့သော် ဥပဒေကောင်းများ ပေါ်ထွက်ရုံဖြင့် ပြဿနာများကို မှန်ကန်စွာ ဖြေရှင်းနိုင်ပါမည်လား။ ပြဿနာများကို ဖြေရှင်း သည် ဆိုရာတွင် တရားစီရင်ရေးမဏ္ဍိုင်နှင့် အုပ်ချုပ်ရေးမဏ္ဍိုင်တို့ကသာ ဖြေရှင်းရရိုး ထုံးစံရှိပါသည်။ သည်နေရာတွင် လည်း လွှတ်တော်၏ တရားဥပဒေစိုးမိုးရေးနှင့် တည်ငြိမ်အေးချမ်းရေးကော်မတီမှ ထုတ်ပြန် ချက်အရ တရားစီရင်ရေး မဏ္ဍိုင်၏ လုပ်ငန်းများပေါ်တွင် အုပ်ချုပ် ရေးမဏ္ဍိုင်၏ စိုးမိုးစွက်ဖက်မှုများ ရှိနေသည်ဟု ဆိုထားပါသည်။ ထို့ကြောင့် ပြဿနာတစ်ခုတွင် ဥပဒေ၏ အကာအကွယ် ဆိုသည်ကို ရရန် အုပ်ချုပ်ရေး ကဏ္ဍနှင့် တရားစီရင်ရေးကဏ္ဍမှ ပုဂ္ဂိုလ်များက အရေးပါသောနေရာတွင် ရှိနေကြောင်း ထင်ရှား ပါသည်။ တစ်နည်း အားဖြင့် ဥပဒေကောင်းများ ရှိနေရုံဖြင့် မလုံလောက်ဘဲ အုပ်ချုပ် ရေးနှင့် တရားစီရင်ရေး မဏ္ဍိုင်များမှလည်း ဥပဒေကောင်းများကို လက်တွေ့ဘဝထဲတွင် အသက်ဝင်နိုင်ရန် အားထုတ်သင့်ကြပါသည်။

ယခုအချိန်ထိ မပယ်ဖျက်ရသေးသော ဥပဒေအချို့တွင် နိုင်ငံသား တို့အတွက် အကျိုးများစေသည့် ဥပဒေများ ရှိနေပါသေးသည်။ သို့သော် ထိုဥပဒေများသည် စာရွက်ပေါ်တွင်သာရှိကာ လက်တွေ့ဘဝထဲတွင် အသက်မဝင် ဖြစ်နေဆဲ ရှိနေသေးသည်မှာလည်း အမှန်တရားပင်ဖြစ်ပါသည်။ နိုင်ငံအများစုတွင် အသက် ၁၆ သို့မဟုတ် ၁၈ နှစ်အောက် ကလေးလူငယ်များအား အရက်ရောင်းချခြင်းမပြုရန် တားမြစ်ထားရာ မည်သည့် အရပ်ဒေသရှိ မည်မျှ သေးငယ်သည့် ဆိုင်ပင်ဖြစ်စေ အရွယ် ငယ်သည့် လူတစ်ဦးက အရက်ဝယ်ရန် ကြိုးစားလျှင် မှတ်ပုံတင်ကို ကြည့်ပြီး အသက်ပြည့် မပြည့် စိစစ်ပြီးမှ ရောင်းချပေးသည့် အလေ့အထကို အမှန်တကယ် ကျင့်သုံးကြပါသည်။ ကိုယ်တိုင်သောက်ရန် မဟုတ်ဘဲ လူကြီးမိဘ ကခိုင်းသဖြင့် လာဝယ်ပါသည်ဟူသော ဆင်ခြေမျိုးဖြစ်စေ၊ ထိုက်သင့်သည့် အဖိုးအခထက် ပိုပေးသည့် ကမ်းလှမ်းမှုမျိုး ဖြစ်စေပေးသည့်တိုင် အရာမရောက်သည်ထိ ဥပဒေကို လိုက်နာကြသည်မှာလည်းအမှန်တရားပင်။ ထိုကဲ့သို့ဥပဒေကို မချိုးဖောက်ရသည့် အကြောင်းမှာ တရားစီရင်ရေး မဏ္ဍိုင်နှင့် အုပ်ချုပ်ရေး မဏ္ဍိုင်များ ကိုယ်တိုင်က အဂတိလေးပါးမလိုက်စားဘဲ ဥပဒေအတိုင်း စီရင်ဆုံးဖြတ်၊ ဥပဒေအတိုင်း အရေးယူခွင့်ပြုကြသည့် အတွက် ဖြစ်ပါသည်။

ထို့ကြောင့် ဥပဒေကောင်းများ ပေါ်ထွက်ရန် အားထုတ်ခြင်းသည် နိုင်ငံ့အရေးပြသနာများအတွက် အဆုံးသတ် အဖြေ မဖြစ်နိုင်သေးကြောင်း သတိပြုကြရပါမည်။ ဥပဒေကို ရေးဆွဲရန် အားထုတ်ကြရသည့် ဥပဒေပြုရေး မဏ္ဍိုင်မှ လူပုဂ္ဂိုလ်များအနေဖြင့်လည်း ယင်းတို့ ကသာ နိုင်ငံ့အရေးပြသနာများကို အကောင်း ဆုံး ဖြေရှင်း ပေးရန် ကြိုးစားပေးနေ သည်ဟု မမြင်သင့်ကြပါ။ မည်မျှကောင်းမွန်ပြည့်စုံသည့် ဥပဒေကို ပြဋ္ဌာန်းနိုင်သည်ဆိုစေ ထိုဥပဒေ၏ အကာအကွယ်နှင့် အကန့် အသတ်ကို မရရှိ၊ မလိုက်နာနိုင်လျှင်သော် လည်းကောင်း၊ ထိုဥပဒေအား ချိုးဖောက်ခြင်းအတွက် မည်သည့် အရေးယူမှုကိုမျှ မခံရလျှင်သော်လည်း ကောင်း  ထိုဥပဒေ ၏ ကောင်းမွန်ခြင်းသည် ဥပဒေ စာအုပ်ကြီးထဲတွင် ပင်ရှိနေပါဦးမည်။ ထိုအခါ ထိုကောင်းမွန်သော ဥပဒေမျိုး ပေါ်ထွက်အောင် အားထုတ်ရကျိုး နပ်ပြီဟု ဆိုနိုင်တော့မည် မဟုတ်ပေ။

ထို့ကြောင့် နိုင်ငံသားအားလုံး ဥပဒေ၏ အကာအကွယ်ကို ရနိုင်ရန် ဥပဒေပြုရေးမဏ္ဍိုင်ကသာ အားထုတ်ရမည် မဟုတ်ပါ။ ဥပဒေကောင်းများ ပေါ်ပေါက်ရေးနှင့် ထိုဥပဒေများ လက်တွေ့ဘဝတွင် အသက်ဝင် ကျင့်သုံး လိုက်နာရေး အတွက် တရား စီရင်ရေးမဏ္ဍိုင်၊ အုပ်ချုပ်ရေးမဏ္ဍိုင်တို့သာမက တတ်သိပညာရှင် များနှင့် နိုင်ငံသားများ အားလုံးက အားထုတ်ကြ ရပါမည်။ ကျန်မဏ္ဍိုင်အသီးသီးမှ နိုင်ငံသား အပေါင်းအနေဖြင့်လည်း ဥပဒေကောင်းများ အသက်ဝင်ရေး အတွက် မိမိတို့ဘက်မှ ဆောင်ရွက်ရမည့် တာဝန်နှင့် အခန်းကဏ္ဍကို ကျေပွန်ပီပြင် ထမ်းသင့်ကြပါကြောင်း တိုက်တွန်းအပ် ပါသည်။

လွတ်လပ်သော နိုင်ငံသားစိတ်ဓာတ်ဖြင့် ပြည်သစ်တည်အံ့။  ။

အယ်ဒီတာ

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*