မြန်မာနိုင်ငံကျောင်းသားလှုပ်ရှားမှုသမိုင်း(၁၉၀၃-၁၉၆၂)အောင်ထွန်း၊ ပဉ္စရူပစာအုပ်တိုက် ၂၀၁၂ အောက်တိုဘာ၊ ပထမအကြိမ် စာမျက်နှာ ၈၉၄၊ တန်ဖိုး ၁၀ဝ၀ဝ ကျပ်

အောင်ထွန်းရေးသားပြုစုသည့် မြန်မာနိုင်ငံကျောင်းသားလှုပ်ရှားမှုသမိုင်း(၁၉၀၃-၁၉၆၂)စာအုပ်

အောင်ထွန်းရေးသားပြုစုသည့်  မြန်မာနိုင်ငံကျောင်းသားလှုပ်ရှားမှုသမိုင်း (၁၉၀၃-၁၉၆၂)ကို ပဉ္စရူပစာအုပ် တိုက်မှ ပထမအကြိမ်ထုတ်ဝေလိုက်သည်။ မြန်မာနိုင်ငံ၏ နိုင်ငံရေးသမိုင်းစဉ်တွင် ထိပ်တန်းနေရာမှ ရှိခဲ့သော မြန်မာကျောင်းသားထု၏ သမိုင်းဝင်လှုပ်ရှားမှုများကို မော်ကွန်းတင်ထားသည့် စာအုပ်လည်း ဖြစ်သည်။ ရှည်လျားလှသည့် မြန်မာ့သမိုင်းတစ်လျှောက် အဓိကအခန်းကဏ္ဍမှ ပါဝင်ခဲ့သော်လည်း ယခင်က ဤကဲ့သို့ စာတစ်စောင်ပေတစ်ဖွဲ့ဖြင့် ကျနသေချာစွာ ထုတ်ဝေခွင့်မရခဲ့ဘဲ ယခုပထမဆုံးအကြိမ် ပြုစုထုတ်ဝေနိုင်ခြင်း အတွက် သက်ဆိုင်ရာပုဂ္ဂိုလ်များကိုယ်စား အထူးဂုဏ်ယူကြောင်း ဦးစွာဆိုချင်သည်။

စာအုပ်တွင် ကိုလိုနီခေတ်ဦးပိုင်း ၁၉၀၃ မှ စတင်ကာ ကိုလိုနီခေတ်နှောင်းပိုင်း ၁၉၄၅ ထိကို ပထမပိုင်း၊ ၁၉၄၅မှ လွတ်လပ်ရေးခေတ်၊ ထိုမှ ၁၉၆၂ တကသ အဆောက်အဦဖြိုချဖျက်ဆီးခံရသည်အထိကို ဒုတိယပိုင်းအဖြစ် ခွဲခြားတင်ဆက်ထားသည်။ ကျောင်းသားလှုပ်ရှားမှုများကို မှတ်တမ်းတင်ရာတွင် ပထမပိုင်း ၌ ၁၉၀၃ မှ ၁၉၀၆၊ ၁၉၁၈ မှ ၁၉၂၁၊ ၁၉၂၂ မှ ၁၉၃၀၊ ၁၉၃၀ မှ ၁၉၃၁ စသည်ဖြင့် နှစ်စဉ်အလိုက်လှုပ်ရှားမှုများကို မှတ်တမ်းပြု ထားသည်။ အထူးသဖြင့် ဤနှစ်ကာလများတွင် မြန်မာ့သမိုင်း၌ အရေးပါခဲ့သော ပထမကျောင်းသားသပိတ်၊ အမျိုးသားကျောင်းများ ပေါ်ပေါက်လာခြင်း၊ အမျိုးသားနေ့ ဖြစ်ပေါ်လာပုံ၊ နိုင်ငံခြားအသုံး အဆောင်ဆန့်ကျင် ရေးနှင့် ရဲတပ်၊ ဒေါင်းအလံ၊ တက္ကသိုလ်ကျောင်းသားသမဂ္ဂဖြစ်ပေါ်လာပုံ၊ တို့ဗမာသီချင်း၊ တို့ဗမာအစည်းအရုံး၊ ကိုအောင်ဆန်း၊  ကိုညိုမြနှင့် အိုးဝေမဂ္ဂဇင်းပါ ငရဲ ခွေးကြီးလွတ်နေပြီ ဆောင်းပါး၊ ဒုတိယကျောင်းသားသပိတ်၊ နဂါးနီ စာအုပ်အသင်း၊ ကျောင်းသားအလံအဖြစ် ခွပ်ဒေါင်းအလံ၊ ၁၃၀ဝ ပြည့် အရေးတော်ပုံနှင့် ကျောင်းသား သမဂ္ဂ၊ ကိုအောင်ကျော်ကျဆုံးခြင်း၊ မန္တလေးအာဇာနည် ၁၇ ဦးကျဆုံးမှု၊ ကျောင်းသားသံမဏိတပ်များ ဖွဲ့စည်း ခြင်းစသည့် အဓိကရဖြစ်ရပ်များကို မှတ်တမ်းတင်ထားသည်။

ဒုတိယပိုင်း (၁၉၄၅-၆၂)တွင် မူ နယ်ချဲ့ဆန့်ကျင်ရေး၊ အမျိုးသား လွတ်လပ်ရေးခရီးမှ ဆင့်ကဲပြောင်း လဲလာသော ကျောင်းသားထု၏ လှုပ်ရှားမှုများကို လေ့လာမှတ်တမ်း ပြုထားသည်။ သထုံမီးပွားနံရံကပ် စာစောင်၊ ဒီမိုကရေစီရေး လူ့အခွင့်အရေးနှင့် ပြည်တွင်းငြိမ်းချမ်းရေး လှုပ်ရှားမှုများ၊ ကမ္ဘာ့ငြိမ်းချမ်းရေး လှုပ်ရှားမှု၊ စင်ပြိုင်ကျောင်းသား အဖွဲ့အစည်းများ၊ ဗကသများအဖွဲ့ချုပ်ပေါ်ပေါက်လာခြင်း၊ DSO အမည်ရ တိုးတက်သော ကျောင်းသားအင်အားစု၊ နှစ်ခြမ်းကွဲ ဖဆပလတို့အကြားမှ ကျောင်းသားအရေးလှုပ်ရှားမှုများ၊ ၁၉၅၃ အောက်တိုဘာအရေးအခင်း၊ အကြမ်းဖက်နှိမ်နင်းမှုများ၊ ၁၉၅၆ ဟယ်ရီတန်အရေးအခင်း၊ ပညာရေး နှီးနှောဖလှယ်ပွဲ၊ ၁၉၆၂ ဇူလိုင် ၇ ရက်အရေးတော်ပုံ၊ တကသအဆောက်အဦကြီးအား ဒိုင်းနမိုက်ဖြင့် ဖောက်ခွဲဖျက်ဆီးခြင်းဟူသည့် သမိုင်းမှတ်တမ်းများကို တွေ့ရမည်။ အထူးသဖြင့် မြန်မာ့လွတ်လပ်ရေးအတွက် အမြုတေအင်အား၊ အသိုက်အမြုံတစ်ခု၏ ခရီးရှည်ကို မှတ်တမ်း ပြုထားသော စာအုပ်လည်းဖြစ်သည်။

စာအုပ်တွင် ကျောင်းသားလှုပ်ရှားမှုများ၏အစဟု အများသိထားကြသော ၁၉၂၀ ပထမကျောင်းသား သပိတ်ထက် ဦးစွာလှုပ်ရှားမှုကိုလည်း မှတ်တမ်းပြုထားသည်။ ဤ ၁၉၀၃ ခုနှစ် ပညာရေးဌာနမှ အရာရှိများကို ရှိခိုးအရိုအသေပြုရန် ထုတ်ဆင့်သောအမိန့်ကို ကျောင်းသားများက တညီတညွတ်တည်း ကန့်ကွက်ခဲ့ကြခြင်း သည် မြန်မာ့သမိုင်းတွင် အဦးဆုံးကျောင်းသားလှုပ်ရှားမှုဟု မှတ်တမ်းပြုထားသည်။ ဤမှတစ်ဆင့် မြန်မာ့လွတ်လပ်ရေးခရီးရှည်တွင် ဦးဆောင်ဖြစ်ခဲ့သော YMBA အသင်းကြီး ပေါ်ပေါက်လာခဲ့ကြောင်း သိရ၍ အဖိုးတန်သော မြန်မာ့သမိုင်းလစ်ကွက်တစ်ခုကို ဖော်ထုတ်လိုက်ခြင်းဟု ဆိုနိုင်သည်။

ကျောင်းသားထု၏ လှုပ်ရှားမှုများ၊ ကျောင်းသားသမဂ္ဂများ တည်ထောင်ပြီးနောက် လှုပ်ရှားမှုများကိုလည်း နှစ်အလိုက်၊ သမဂ္ဂဥက္ကဋ္ဌများ၏ သက်တမ်းအလိုက် ခိုင်လုံတိကျသော မှတ်တမ်းများ၊ လက်ရေးမူများ၊ သတင်းစာ၊ ဂျာနယ်များမှ ဖြတ်ပိုင်းများ၊ အစည်းအဝေးသဘောတူညီချက်များ၊ ကြေညာချက်များကိုအားပြု၍ ခိုင်မာစွာ မှတ်တမ်းတင်ပြုစုထားသည်။ နှစ်ကာလရှည်ကြာစွာ တိမ်မြုပ်ပျောက်ကွယ်နေခဲ့ရသော မြန်မာ့လွတ်လပ်ရေးတိုက်ပွဲအမြုတေတို့၏ ကျေးဇူးတရားကို မေ့ပျောက်နေခဲ့ရသော ကာလသည် ဤစာအုပ် ထွက်ရှိပြီး နောက်တွင် ကုန်ဆုံး၍ ရောင်ခြည်လင်းပြီဟု ဆိုနိုင်သည်။ သမိုင်းဝင် ဓာတ်ပုံများသာမက ရန်ကုန်တက္ကသိုလ် ကျောင်းသားသမဂ္ဂဖွဲ့စည်းပုံစာတမ်း မူရင်း(အင်္ဂလိပ်/မြန်မာ)၊ နိုင်ငံတကာကျောင်းသား အဖွဲ့အစည်းတို့၏ အာဘော်အချို့နှင့် ဆက်နွယ်မှုစာတမ်းမူရင်းများကို လေ့လာသိရှိရသည်မှာ မျိုးဆက်သစ်တို့ အတွက် အားတက်ဖွယ်ဖြစ်သည်။

မူလက အမျိုးသားပညာရေး၊ မြန်မာ့လွတ်လပ်ရေး ဦးတည်ချက်များ၊ လှုပ်ရှားမှုများနှင့် စတင်ခဲ့သော ကျောင်းသားလှုပ်ရှားမှုများသည် မြန်မာ့နိုင်ငံရေးသမိုင်းစဉ် လှုပ်ရှားပြောင်းလဲမှုများနောက်တွင် ကမ္ဘာ့ငြိမ်းချမ်းရေး၊ ဒီမိုကရေစီရေး၊ လူ့အခွင့်အရေး၊ အဆင့်မြင့်ပညာရေးလှုပ်ရှားမှုများဖြင့် ဆင့်ကဲပြောင်း လဲလာသည်ကိုလည်း တွေ့ရသည်။ ဤလှုပ်ရှားပြောင်းလဲမှု သမိုင်းရေစီးထဲတွင် ကျောင်းသားသမဂ္ဂများနှင့် ကျောင်းသားလှုပ်ရှားမှုတို့သည်လည်း အမျိုးမျိုးအဖုံဖုံသော တိုက်ပွဲသစ်များကို တွေ့ကြုံခဲ့ကြရသည်။ ခေတ်အဆက်ဆက် မြန်မာ့နိုင်ငံရေး ခေါင်းဆောင်များသည် ဤသမဂ္ဂအဆောက်အဦဘူမိနက်သန်မှ ရှင် သန်ကြီးထွားခဲ့ကြရင်း သမိုင်းအလှည့်တစ်ခုတွင်မူ ဤသမဂ္ဂ၊ ကျောင်းသားထုတို့နှင့် ငြိုးသူရန် ဘက်ပမာဖြစ်ခဲ့ကြရသည်မှာလည်း သင်ခန်းစာယူဖွယ်ဖြစ်သည်။ အထူးသဖြင့် သမဂ္ဂအဆောက်အဦအတွင်း ပျံ့နှံ့ဝင်ရောက်ခဲ့သော ခေတ်အလိုက် နိုင်ငံရေးအတွေးအခေါ်အယူအဆ ပြောင်းလဲမှုများသည်လည်း များစွာ သက်ရောက်မှုရှိသည်ဟု ဆင်ခြင်မိသည်။ မည်သည့်အယူအဆများပင် ရှိသည်ဖြစ်စေ ကျောင်းသားလှုပ်ရှား မှုများ၏ အဓိက ဦးတည်ချက်မှာ တရားမျှတရေး၊ လူ့အခွင့်အရေးနှင့် ငြိမ်းချမ်းရေးတို့ပင်ဖြစ်သည်မှာ  သေချာလှသည်။

အမှာစာအရ ဤစာအုပ်တစ်လျှောက် များစွာသောအန္တရာယ် တို့ ကြုံခဲ့ရကြောင်း သိရသည်။ သို့ သော် သမိုင်းတစ်ပတ်လည်ချိန်တွင် အမှန်တရားနှင့်ရိုးသားမှုသည် ပြန်လည်နေရာယူနိုင်ပြီလည်းဖြစ်သည်။ စာအုပ်ပါ ခိုင်မာသောသမိုင်းမှတ်တမ်းများအရ မြန်မာကျောင်းသားထုတစ်ရပ်လုံး၏ ဆောင်ရွက်ချက်များကို မော်ကွန်းထိုးလိုက်သည်ဟု ဆိုချင်သည်။ ဤသမိုင်းကို လေ့လာရင်းမှပင် မျိုးဆက်သစ်သမဂ္ဂလူငယ်တို့ ဆက်လက်ချီတက်ရမည့် ခရီးတစ်လျှောက် ဆောင်ရန်၊ ရှောင်ရန်များနှင့် ဦးတည်ရာကို ဆင်ခြင်တွေး ဆနိုင်ကြမည်ဟုလည်း ယုံကြည်မိသည်။

မြန်မာ့သမိုင်းလေ့လာသူများနှင့် မျိုးဆက်သစ်ကျောင်းသားလူငယ် တို့ ဖတ်ရှုသင့်သည့် သမိုင်းစာအုပ် ကောင်းတစ်အုပ်ဖြစ်သည်။ ၁၉၆၂ နောက်ပိုင်း သံဖနောင့်အောက်မှ လှုပ်ရှားမှုများကိုလည်း ဆက်လက် မှတ်တမ်းပြုနိုင်ရန် ကြိုဆိုရပါသည်။

“စစ်သားတစ်ယောက်အတွက် လက်နက်ကိရိယာမှအစ အလုံးစုံ တပ်ဆင်ရေးအတွက် တစ်နှစ် ၄၀ဝ၀ ကျော်ကုန်ကျနေချိန်တွင် ကျောင်းသားတစ်ယောက်အတွက် တစ်နှစ် ၃၅၀ သာ သုံးစွဲနေပေသည်။ စစ်သားတစ်ယောက် ၁ နှစ်သုံးငွေ ကို ကျောင်းသားပေါင်း ၁၁ ယောက် အတွက် သုံးစွဲနိုင်ပေသည်။” (စာမျက်နှာ-၅၁၀)

ဆက်စပ်သတင်းများ

သတင်းမျှဝေရန်

About Author

စာဖတ်သူ မှတ်ချက်များ (၀)

Leave a Reply

Your email address will not be published. Required fields are marked *

*