အယ်ဒီတာ့စကား — မတ် ၁၃၊ ၂ဝ၁၃

လူရွေးခြင်း၊ မူရေးခြင်း

နိုင်ငံရေးပါတီများတွင် အင်အား အနည်းအများပေါ် မူတည်ကာ ယင်းတို့၏ မူဝါဒများကို အများသဘောဆန္ဒနှင့် ညီညွတ်စွာ ရေးဆွဲချမှတ်နိုင်ခွင့်သည် အကန့်အသတ် ရှိနေသည်ဟု ဆိုရပေမည်။ ယခုအခါ အင်အားကြီး နိုင်ငံရေး ပါတီများက ညီလာခံများကို ကျင်းပလာကြသည်။ အင်အားနည်းသော နိုင်ငံရေးပါတီများအတွက် ညီလာခံ ကျင်းပကာ ခေါင်းဆောင် ရွေးချယ် တာဝန်ပေးအပ်ခြင်း သည်လည်းကောင်း၊ မူဝါဒကို ရေးဆွဲချမှတ်ခြင်းသည် လည်းကောင်း အကျဉ်းရုံး ပြုလုပ်နိုင်ကြပေသည်။ အချိန် အတိုင်းအတာ တိုတို အတွင်းတွင် ထိုလုပ်ရပ် နှစ်ခုစလုံးအား လုပ်ဆောင်နိုင်ကြပေမည်။ သို့ရာတွင် အင်အားကြီး နိုင်ငံရေးပါတီများအနေဖြင့် ညီလာခံများ ကျင်းပသည် ဆိုရာတွင် ခေါင်းဆောင်နှင့် အလုပ်အမှုဆောင်အဖွဲ့များ ရွေးချယ်တာဝန် ပေးအပ်သည့် ဗာဟီရများနှင့်ပင် အချိန်ကုန်တတ် ကြပေသည်။ တစ်နည်းအားဖြင့် လူရွေးသည့် အမှုကို ဆောင်ရွက်သည့် အချိန်ကာလ ကြာမြင့်ရကား မူရေးသည့်အလုပ်ဟု ဆိုနိုင်သော ပါတီ၏ ပြည်သူ့ရေးရာ မူဝါဒများကို အများသဘော ဆန္ဒဖြင့် ပူးပေါင်းဆွေးနွေး ကာ ရေးဆွဲချမှတ်ခြင်းကိုမူ မပြုလုပ်နိုင်ခဲ့ပေ။

စင်စစ် ဒီမိုကရေစီသည် ကျင့်စဉ်တစ်ရပ်ဖြစ်ရာ ကိုယ်စားပြု ဒီမိုကရေစီ သဘောအဖြစ် ခေါင်းဆောင်များကို ရွေးချယ် တာဝန်ပေးခြင်းသည် ဒီမိုကရေစီကျင့်စဉ်၏ တစ်စိတ် တစ်ဒေသသာ ဖြစ်ပေသည်။ နိုင်ငံရေးပါတီ တစ်ရပ် အနေဖြင့် ယင်း၏ ပေါ်လစီဟုဆိုရာတွင် “ဒီမိုကရေစီသာ ဖြစ်သည်” ဟု လွယ်လွယ် မဆိုနိုင်ပေ။ နိုင်ငံရေး၊ စီးပွားရေး၊ လူမှုရေး၊ ပညာရေး၊ ကျန်းမာရေးစသည့် ပြည်သူ့ရေးရာကိစ္စရပ်များအတွက် မည်သို့သော ဒီမိုကရေစီ နည်းကျ မူဝါဒများကို ချမှတ် အကောင် အထည်ဖော်မည် ဆိုသည့် အကြောင်း တိကျသေချာသော ပန်းတိုင်၊ လုပ်ငန်းစဉ်များဖြင့် နိုင်ငံသားများအား ချပြ အစီရင်ခံကြရပါမည်။ ထို့ကြောင့် ပါတီ၏ မူဝါဒကို ပါတီဝင်  အများစု၏ ဆန္ဒသဘောထားဖြင့် ရေးဆွဲချမှတ်ရေးသည်လည်း ဒီမိုကရေ စီစနစ်ကို ကျင့်သုံးလိုသော နိုင်ငံရေး ပါတီများအတွက် အသက်သွေးကြော သဖွယ် အရေးကြီးလှပါသည်။ အင်အားကြီး နိုင်ငံရေးပါတီတစ်ခုတွင်  နိုင်ငံသားများ၏ ပညာရေး၊ ကျန်းမာရေးအစရှိသည့် အရေးကိစ္စများ အတွက်  ဆောင်ရွက် ရန် ကော်မတီများကို ပါတီတွင်းမှ ရွေးကောက်ခံရသော ခေါင်းဆောင်များဖြင့် ဖွဲ့စည်းထားကြောင်း သိရှိရသော်လည်း ယင်းကော်မတီ များက ဦးတည်သည့် ပန်းတိုင်နှင့် လုပ်ဆောင်မည့် လုပ်ငန်းစဉ်များကိုမူ ကျန်ပါတီဝင်များ အားလုံး၏ ဆန္ဒသဘောထားအရ ဝိုင်းဝန်းဆုံးဖြတ်ရေးဆွဲခြင်းမျိုး မတွေ့ရဘဲ ကော်မတီဝင်များ၏ ဆန္ဒ သဘောထားနှင့် အကြံပြုချက်များ အပေါ်တွင်သာ အခြေခံကာ ရေးဆွဲချမှတ်ထားသည်ကို တွေ့ရပါသည်။ ထို့ကြောင့် လူကိုရွေးပြီး ထိုရွေးကောက်ခံလူ၏ မူကို ကျန်လူများက လက်ခံ ကျင့်သုံးရန် ဆုံးဖြတ်သကဲ့သို့ ဖြစ်နေပေသည်။ ဒီမိုကရေစီကျင့်စဉ်တွင် လူကိုသာမက မူကိုပါ အများဆန္ဒ သဘောထားအတိုင်း ရွေးချယ် ချမှတ် ရေးဆွဲကြရန် လိုအပ်ပါမည်။

အထူးသဖြင့် အင်အားကြီးပါတီများတွင် အင်အားများသည်နှင့်အမျှ တိုင်းရင်းသား လူမျိုးအများအပြား ပါဝင်ရာ တစ်ဦးချင်း၊ တစ်မျိုးချင်း၏ ဆန္ဒသဘောထားကို မျက်ကွယ် မပြုသည့် မူဝါဒများ ချမှတ်နိုင်ရေးသည် လွန်စွာ အရေးကြီးလှပါသည်။ လူကို အခြေခံသော အဖွဲ့အစည်းများ၌ ထိုလူက မစွမ်းတော့ချိန်တွင် အဖွဲ့၏ပုံရိပ် မှေးမှိန် တတ်သော်လည်း မူကို သေချာ တောင့်တင်းခိုင်မာအောင် ဆောင်ရွက်ထားသော အဖွဲ့အစည်းများတွင် လူ မည်မျှပြောင်းစေကာမူ ကျန်အဖွဲ့ဝင် များ၏ အခန်းကဏ္ဍကို လျစ်လျူရှုရာ မရောက်သည့် အတွက်ရော၊ မူအရ မည်သည့် စွမ်းသူမှန်သမျှမဆိုက ဆက်လက် အစွမ်းပြခွင့်ကို ရကြသည့်အတွက်ပါ အဖွဲ့၏ပုံရိပ် မှေးမှိန်ရန် အကြောင်း မရှိနိုင်ပေ။ ထို့ကြောင့် နိုင်ငံရေး ပါတီများအနေဖြင့် လူကို အချိန်ယူ ရွေးကြသည့်အပြင် မူကိုလည်း အချိန်ယူ ရေးဆွဲကြမှသာ တောင့်တင်း ခိုင်မာသော နိုင်ငံရေး ပါတီကြီးတစ်ရပ် ဖြစ်လာနိုင်ပါမည်။

မူကို အချိန်ယူ ရေးဆွဲကြသည်ဆိုရာတွင်လည်း ရှိနှင့်ပြီးသားမူများ ကို ခေတ်နှင့်အညီ ပြုပြင်နိုင်ရေးသာမက ပါတီဝင် အားလုံး၏ ဆန္ဒအရ  ပြုပြင်ဖြည့်စွက်ရေးဆွဲနိုင်ရေး သည်လည်း အရေးကြီးကြောင်း သတိပြုအပ်သင့်ပါ သည်။ ပြည်သူ့ရေးရာ အကြောင်းရပ် တစ်ခုချင်းစီပေါ် မူတည်ကာ ရှိအပ်သော မူဝါဒရေးရာများကို ပါတီဝင် အချို့က တင်ပြပြီး ကျန်ပါတီဝင် အသီးသီးက ဝိုင်းဝန်းနားထောင် ဆွေးနွေးငြင်းခုန်နိုင်မည့် မူရေးဆွဲ သည့် ညီလာခံမျိုး ကျင်းပနိုင်မည်ဆိုပါက အမှန်တကယ် အကျိုးများနိုင်ပါမည်။ သို့မှသာ လူကိုရော မူကိုပါ ဒီမိုကရေစီ နည်းကျကျ ရွေးချယ် ဖန်တီးသည့် နိုင်ငံရေး ပါတီမျိုး ဖြစ်လာနိုင်ပေသည်။ သို့မှသာ လူများ ပြောင်းလဲသွား သည့်အချိန်တွင်ပါ မူများ ခိုင်မာစွာ ပြဌာန်းထားနိုင်သဖြင့် ပါတီ၏ အနှစ်သာရနှင့် ရပ်တည်ချက် များ မယိုင်မလဲ ကျန်ရစ်ပြီး မည်သည့် အသစ် အသစ်သော လူများ ဝင်ရောက်လာသည်ဖြစ်စေ ပါတီ၏ မူအရ သာ ဆက်လက် ရှင်သန်လှုပ်ရှားနိုင်မည် ဖြစ်ပါသည်။ ထို့ကြောင့် ပါတီညီလာခံများတွင် လူကိုရွေးရန်သာ ဦးမတည်ကြဘဲ မူကို ရေးရန်ပါ ဦးတည်သင့်ကြပါကြောင်း တိုက်တွန်း အပ်ပါသည်။

လွတ်လပ်သော နိုင်ငံသားစိတ်ဓာတ်ဖြင့် ပြည်သစ်တည်အံ့။  ။

အယ်ဒီတာ

သတင်းမျှဝေရန်

About Author

စာဖတ်သူ မှတ်ချက်များ (၁)

  1. သတင်းဆောင်းပါးဖော်ပြချက်တွေအရမ်းကြိုက်ပါတယ်။ကဗျာစာမူများပေးပို့ချင်ပါတယ်။

Leave a Reply

Your email address will not be published. Required fields are marked *

*