အယ်ဒီတာ့စကား — မတ် ၂ဝ၊ ၂ဝ၁၃

အချိန်၊ အချက်အလက်၊ ဆင်ခြင်တွေးတောမှုနှင့် အသိကို အခြေခံသော တုန့်ပြန်မှု

လက်ပံတောင်းတောင်စီမံကိန်းကို စာချုပ်အသစ် ပြင်ဆင်ချုပ်ဆိုကာ ဆက်လက်ဆောင်ရွက်သင့်ကြောင်း အဆုံးအဖြတ်နှင့် ပတ်သက်၍ သဘောမတူ ကန့်ကွက်သံများ၊ လက်သင့်ခံရန် သံသယများနှင့်အတူ နားလည် လက်ခံသံများ စုံလင်စွာ ပေါ်ထွက်လာခဲ့ပါသည်။ ပညာရှင် အချို့၏ ပညာသည် ဆန်သော သုံးသပ်ချက်များ လည်း ပုံနှိပ်နှင့်အွန်လိုင်းစာ မျက်နှာများ ပေါ်တွင် ပေါ်ထွက်လာပါသည်။ ထိုသို့သော တုံ့ပြန်သံများတွင် ကန့်ကွက်သံ၊ လက်ခံသံနှင့် သံသယ ဟူသည့် မူကွဲသုံးမျိုး ရှိနေပါသည်။ ထို့အတူ စုံစမ်းရေး ကော်မရှင်၏ အစီရင်ခံစာအပေါ် တုံ့ပြန်မည့် အစုအဖွဲ့မှာလည်း သုံးခုရှိနေပါသည်။ လူထု၊ ဦးပိုင်နှင့် ဝမ်ပေါင်ဟူသည့် အစုအဖွဲ့များ ဖြစ်ပါသည်။ ယခု တုံ့ပြန်သံ မူကွဲသုံးမျိုးမှာ “လူထု” ထဲမှ အများဆုံးပေါ်ထွက်လာခဲ့ခြင်း ဖြစ်ပါ သည်။ ဤအစုအဖွဲ့နှစ်ခုဖြစ်သည့် ဦးပိုင်နှင့် ဝမ်ပေါင်တို့ထံမှ ကန့်ကွက်သံကို လည်းကောင်း၊ သံသယကို လည်းကောင်း မကြားသိရသဖြင့် စုံစမ်းရေး ကော်မရှင်သည် ယင်းအစုအဖွဲ့နှစ်ခု၏ ယုံကြည် လက်ခံမှုကို ရခဲ့သည်ဟု ဆိုရပါမည်။

လူထု၊ ဦးပိုင်နှင့် ဝမ်ပေါင် သုံးပွင့်ဆိုင်အရေးတွင် သုံးစုသုံးဖွဲ့လုံး၏ ယုံကြည်မှုကိုရရှိမှသာ စီမံကိန်း အကောင် အထည်ဖော်ရေး သည် ချောမော လျင်မြန်ပေမည်။ လူထုက သံသယကို ဆက်လက်စွဲကိုင်ထားသည့် အကြောင်းရင်းမှာ ပညာရှင်များ ထောက်ပြသကဲ့သို့ စီမံကိန်း၏ အကျိုးအပြစ်နှင့် ယင်း၏ အတိမ်အနက်အား သုတေသန ပြုလုပ်ပုံနည်းစနစ် အားနည်းမှုရှိခြင်းကြောင့် မဟုတ်မူဘဲ မီးခိုးဗုံးဖြိုခွင်းမှုနှင့် ပတ်သက်သည့် တွေ့ရှိချက်နှင့် အကြံပြုချက်များအပေါ် ဘဝင် မကျနိုင်ခြင်းကြောင့် ဖြစ်ပါသည်။ ယခုကိစ္စသည် ပညာရှင်မျက်စိနှင့် ကြည့်လျှင်လည်း မီးလောင်ဒဏ်ရာများ အနေဖြင့် အနာကျက်ပြီးလျှင်ပင် အရေပြားလွှာ ပျက်စီးခြင်းကြောင့် ဖြစ်ပေါ် လာနိုင်သည့် ရှုံ့တွပုံပျက်မှုနှင့် (အရိုးအဆစ်များ) လှုပ်ရှားဆောင်ရွက်ရန် ခက်ခဲမှုတို့ကြောင့် အရည် အသွေး ပြည့်ဝသည့် ဘဝ Quality of Life ကို ဆက်လက် ထိန်းထားရန် မလွယ်ဘဲ နောက်ဆက်တွဲ လူမှုရေး ပြဿနာများ ဖြစ်လာနိုင်ချေရှိရာ ထိုပြဿနာမျိုး ကို ဖြေရှင်းရန်မှာ ဆေးကုစရိတ်ဖြင့် လုံလောက်မှု မရှိနိုင်ပေ။ ထို့အတူ အခြားသော သဘာဝ ပတ်ဝန်းကျင်ဆိုင် ရာနှင့် လူမှုဘဝဆိုင်ရာ ထိခိုက်နစ်နာမှု ကိစ္စများသည်လည်း အချိန်ယူကာ ဖြေရှင်းရမည့် ပြဿနာများ ဖြစ်ပေသည်။ အထူးသဖြင့် ပြဿနာ အသီးသီး အတွက် သက်ဆိုင် သည့် ဘာသာရပ် ဆိုင်ရာ ပညာရှင် အသီးသီး၏ အကြံဥာဏ်များကို ရယူကာ ဖြေရှင်းသင့် သောကြောင့် ထိုဖြေရှင်းမှု အတွက် အချိန် လုံလောက်စွာ ရရှိရန် လိုအပ်ပါသည်။

အစီရင်ခံစာနှင့် ပတ်သက်၍ တုံ့ပြန်မှုများ ပြင်းထန်စွာ ပေါ်ထွက်လာရသည့် နောက်ထပ် အကြောင်းရင်းတစ်ခုမှာ အစီရင်ခံစာပါ တွေ့ရှိချက်နှင့် အကြံပြုချက် များကို အချိန်ယူ လေ့လာနိုင်စွမ်း မရှိကြခြင်းကြောင့် ဖြစ်ပါသည်။ လွန်စွာ ရှည်လျားများပြားသော အကြောင်းအရာများကို တစ်ကြိမ်တည်းနှင့် လေ့လာဖတ်ရှုကြရသည့်အခါ သုံးသပ် ဆင်ခြင်နိုင်စွမ်း အားနည်းသွားရပါသည်။ အကြောင်းအရာ တစ်ခုချင်းစီနှင့် ပတ်သက်သည့် တွေ့ရှိချက် များကို  အချိန်အပိုင်းအခြားဖြင့် သီးခြားစီ ခွဲခြားထုတ်ပြန်ကာ အခြားသော ပညာရှင်များအား မှတ်ချက်ပြုစေခြင်း၊ တွေ့ရှိစုဆောင်းမိသမျှ တွေ့ရှိချက်နှင့် မှတ်ချက်များကို လူထုအား သိရှိကြားနာခွင့် ရအောင် ဆောင်ရွက်ခြင်း စသည့် လုပ်ထုံးလုပ်နည်းများကို ကျင့်သုံးခြင်းအားဖြင့် လူထုက ထိုတွေ့ရှိချက် များအား ပိုမိုနားလည်သဘောပေါက်ကာ အကြံပြုချက်များကိုလည်း ပိုမို သုံးသပ်လာနိုင်မည်ဖြစ်ပါသည်။ ထိုသို့ဆောင်ရွက်ရန် လိုအပ်ချက်မှာ အချိန် ပင်ဖြစ်ပါသည်။ အသိပေးခံရမှုရှိသော လူထုကသာ အချက် အလက် များကို ဆင်ခြင်တွေးတောနိုင်ပါမည်။ ထိုအခါမှသာ လူထု၏ တုံ့ပြန်မှုသည် အသိကို အခြေခံသော တုံ့ပြန်မှု ဖြစ်ပါသည်။ လူထုထံမှ အသိကို အခြေခံသော တုံ့ပြန်မှုနှင့် ယုံကြည်မှုကို ရရှိရန် အချိန်နှင့်အတူ သိစရာ အချက်အလက် စုံလင်နိုင်သမျှ စုံလင်သည့် သုတေသန တွေ့ရှိချက်များ လိုအပ်ပါသည်။

စီမံကိန်းကို ဆက်လက် အကောင်အထည်ဖော်ရေးအတွက် သုံးပွင့်ဆိုင် အစုအဖွဲ့မှ လူထု၏အသိကို အခြေခံသော ယုံကြည်မှု ကို မရမချင်း ခက်ခဲနေဦးမည်ကို ကျန် အစုအဖွဲ့ နှစ်ခုကလည်း ရိပ်စား သိရှိပြီး ဖြစ်ပါမည်။ ထို့ကြောင့် စီမံကိန်း ဆက်လက် အကောင်အထည်ဖော်ရေး အတွက် ကော်မရှင်က အဆိုပြုထားသော စာချုပ် ပြင်ဆင် ချုပ်ဆိုရေးကို အလျင်စလို မပြုကြမီ လူထုကို ပိုမိုအသိပေးရှင်းပြခွင့်အား သက်ဆိုင်ရာပညာရှင်များ၏ အကူအညီ ဖြင့် အချိန်ယူ ကြိုးပမ်း အားထုတ်သင့်ကြပါကြောင်း တိုက်တွန်းအပ်ပါသည်။

လွတ်လပ်သော နိုင်ငံသားစိတ်ဓာတ်ဖြင့် ပြည်သစ်တည်အံ့။   ။

အယ်ဒီတာ

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*