အယ်ဒီတာ့စကား — မတ် ၇၊ ၂ဝ၁၃

မီဒီယာ လောကသားများက မီဒီယာ ဥပဒေနှင့် သတင်း လွတ်လပ်ခွင့် ဥပဒေများအကြောင်း ပြောနေကြချိန်တွင် ပြန် ကြားရေး ဝန်ကြီးဌာနက  ပုံနှိပ်ခြင်းနှင့် ထုတ်ဝေခြင်း လုပ်ငန်း ဥပဒေကြမ်း ဟူ၍ ထုတ်ပြလိုက်သည်။   မီဒီယာသမားများ အဖို့ သမိုင်းတလျှောက် လုံခြုံမှု မဲ့ခဲ့ရသည့် အနေအထားကို ဖြတ်သန်းခဲ့ရသကဲ့သို့ ယခုတိုင်လည်း အန္တရာယ် မကင်းသည့် လမ်းကို မိမိတို့၏ ကျင့်ဝတ်လိုက်နာခြင်းတည်း ဟူသော အကာအကွယ်အောက်မှာပင်    လျှောက်နေကြရဆဲ ဖြစ်ပါသည်။ ထို့ကြောင့် မီဒီယာ ဥပဒေကောင်း တစ်ရပ်၏ အရိပ်အာဝါသကို မီဒီယာသမားများ အားလုံးက လိုအပ်နေချိန် လည်း ဖြစ်ပေ သည်။ ထို့အတွက် အပြစ်အနာအဆာ ကင်းသော မီဒီယာ ဥပဒေတစ်ရပ် ပေါ်ထွက်ရန် ဝိုင်းဝန်း ကြိုးပမ်းနေကြသည်ကို လည်း မြင်တွေ့ရပါသည်။ မြန်မာအင်ဒီပဲန်ဒင့် အနေဖြင့် မီဒီယာဥပဒေ ရှိရုံဖြင့် မလုံလောက်ဘဲ ၁၉၆၂ ခုနှစ် ပုံနှိပ်သူများနှင့် ထုတ်ဝေသူများ မှတ်ပုံတင် ဥပဒေ ကို အမြန်ပယ်ဖျက်ရေး၊ နိုင်ငံ့ဝန်ထမ်းများ၏ လွတ်လပ်စွာ ပြောရေးဆိုခွင့်ကို တားမြစ်ထားသည့် နိုင်ငံတော် လျှို့ဝှက်ချက် ဥပဒေကို ပယ်ဖျက်ရေးနှင့်အတူ သတင်းအချက်အ လက်များအား လွတ်လပ်စွာ ရယူနိုင်ခွင့်ကို အာမခံသော ဥပဒေ (Freedom of Information Law) အသစ်ပေါ်ထွက်ရေးတို့ကို တိုက်တွန်း ခဲ့ပြီးဖြစ်ပါသည်။ သို့ရာတွင် ယနေ့ မီဒီယာ သမားများ လက်ဝယ်သို့ ရောက်လာသည်မှာ ပုံနှိပ်ခြင်းနှင့် ထုတ်ဝေခြင်း လုပ်ငန်း ဥပဒေကြမ်း ဖြစ်နေပါသည်။

၂၈ ဖေဖော်ဝါရီထုတ် ကြေးမုံသတင်းစာတွင် ရှေ့နေပညာရှင်တစ်ဦးက ပုံနှိပ်မီဒီယာလောကအတွက် အားဆေးတစ်ခွက် ဟု ယခုဥပဒေကြမ်းကို ကြိုဆိုလိုက်သော်လည်း မြန်မာနိုင်ငံ သတင်းစာ ဆရာအသင်း၊ မြန်မာသတင်း သမဂ္ဂနှင့် မြန်မာ ဂျာနယ်လစ် ကွန်ရက်တို့ အားလုံးကမူ သတင်း လွတ်လပ်ခွင့်ဆိုင်ရာ အခြေခံမူ များကို ဖီလာ ဆန့်ကျင်နေသဖြင့် တညီ တညွတ်တည်း ကန့်ကွက်ခဲ့ကြပါသည်။ ကြိုဆိုသူက ထောက်ပြသည်မှာ မှတ်ပုံတင် လုပ်ငန်းကို အဖွဲ့ဖွဲ့ ဆောင်ရွက်စေခြင်း မဟုတ်တော့သဖြင့် လျှောက်ထားချိန်ကြာမြင့်မှု မရှိတော့ဘဲ ပုံမနှိပ်မီ ဆင်ဆာတင်ရန် မလိုတော့ခြင်း နှင့် ယခုဥပဒေအရ အရေးယူရာတွင်လည်း ရဲအရေးပိုင်သည့်အမှု မဖြစ်နိုင်တော့ခြင်းမှာ  အားသာချက်များ  ဖြစ်သည်ဟု  ဆိုပါသည်။ သို့ရာတွင်  ဥပဒေပညာရှင်တစ်ဦး၏ အမြင် သည် မီဒီယာအလုပ်ကို လက်တွေ့ လုပ်နေကြသော မီဒီယာ သမားများ၏ အခက်အခဲနှင့် အမြော်အမြင် တို့နှင့်စာလျှင် ပညာရှင်ဆန်သော်လည်း လက်တွေ့ ကျမှုနှင့် ဝေးကွာပါသည်။ ထို့ပြင် ခေတ်အဆက်ဆက် ဝါဒဖြန့်ချိရေးကိုသာ ဖော်ပြခဲ့သော နိုင်ငံတော် သတင်းစာတွင် ဥပဒေကြမ်း အား ဖော်ပြပြီး နောက်ရက်တွင် ပါဝင်လာသည့် ဆောင်းပါး ဖြစ်ရာ ပြန်ကြားရေး ဝန်ကြီးဌာနသည် ယခုတိုင် ရှေးမူကို ကျင့် သုံးဆဲဟု ယူဆနိုင်ပါ သည်။ မိမိ ထုတ်ပြန်သော ဥပဒေကြမ်းကို မိမိပိုင် သတင်းစာမှ ထောက်ခံကြိုဆိုလိုက်ခြင်းသည် လွတ်လပ်သော မီဒီယာ၏ အပြုအမူ မဟုတ်ပေ။ တစ်နည်းအားဖြင့် ယခုဥပဒေကြမ်းအပေါ် လက်တွေ့ မီဒီယာ သမားများက အပြည့်အဝ ထောက်ခံမည်မဟုတ်ဟု ရိပ်စားမိသည့်အတွက် ထိုအခက်အခဲအား ကျော်လွန်ရန် အားထုတ်မှုဟု ဆိုနိုင်ပါသည်။

စင်စစ် မီဒီယာ လုပ်ပိုင်ခွင့်ကို သာမန် မှတ်ပုံတင်ခြင်းဖြင့် အတည်ပြုပေး ခြင်းသည်သာ သတင်းလွတ်လပ်ခွင့် အတွက် အာမခံခြင်းဖြစ်ကြောင်း မြန်မာ အင်ဒီပဲန်ဒင့်က ထောက်ပြ ခဲ့ပြီးဖြစ်ပါသည်။ ထုတ်ဝေခွင့် လိုင်စင် သဘော ချပေးခြင်းနှင့် ထိုလိုင်စင်အား ပြန်ကြားရေးဝန်ကြီးဌာနက ချုပ်ကိုင်ထား ကာ ပြဋ္ဌာန်းချက် များကို ဆန်ကျင် ဆောင်ရွက်ပါက တရားမဝင် ထုတ်ဝင်စာအဖြစ် ကြေညာနိုင်ခြင်းနှင့် အသိအမှတ်ပြု လက်မှတ် (လိုင်စင်) ကို ရုပ်သိမ်း၊ ရပ်ဆိုင်းနိုင်ခြင်းတို့မှာ ထုတ်ဝေပြီး ဆင်ဆာလုပ်ခြင်းအရာ မြောက်နေသကဲ့သို့ သတင်းဌာနများ လွတ်လပ်စွာ ပေါ်ထွက်လာနိုင်ရေး အတွက် ကြီးစွာ သော အဟန့်အတားလည်း ဖြစ်နေ ပါသည်။ အချို့နိုင်ငံများတွင် မီဒီယာလုပ်ငန်းများ အနေဖြင့် သက်ဆိုင်ရာမြို့နယ်ရုံးများတွင် မည်သည့်နေရာ ဌာန၌ မည်သည့်မီဒီယာ လုပ်ငန်းကို လုပ်ဆောင်နေကြောင်း အသိပေး မှတ်ပုံတင်ခြင်းမှအပ မည်သည့် လုပ်ငန်း အသိအမှတ်ပြုလက်မှတ်ကိုမျှ လျှောက်ထားရန် မလိုသကဲ့သို့ ထိုလက်မှတ်အား ဝန်ကြီးဌာန တစ်ခုခုက လွယ်လင့်တကူ ရုပ်သိမ်းရပ်ဆိုင်းနိုင်ခြင်း မရှိပေ။ မီဒီယာလောကကို ကိုယ်ကျိုးစီးပွားအလို့ငှာ ဝင်ရောက်လာသည့် ပုံနှိပ်ထုတ်ဝေသူများကြောင့်ပင် သက်မွေးပညာသည် မပီသသော မီဒီယာများ ပေါ်ထွက်လာနေသည့် ယခုကာလမျိုးတွင် လိုင်စင် ချပေးခြင်းကို မီဒီယာကောင်းကျိုးအတွက် ဟု ဆင်ခြေပေးနေဦးမည် ဆိုလျှင် နောင်တွင်လည်း အရည်အသွေး ရှိသော မီဒီယာကောင်းများ ပေါ်ထွက် ရေးအတွက် အဟန့်အတား ဖြစ်ပေမည်။

ထို့ကြောင့် ယခု ပေါ်ထွက်လာသော ပုံနှိပ်ခြင်းနှင့် ထုတ်ဝေခြင်း လုပ်ငန်းဥပဒေကြမ်းသည် မီဒီယာသားများ အတွက် အကျိုးထက် အပြစ်ကို ဖြစ်စေရာရောက်နေ သည်ဟု မြင်ပါသဖြင့် နိုင်ငံသားတို့၏ အခြေခံလူ့အခွင့် အရေးကို လေးစားသည့် ဥပဒေပြုရေးမဏ္ဍိုင်မှ ပုဂ္ဂိုလ်ကြီးငယ်များက ယခုဥပဒေကြမ်းအား အတည်မပြု ကြပါရန် လေးနက်စွာ တိုက်တွန်းအပ် ပါသည်။

လွတ်လပ်သော နိုင်ငံသားစိတ်ဓာတ်ဖြင့် ပြည်သစ်တည်အံ့။  ။

အယ်ဒီတာ

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*