ပြည်တွင်းသတင်း — ရန်ကုန်၊ ဧပြီ ၂၇၊ ၂ဝ၁၂

ရှင်းလင်းပွဲမြင်ကွင်း

Internet Society ဖြစ်မြောက်ရေးကော်မတီအဖွဲ့မှ ဦးဆောင်၍ မေလ ၂၇ ရက် နေ့တွင်ကျင်းပမည့် Internet Society Myanmar Chapter ဖွဲ့စည်းရန် အထိမ်းအမှတ် အခမ်းအနားအတွက် စာနယ်ဇင်းရှင်းလင်းပွဲကို ယနေ့ နံနက် ၁ဝ နာရီတွင် ရန်ကုန်မြို့၊ မြန်မာကွန်ပျူတာပညာရှင် အသင်းရုံးခန်း၌ ပြုလုပ်ခဲ့သည်။

အဆိုပါအဖွဲ့အစည်းကို နေရာဒေသအလိုက်  Chapter အမည်များ ပေးရာတွင် Thailand Chapter ဖြင့်လည်းကောင်း၊ Singapore Chapter ဖြင့်လည်းကောင်း၊ ယင်းကဲ့သို့ အသင်းသားဦးရေ အနည်းဆုံး ၂၅ ဦးဖြင့် ဖွဲ့စည်းမည်ဖြစ်ကြောင်း၊  ထိုသို့ ဖွဲ့စည်းရာတွင် နဂိုမူလ အဆင့်ဆင့်အတိုင်း Chapter ဖွဲ့စည်းမှု လျှောက်ထား၍ Internet Society မှ ပြန်လည်သုံးသပ်ကာ Chapter အဖြစ် သတ်မှတ်ခြင်းကို ခံယူရမည်ဖြစ်ကြောင်း Internet Society             ဖြစ်မြောက်ရေး ကော်မတီ အဖွဲ့ဝင် ဦးရာဗီက ရှင်းလင်းတင်ပြသည်။

ယင်းအဖွဲ့အစည်းတွင် အဖွဲ့ဝင်ပေါင်း ၅၅ဝဝဝကျော် ပါဝင်ပြီး လက်ရှိ Chapter ပေါင်း ၉ဝ ခန့်ရှိသည့်အပြင် Orgainzaion Members အနေဖြင့် ၁၃ဝ အထက်ရှိသည်ဟု ထပ်မံရှင်းလင်းခဲ့သည်။

အဆိုပါ အဖွဲ့အစည်း တည်ထောင်ခြင်းနှင့်ပတ်သက် ၍ Internet Society မှ ဖွံ့ဖြိုးဆဲနိုင်ငံများရှိ အင်တာနက်ဆိုင်ရာ အဖွဲ့အစည်းများအတွက် နည်းပညာလုပ်ငန်းများဆောင်ရွက်ပေးခြင်းကိုလည်းကောင်း၊ လေ့ကျင့်သင်ကြားပေးခြင်းကို လည်းကောင်း၊ အရည်အချင်းစစ်စာမေးပွဲများ စစ်ဆေးပေးခြင်းဖြင့် လည်းကောင်း၊ ဒေသအတွင်း အသင်းဝင်များ ဖွဲ့စည်းပေးခြင်းကိုလည်းကောင်း၊ ပြည်တွင်း၌ ရှိသောနိုင်ငံနှင့် ဒေသအလိုက် လှုပ်ရှားဆောင်ရွက်ရမည့် အခန်းကဏ္ဍများ သတ်မှတ်ပေးခြင်း ကိုလည်းကောင်း ရှင်းလင်းတင်ပြခဲ့သည်။

Internet Society ဖွဲ့စည်းပုံနှင့်ပတ်သက်၍မေးမြန်းရာတွင် အထက်ဖော်ပြပါ ကော်မတီဝင် ဦးရာဗီက “ကမ္ဘာတစ်ဝှမ်းလုံးမှာရှိတဲ့ Internet အသုံးပြုတဲ့သူတွေ အားလုံးအတွက် တန်းတူညီမျှ အကျိုးဖြစ်ထွန်းစေဖို့နဲ့ အခုလက်ရှိ ဖွံ့ဖြိုးနေတဲ့နိုင်ငံတွေနဲ့အညီ ပညာရေးဖွံ့ဖြိုးတိုးတက်စေချင်တာရယ်၊ အင်တာနက်ကို အရင်ကထက်ပိုပြီးတော့ ဖွံ့ဖြိုးတိုးတက်လာအောင် ပညာရှင်တွေ မွေးထုတ်ပေးချင်တာရယ် နောက်ဆုံးအနေနဲ့ကတော့ လူမှုရေး၊ စီးပွားရေး၊ ပညာရေးကဏ္ဍများအလိုက် အင်တာနက်ကို ကျယ်ကျယ်ပြန့်ပြန့် အသုံးချနိုင်ဖို့အတွက် Internet Society ဖွဲ့စည်းခဲ့တာပါ”ဟုပြောသည်။

အဆိုပါ အဖွဲ့အစည်း၏ အသင်းသားဖွဲ့စည်းပုံနှင့်ပတ်သက်၍ ယင်းအဖွဲ့အစည်း၏ Vision ဖြစ်သော “Internet is for everyone” ဆိုသည့်အတိုင်းမည်သူမဆို Internet Society Myanmar Chapter တွင် အသင်းဝင်များအဖြစ် ပါဝင်နိုင်သည်ဟု ဆိုသည်။ ထိုသိုဖွဲ့စည်းရာတွင် Individual Member ဖြင့်လည်းကောင်း၊ Organization Member ဖြင့်လည်းကောင်း၊ အသင်းဝင်နိုင်ပြီး Individual Member အဖြစ် ဝင်ရောက်လိုသူများအတွက် အင်တာနက် www.internetsociety.org တွင် Sign In လုပ်၍ အလွယ်တကူဝင်ရောက်နိုင်ကြောင်း၊ Individual Member အဖြစ် အသင်းဝင်ပါက အသင်းဝင်ကြေးနှင့် နှစ်စဉ်ကြေးများ ပေးသွင်းရန်မလိုကြောင်း အသေးစိတ်ရှင်းလင်းခဲ့သည်။

ထို့အပြင် Myanmar Chapter အဖြစ် ဆက်လက်ဝင်ရောက်လိုသူများအတွက် Myanmar Chapter တွင် အသင်းဝင်ရန် သီးခြားအနေ ဖြင့် ထပ်မံပေးသွင်းဖို့ မလိုကြောင်း၊ အထက်ပါကိစ္စနှင့်စပ်လျဉ်း၍ ရှင်းလင်းခဲ့သည်။

ယင်းအဖွဲ့အစည်း၏ ဘဏ္ဍာရေးနှင့်ပတ်သက်၍ မေးမြန်းရာတွင် Internet Society Myanmar Chapter ၏ ရန်ပုံငွေများကို သတင်းလွှာနှင့် ဒီဗွီဒီမှာယူလိုသူများထံမှ နှစ်စဉ်ကြေးကောက်ခံခြင်းဖြင့်လည်းကောင်း၊ အလှူငွေများ လက်ခံခြင်းဖြင့်လည်း ကောင်း၊ ကုမ္ပဏီများထံမှ ပံ့ပိုးကူညီမှုရယူခြင်းဖြင့်လည်းကောင်း၊ အာဏာပိုင်အဖွဲ့အစည်းများထံမှ ပံ့ပိုးကူညီမှု ရယူခြင်းဖြင့် လည်းကောင်း ရှာဖွေသွားမည်ဖြစ်ကြောင်း ရှင်းလင်း တင်ပြခဲ့သည်။

ထို့အပြင် အဖွဲ့များကျင်းပရန်အတွက် တစ်နှစ်လျှင် အမေရိကန်ဒေါ်လာ ၂ဝဝဝ ထက်မပိုသော ထောက်ပံ့မှု ကို Internet Society မှရရှိနိုင်ကြောင်းပြောသည်။

Internet Society Myanmar Chapterဖွဲ့စည်းရခြင်း၏ အဓိကရည်ရွယ်ချက်များမှာ မြန်မာနိုင်ငံတစ်ဝန်းရှိ အင်တာနက် အသုံးပြုသူများအတွက် အင်တာနက်၏ အခန်းကဏ္ဍကို အကျိုးရှိစွာ အသုံးပြုရေးနှင့် စပ်လျဉ်း၍ ကူညီဆောင်ရွက်နိုင်ရန် Chapter ကို ဖွဲ့စည်းရခြင်းဖြစ်ကြောင်း Internet Society ကော်မတီဝင်အဖွဲ့၏ ထုတ်ပြန်ကြေငြာချက်အရ သိရသည်။

ယင်း ထုတ်ပြန်ချက်များမှာ ၎င်းကဲ့သို့ စံချိန်ပြည့်မီစေရန်အတွက် မြန်မာပြည်တွင်း အင်တာနက် အသုံးပြုမှုနှုန်း မြင့်တက်လာစေရန် လည်းကောင်း၊ ပိုမိုပြည့်စုံသော Internet Governance  ပေါ်ပေါက်လာစေရန်လည်းကောင်း၊ အင်တာနက်နှင့် ပတ်သက်သော နည်းပညာများ ဖြန့်ဝေ ပေးရန်လည်းကောင်း၊ မြန်မာပြည်တွင်း၌ အင်တာနက်နှင့် ပတ်သက်၍ မှန်ကန် စိတ်ချ ပြည့်စုံသော သတင်းအရင်းအမြစ်တစ်ခုအဖြစ် ရပ်တည်ရန်လည်းကောင်း၊ အင်တာနက်နှင့် ပတ်သက်သော အရေးကြီးကိစ္စများ ပေါ်ပေါက်လာပါက သက်ဆိုင်ရာအဖွဲ့အစည်း၏ ပညာရှင်များနှင့်ဝိုင်းဝန်းကူညီ ဆောင်ရွက်ရန် လည်းကောင်း၊ ပြည်တွင်းပြည်ပရှိ မီဒီယာများတွင် မြန်မာပြည်အင်တာနက်နှင့် သက်ဆိုင်သောဆောင်းပါးကို သုံးသပ်ရန်အတွက် သုတေသနစာတမ်းများ ပံ့ပိုးကူညီထုတ်ဝေနိုင်ရန်လည်းကောင်း ထုတ်ပြန်ထားကြောင်း၊ ၎င်းအဖွဲ့ဝင်များက ရှင်းလင်းခဲ့သည်။

အင်တာနက်သည် လူတိုင်းအတွက် ဖြစ်သည်ဟူ သော မျှော်မှန်းချက်ဖြင့် ဖွဲ့စည်းထားသည့် Internet Society သည် ကမ္ဘာတစ်ဝန်းလုံးရှိ Internet  သုံးစွဲသူများ အကျိုးဖြစ်ထွန်းစေရေးအတွက် ၁၉၉၂ ခုနှစ်မှ စတင်တည်ထောင်ခဲ့ပြီး ကမ္ဘာအနှံ့ အင်တာနက်ချိတ်ဆက်သုံးစွဲမှုဆိုင်ရာ မူဝါဒ၊ ပညာရေးနှင့်စံနှုန်း သတ်မှတ်ချက်အားလုံးတို့အား အကျိုးအမြတ်အတွက် မဟုတ်ဘဲ၊ ဦးဆောင်ထောက်ပံ့ပေးရန် ဖွဲ့စည်းတည်ထောင်ထားသော အဖွဲ့အစည်းတစ်ခု ဖြစ်သည်ဟုဆိုသည်။

ယင်းကဲ့သို့ အမေရိကန်နိုင်ငံ ဝါရှင်တန်ဒီစီနှင့် ဆွစ်ဇာလန်နိုင်ငံတို့တွင်လည်း Internet Society ၏ အခြေစိုက်ရုံးများ ဖွင့်လှစ်ထားရှိကြောင်း သိရသည်။

၀၁၅

ဆက်စပ်သတင်းများ

သတင်းမျှဝေရန်

About Author

စာဖတ်သူ မှတ်ချက်များ (၀)

Comments are closed.