ဆောင်းပါး — မတ် ၂၄၊ ၂ဝ၁၃

၂ဝ၁၃ မတ်လ ၁၅ ရက်တွင် ကျင်းပခဲ့သည့် ပဋ္ဌမအကြိမ် ပြည်သူ့လွှတ်တော် ဆဋ္ဌမ ပုံမှန် အစည်းအဝေးတွင် ဘဏ္ဍာရေးနှင့် အခွန်ဝန်ကြီးဌာန ပြည်ထောင်စု ဝန်ကြီး ဦးဝင်းရှိန်က ၂ဝ၁၃ ခုနှစ် ပြည်ထောင်စု ဘဏ္ဍာငွေ အရ အသုံးဆိုင်ရာ ဥပဒေကြမ်း တင်သွင်းရာတွင် ၂ဝ၁၃-၁၄ ဘဏ္ဍာရေး နှစ်တွင် နိုင်ငံ့ဝန်ထမ်းများအတွက် လစာနှုန်းထားကို ကျပ် ၂ဝဝဝဝ စီ တိုးမြှင့်ပေးရန်နှင့် အချိုးကျတိုးမြင့် လာမည့် ပင်စင်လစာနှင့် ဆုငွေများ အတွက် သာမန်အသုံးစရိတ်တွင် ထည့်သွင်း လျာထားမှုများ ပြုလုပ် ထားသည်ဟု ဆိုပါသည်။ ထိုသို့ လစာ တိုးမြှင့်ပေးသော်လည်း ၂ဝ၁၂ ခုနှစ်၊ ဧပြီ ၁ ရက်မှစ၍ ခံစားခွင့် ပြုထားသည့် အပိုထောက်ပံ့ကြေးနှင့် ဒေသ စရိတ်များကို ဆက်လက် ခံစားခွင့်ပြုမည်ဟု ဆိုပါသည်။

လစာတိုးမည်ဆိုသော အသံကြားရုံဖြင့် ကုန်ဈေးနှုန်းတွေ တက်လာတော့မည်။ မထူးပါဘူးဟု အပျက် မြင် ရှုဒေါင့်တစ်ခုတည်းမှ ကြည့်၍ မရပါ။ ဝယ်လိုအား စရိတ်နှင့် ဈေးကစားမှု များကြောင့် ကုန်ဈေးနှုန်းများ မြင့်တက် လာတတ်ပါသည်။ အသံကြားရုံဖြင့် ဈေးတက်ခြင်းမှာ အမြတ် ထုတ်ဈေးကစားမှုများကြောင့်ဖြစ် သည်။ ချောက်လှန့်ဈေး ကစားမှု ကြောင့်သာ ကုန်ပစ္စည်းများ အဆမတန် ဈေးမြင့်တက်နိုင်ပါသည်။

ဝန်ထမ်းလစာ တိုးပေးခြင်းမှာ ကောင်းမွန်ပြီး မုဒိတာ ပွားအပ်သော ကိစ္စဖြစ်သည်။ အစိုးရယန္တယား ကောင်းမွန် ချောမွေ့စွာ လည်ပတ်ရေး အတွက် ဝန်ထမ်းများမှာ အရေးကြီးသော ကဏ္ဍမှ ပါဝင်သည်။ ဝန်ထမ်းများ၏ သစ္စာရှိမှုကို ရရှိရန် လိုပါသည်။ ထို့အတွက် ဝန်ထမ်းများစားဝတ်နေ ရေးဖူလုံရန်၊ ဘဝလုံခြုံမှုရှိရန်နှင့် သိက္ခာရှိရှိနေထိုင်နိုင်ရန် လိုပါသည်။ အဆင့်အတန်း အလျောက် သင့်တင့် လျှောက်ပတ်စွာ မိသားစုနေထိုင်စား သုံးနိုင်ရန်လိုပါသည်။ အကြမ်းဖျဉ်း  အားဖြင့် အစား အသောက် စရိတ်မှာ လစာဝင်ငွေ၏ အများဆုံး ငါးဆယ် ရာခိုင်နှုန်းထက် မပိုသင့်ပါ။ ဝန်ထမ်း လုပ်၍ ဓနဥစ္စာ ကြွယ်ဝရန် အခွင့် အလမ်းမရှိနိုင်ပါ။ သို့သော် နိုင်ငံဝန် ကို ထမ်းဆောင်နေသူများဖြစ်သည့် အလျောက် သိက္ခာရှိရန် လိုပါသည်။

ဝန်ထမ်းအများစု၏ တရားဝင် လစာဝင်ငွေမှာ  အိမ်ထောင်စု အသုံးစရိတ်အတွက် မကာမိကြောင်း တွေ့ ရှိရမည် ဖြစ်သည်။ သို့ဖြစ်ပါ၍ လုပ်ခလစာများကို ညှိနှိုင်းဆောင်ရွက်ပေးရန် အမှန်တကယ် လိုအပ်လျက်ရှိနေ ပါသည်။ ဝန်ထမ်းများ၏ လုပ်ခလစာ များကို တိုးမြှင့်ပေးခြင်းအားဖြင့် ဝန်ထမ်းများ၏ ယုံကြည်ကိုးစားမှုကို ရရှိ လာနိုင်သည့်အပြင် လုပ်ငန်း စွမ်းဆောင်ရည် များလည်း တိုးတက်လာနိုင်ပါသည်။ လုပ်ငန်း စွမ်းဆောင်ရည် တိုးတက် လာပြီး အလေအလွင့်နှင့် အချိန်ဖြုန်းတီးမှုများ လျော့နည်း ကျဆင်း လာမည်ဖြစ်သည်။ အကျင့်ပျက် ခြစားမှု တိုက်ဖျက်ရေး အတွက်လည်း အထောက်အကူ ဖြစ်စေနိုင်ပါသည်။ ထို့အပြင် ဝန်ထမ်းများ၏ ယုံကြည် ကိုးစားမှုနှင့် သစ္စာရှိမှုကိုပါ ရရှိလာ နိုင်ပါသည်။ ထိုအချက်မှာ အစိုးရ ယန္တယားကောင်းမွန်ချောမွေ့စွာ လည် ပတ်ရေးအတွက် အလွန် အရေးကြီးပါသည်။ လစာတိုးမြှင့်ပေးမှုကြောင့် ဘဏ္ဍာနှစ်အတွင်း ပိုမိုသုံးစွဲရမည့် ငွေပမာဏမှာ ကျပ် ၃၈ဝ ဘီလီယံ ကျော်ဖြစ်ပြီး စုစုပေါင်း သာမန် အသုံးစရိတ်၏ ၄ ရာခိုင်နှုန်းခန့်သာ ရှိပါ သည်။ တစ်လလျှင် ပိုမိုကုန်ကျမည့် စရိတ်မှာ စုစုပေါင်းပြည်တွင်း လှည့်လည် သုံးစွဲငွေ၏ ဝ.၅ ရာခိုင်နှုန်းသာ ရှိပါသည်။

လစာတိုးမြှင့်ပေးရန် လျာထား ရေးဆွဲထားသော်လည်း ဘတ်ဂျက် လိုငွေနှင့် ဂျီဒီပီအချိုးမှာ လွန်ခဲ့သော နှစ် ကထက် အနည်းငယ် ကျဆင်းသွားသည်ကို တွေ့ရပါသည်။ အစိုးရ၏ ပိုမိုသုံးစွဲမှုကြောင့် စုစုပေါင်း ဝယ်လိုအား တိုးမြှင့်လာမည်ဖြစ်သည်။ စုစုပေါင်း ဝယ်လိုအား တိုးလာသည့် အတွက် ထုတ်လုပ်မှုနှင့် အလုပ် အကိုင်များ တိုးပွားလာနိုင်ပါသည်။ အစိုးရ တစ်ကျပ်သုံးလျှင် စုစုပေါင်း ဝယ်လိုအား ငါးကျပ်ခန့် တိုးလာမည် ဖြစ်သည့် အလျောက် ထုတ်လုပ်မှုတိုး တက်ရေးကို အထောက်အကူဖြစ်စေ နိုင်ပါသည်။ ဆင်းရဲနွမ်းပါးမှုလျော့ချရေး အတွက်လည်း အထောက်အကူ ဖြစ်စေနိုင်ပါသည်။

နိုင်ငံတော်မှ ဝန်ထမ်းများကို ထောက်ပံ့ပေးသကဲ့သို့ ဝန်ထမ်းများ ဘက်ကလည်း အဂတိကင်းပြီး အသိ စိတ်ဓာတ် ဖြင့် တာဝန်ကို ကျေပွန်စွာ ထမ်းဆောင်ရန် လိုပါသည်။ ပြည်သူ့ ရေးရာဝန်ဆောင်မှုများကို ထိရောက် ကောင်းမွန်စွာ အလေအလွင့်မရှိ အောင် တာဝန်သိသိ ထမ်းဆောင်ရန် လိုပါသည်။ ဝန်ထမ်းအဖွဲ့အစည်းများ ကို ပြန်လည် ဖွဲ့စည်းရန်နှင့် အရည် အသွေးမြှင့်တင်ရန် လိုအပ်ပါသည်။ လိုအပ်သောနေရာများတွင် အင်အား ဖြည့်တင်းရန် လိုသကဲ့သို့ မလိုအပ်ဘဲ တီထွင်ဖန်တီး ထားသည့် ပိုလျှံဝန်ထမ်းများ မရှိရန် လိုပါသည်။ နိုင်ငံပိုင် စီးပွားရေးအဖွဲ့အစည်းများအား စီမံ ကွပ်ကဲရန် ခန့်အပ်ထားသည့် ဦးစီး ဌာနများနှင့် အထက် အဖွဲ့အစည်းများ ရှိ ဝန်ထမ်းများအရေးကိုလည်း အလေးအနက်ထားစဉ်းစားသင့်ပါ သည်။ ယခင် ဖောင်းပွပြီး ဝန်ထမ်းဦးရေတွင် ပုဂ္ဂလိကသို့ လွှဲပြောင်းပေးပြီးနောက် ထပ်မံ ပိုလျှံလာသည့် ဦးစီး ဌာနများမှ ဝန်ထမ်းများမှာ နိုင်ငံတော် ဘတ်ဂျက်အတွက် ဝန်ထုတ်ဝန်ပိုး မဖြစ်ရန် လိုပါသည်။

၂ဝ၁၃-၁၄ ဘဏ္ဍာရေးနှစ်တွင် စီးပွားရေးအဖွဲ့အစည်း ၄၃ ခုအနက် ငွေရေးကြေးရေး အဖွဲ့အစည်း ၈ ခုရှိ ပြီး ပြည်ထောင်စု ဘဏ္ဍာရန်ပုံငွေပြင်ပ မှ ဆောင်ရွက်မည့် အဖွဲ့ ၄ ခုရှိသည် ဟု ဆိုပါသည်။ ကျန် ၃၁ ဖွဲ့တွင် အရှုံးပေါ်နေသည့် အဖွဲ့ ၈ ဖွဲ့ရှိပါ သည်။ စီးပွားရေးအဖွဲ့အစည်းများ အနေဖြင့် ကုန်ကြမ်းဝယ်ယူသည့် စရိတ်၊ နိုင်ငံတော်သို့ ထည့်ဝင်ရငွေ နှင့် ဝင်ငွေခွန်တို့ကို မိမိတို့၏ လုပ်ငန်းသုံး ရင်းနှီးငွေမှ ကျခံသုံးစွဲရမည် ဖြစ်ပြီး လိုငွေကို မြန်မာ့စီးပွားရေး ဘဏ်မှ သတ်မှတ် အတိုးနှုန်းဖြင့် ချေးယူရမည်ဖြစ်သည်။ အရှုံးပေါ်နေသည့် အဖွဲ့ ၈ ဖွဲ့အတွက် ကုန်ကြမ်း ဝယ်ယူမှု စရိတ်၏ ၂ဝ ရာခိုင်နှုန်းကိုသာ နိုင်ငံတော် ဘဏ္ဍာရန်ပုံငွေမှ ကျခံမည်ဖြစ်ပြီး ကျန်ငွေကို မြန်မာ့စီးပွားရေး ဘဏ်မှ သတ်မှတ် အတိုးနှုန်းဖြင့် ချေးယူရမည်ဖြစ်သည်။ ဘဏ်မှ ငွေထုတ် ချေးရာတွင် လုပ်ငန်း စွမ်းဆောင်ရည် နှင့် ကြွေးမြီပေးဆပ်နိုင်မှု အခြေအနေ များကို အသေအချာ စိစစ်ပြီးမှ ထုတ်ချေးရန် လိုပါသည်။ သေချာစွာ စိစစ်မှု မရှိဘဲ အစိုးရ အဖွဲ့အစည်းဖြစ်၍ လိုသလောက် ထုတ်ချေးပါက လမ်းစဉ်ပါတီခေတ် ကကဲ့သို့ ကြွေးပေါ် ကြွေးဆင့်ပြီး ပြည်သူ့ဘဏ္ဍာ အမြောက်အမြား ဆုံးရှုံးရသည့် အဖြစ်ဆိုးနှင့် ကြုံ တွေ့ ရမည်ဖြစ်သည်။

အရှုံးပေါ်ပေါက်နေသော နိုင်ငံပိုင် စီးပွားရေး အဖွဲ့အစည်းများဖြစ်သည့် (က)မြန်မာ့ရုပ်ရှင်လုပ်ငန်း၊ (ခ)မွေးမြူရေး အစားအစာနှင့် နို့ထွက်ပစ္စည်း လုပ်ငန်း၊ (ဂ)မြန်မာ့ လျှပ်စစ်ဓာတ်အား လုပ်ငန်း၊ (ဃ) အထည်အလိပ် လုပ်ငန်း၊ (င)စက္ကူနှင့် အိမ်သုံးပစ္စည်း လုပ်ငန်း၊ (စ)မြန်မာ့မီးရထားနှင့် (ဆ)ကုန်းလမ်းပို့ဆောင်ရေးအဖွဲ့များ ကို အထူးကြပ်မတ်ပြန်လည်စိစစ် သင့်ပါသည်။

၂ဝ၁၃-၁၄ ခုနှစ်အတွက် ဘတ် ဂျက်ခွဲဝေချထားရာတွင် တိုင်းဒေသ ကြီးနှင့် ပြည်နယ်အစိုးရအဖွဲ့များအား ချထားပေးသည့် ထောက်ပံ့ငွေမှာ လွန်ခဲ့သောနှစ်ကထက် ကျပ် ၁၃၄ ဘီလီယံပိုမိုလာသော်လည်း စုစုပေါင်း အသုံးစရိတ်၏ ၄ ရာခိုင်နှုန်းခန့်သာ ရှိသည်ကို တွေ့ရပါသည်။ ပြည်နယ် များ ဖွံ့ဖြိုးတိုးတက်ရေးအတွက် ပိုမို ခွဲဝေချထားပေးသင့်ပါသည်။

အခွန်အကောက်မှ ရငွေကို ယခင်နှစ်ကထက် ၆ဝ ရာခိုင်နှုန်း ကျော် တိုးတက် ရရှိမည်ဟု ခန့်မှန်း ထားသည် ကို တွေ့ရပါသည်။ သို့သော် အခွန်အကောက်မှ ရငွေမှာ GDP ၏ ၄ ရာခိုင်နှုန်းခန့် သာ ရှိပြီး လွန်စွာ နည်းပါးလျက် ရှိနေသေးသည်ကို တွေ့ရပါသည်။ အခွန်ပိုမိုရရှိရေး အတွက် အလေအလွင့် မရှိအောင် ထိထိရောက်ရောက် ကောက်ခံ သင့်ပါသည်။ အမျိုးသားဝင်ငွေ ခွဲဝေမှုတွင် ပိုမိုမျှတမှု ရှိစေရန်နှင့် ဆင်းရဲနွမ်းပါး မှုလျော့ချရေးတွင် အထောက် အကူ ဖြစ်စေရန် အခွန်အကောက် စည်းကြပ် ရာတွင် Regressive သဘာဝရှိသော သွယ်ဝိုက်ခွန် ထက် တိုက်ရိုက်ခွန်ကို ဦးစားပေး ကောက်ခံ စည်းကြပ် သင့်ပါသည်။

မြသူအောင်

ဆက်စပ်သတင်းများ

လေဆိပ်ရောက်တိုင်း ဂုဏ်ယူနေပါ

လေဆိပ်ရောက်တိုင်း ဂုဏ်ယူနေပါ

ရန်ကုန်၊ ဇန်နဝါရီ ၃၁၊ ၂၀၁၇
ပွင့်သောပန်းတို့ လန်းစေဖို့

ပွင့်သောပန်းတို့ လန်းစေဖို့

ရန်ကုန်၊ ဒီဇင်ဘာ ၈၊ ၂၀၁၆

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*